Samuel Kerieu 28 - Angami Naga CL (Re-edited) Bible (BSI)

¹ Süki Filistinmiako Israel ze terhü chütuoü uko chüpahiko kengu phrelie. Sitse Akish-e David ki, “No mu n themiako a ze terhü nu pra tou zotuokecü no si ba zo mecie.”

² Sitse David-e Akish ki, “Viwe, no n kituou kedipuo chülie vi ba shi si ba zotuo.” Akish sie David ki, “Viwe, a n chüpie n bu a kerhei chie la a kepfheu chütatuo.”

Saul-e Themou Rüsakecü

³ Tsie we Samuel siata, mu Israel pete puo krükra sidi puo pie puo nadiu Rama nu khruwa. Saul-e puo kijü nu themouko mu kemeduomiako whuo phrewata.

⁴ Siro Filistinko kengulie di vor Shunem nu razhü chü balie. Saul rei Israel pete kie kengulie, sidi uko vor Gilboa nu balie.

⁵ Siro Saul-e Filistinko chüpahi ngushü tse, michieta mu puo melou perüshürüsata.

⁶ Sidi Saul Jihova ketsokecü ki, Jihovae puo mho nu morei Urim geinu, morei siedzekesiko geinu rei puo die kelashü mota.

⁷ Sitse Saul sie puo kituoko ki, “A la themouyakecü thenumiapfü puo pfhüshücie, siro a vo di puo ki mha ketsolietuo.” Sitse kituoko sie puo ki, “Endor nu themoumiapfü puo balie.”

⁸ Süla Saul puorhi chü pekreipfülie mu pfhenei kekrei selie di sünu mia kenie bu puo ze vo. Ukoe theva zenu thenupfü ki vor. Sidi puo sie, “A la ruopfü puo ketsoshücie, sidi a puo za se n ki pukeshüu ze vorcie.”

⁹ Thenupfü sie puo ki, “Noe Saul mhachükeshü pete si tou ba ze, kimhie di puo themoumiako mu meduoyakezhako kijüu nunu peka phrewate shikecü. Siüro no kidi a bu siatatuo üdi kebie pethoupie ba ga?”

¹⁰ Derei Saul-e Jihova za se rüse di, “Jihova rhei ketuo mhie, mha hau la kepechü puorei se vor n gei shülie lho” sita.

¹¹ Sitse thenupfü sie, “A bu n la supuo ze vor ta?” Puo sie, “A la Samuel ze vorshücie.”

¹² Ru thenupfüe Samuel ngu tse, puo melie shiekhouita; sidi thenupfü Saul ki, “No kiüdi a seya ga? No Saul ze!”

¹³ Sitse kediu puo ki, “Michie hiecie; no kedipuo ngu ga?” Thenupfü Saul ki, “Ae terhuo puo kijü nu sierketa ngu.”

¹⁴ Puo sie hapfü ki, “Puo kengu kimhie ga?” Hapfü sie, “Ketsamia puo khorzhie; pfhe pie puo kezipfü di,” si. Süla Saul-e süu Samuel keta silie, sidi puo zie pesupie kijü merelie di nerhutsu zhüta.

¹⁵ Sitse Samuel Saul ki, “No kiüdi a ze khor a kebvüya ga?” Saul sie, “A nou kemezhiethorte, kekreilamonyü Filistinko a ze terhü chütuoü bate, mu Ukepenuopfü a kinu rüreite sidi a pfhekho sa mote, siedzekesiko morei a mho geinu rei silie mote, süla a bu kedipuo chütuo shi no se a ki pucie.”

¹⁶ Samuel sie, “Jihova n kinu rüreita, sidi n ngumvümia chüta üro kiüdi a ketsoya ga?

¹⁷ Jihova a geinu pukeshü mhie n gei chüshüwate ho; kekreilamonyü n dzie nunu n kedirüvie cierhawate, sidi süu khapie n zanuou David tsüwate.

¹⁸ Kekreilamonyü no Jihova pfhe zelie mote, mu Amalek gei puo noupfhünouyie kereu chüshü mo. Süla Jihova thie n gei mha hau chüshüzhie.

¹⁹ Sizomoü Jihova n sa di Israel khapie Filistinmia dzie nu shüwatuo; sidi sodu no mu n nuonuoko vor a ze batatuo; siro Jihovae Israel rüpfhünuo rei khapie Filistinko dzie nu shüwatuo.”

²⁰ Sitse Samuel dieko la Saul-e michie di te mhai tsu kijü vazhapfü zhüta, mu kekuo puorei puo gei tuo mota, puoe teisozha pete mu teizeizha pete mhapuorei cü kemo la.

²¹ Siro thenupfü Saul ki vor, mu hapfüe puo michie se zhüketa ngu tse, puo ki, “N kituopfü n pfhe rünyüliete, mu a a kelhoupie kemichie nu shüshü, sidi no kedipuo a ki pu shiü rünyüliete.

²² Süla tsie, no rei n kituopfü pfhe rünyüshücie; a bu kecüca se vor n mhodzünu shücie. Sidi mhacülie, sitse no n cha nu vokezhü ki kekuo ngulietuo.”

²³ Derei puo mvüta, sidi sie, “A mhacülie lho,” sita. Derei puo kituoko mu thenupfü puo ki pu beita, süla puo uko die zelie. Süla puo kijü nu sielie di pfü thezhü gei balie.

²⁴ Thenupfü ki nu mithunuo keluo yopuo tha. Hapfü süu dukhri mhailie, mu puo thoulha pielie di süu nelie, sidi khreiüshükemo niekhrüda rielie.

²⁵ Puo süko pie Saul mu puo kituoko mhodzünu shü, ru uko cülie. Süsie uko sielie di süzhü tuo lata.