Samuel Kerieu 24 - Angami Naga CL (Re-edited) Bible (BSI)

David-e Saul Kelakeshü

¹ Siro Saul-e Filistinmia whuo tuo di la vor tse, mia puoe puo ki, “David-e Engedi rayha nu ba” idi pu.

² Sitse Saul-e Israel pete donu mia nyie se kedalie, sidi David mu puo themiako pfhü Thelou Tsiekrieko tsatie vo.

³ Puoe cha khieki tekuobouu ki vor, sünu tsiepfü puo baya, sidi Saul-e sünunu rüleilietuoü le. Süki David mu puo themiakoe tsiepfüu kesoutho nu ba.

⁴ Sitse David themiako sie puo ki, “Jihova n ki, ‘A n ngumvümia khapie n medo chüwatuo, sidi noe puo pie n dzie nu shüwatuo,’ ikeshü teisozhau sü thie hate.” Sitse David-e vo di pesikhuoi di Saul pfhephrie belie.

⁵ Süsietsa David melou chüti vorta, puoe Saul pfhe bekewa la.

⁶ Sidi puoe puo themiako ki, “Jihova a bu a niepuu, Jihova puo kenhekelieu gei a dzie yhapie puo perhie haikecü chü hienuya; kekreilamonyü Jihova puo kenhekelieu zo.”

⁷ Süla David-e puo themiako kerhie seshü di uko bu Saul biewaketuo khawa. Süsie Saul sielie di tsiepfüu nunu tuota, sidi puo thuo puo cha nu vota.

⁸ Süsie David rei sielie di tsiepfüu nunu parlie di sie Saul kie di, “A niepuu kediu!” Sidi Saul puo sietsa meho pra tse, David-e nuketsu puo kelu.

⁹ David-e Saul ki, “No kiüdi themia n ki, ‘David n pekawatuoü n pfhüya’ ikeshüko rünyüya ga?

¹⁰ Thie Jihova kedipuo mhie di tsiepfü nunu n khapie a dzie nu shüshü shikecü n mhinie pie nguwate; mu huomia a bu n dukhriwanu pu zo, derei n kelashüte. Ae sie, ‘A a dzie yhapie a niepuu perhielie lho zo; kekreilamonyü puoe Jihova kenhekelieute.’

¹¹ Harie, apuo, a dzie nu n pfhephrieu mehoshü phi; kekreilamonyü a n pfhephrieu be toulieta zo, sidi n dukhriwa mo, a dzie nu mha kesuo morei mia petsoukecü puorei tuo mokecü si mecü touta ze. A n gei phouma mo zo; sirei no a kerheiro pfhü tuo ze.

¹² Jihova bu avu donu capiu chüliecie! Jihova bu n geinu a khepushülie; derei a dzie zo we n perhielie lho zo.

¹³ Keriekimia mhasidie pukecü, ‘Themia kerüzhümia geinu mha kesuo parya’ isi, derei a dzie we n petsoulie lho zo.

¹⁴ Israel kediu supuo petsou di par ga? No supuo whuo tuo ga? Tefü kesia puo me? Telhie yopuo me?

¹⁵ Süla Jihova bu thecau chüshülie, sidi avu donu mhatho-u chüshülie. Puo bu süu mehoshülie, mu a kechau chüshü, sidi n perhiekecü nu a khruohishücie.”

¹⁶ Siro David-e Saul ki die hako pu thewa tse, Saul sie, “A nuo David, hau n pfheü zo me?” Sidi Saul puo pfhephra sie di krata.

¹⁷ Puo David ki, “Noe a ki rei miathokuo zo; kekreilamonyü no mha kevi pie a tsüshü, sirei a we mha kesuo pie n tsü.

¹⁸ No thie a gei mha kevi chükeshü thashü a kie, süusü Jihova a khapie n dzie nu shü rei no a dukhriwa mocü la.

¹⁹ Kekreilamonyü mia kehoupuorei puo ngumvümia ngulie ro, puoe puo bu kru di tuotatuo me? Süla no thie a gei chükeshüu la Jihova bu keviu pie n zhakhra chüshüliecie.

²⁰ Tsie we no kedi chütuoü pu ketuo a si bate, mu Israel kedirüvieu n dzie nunu sedelietuo.

²¹ Süla no tsie Jihova geinu a sie vorkezhü a nuosenuoyieko pekawa lhoü, mu a puonuoko kikru donu a za pekawa lho ükecü a ki rüseshücie”

²² Süla David hau se Saul ki rüseshü. Sitse Saul kinu vota; derei David mu puo themiako dahou kemetei nu la vota.