Samuel Kerieu 21 - Angami Naga CL (Re-edited) Bible (BSI)

David mu Kemesa Niekhrüdau

¹ David-e Nob nu zievo-u Ahimelek ki vor. Sitse Ahimelek pekhrukhru di David ze kesetuoü vor, sidi sie puo ki, “Kiüdi miapuorei n ze mo di n rübei ga?”

² Sitse David-e Ahimelek zievo-u ki, “Kediu mhatho puo pie a peleshü di a ki, ‘A n ketseshükezhü mhatho hau dze, mu a n bu kedipuo chünushü shikecü miapuorei bu si hiecie,’ ite. A sikecü la thechü sikecü nu khriesamiako ze kesetuoü chiepie ba.

³ Süla tsie n dzie nu kedipuo ba ga? No niekhrüda pengou morei mhakehoupuorei haki kebau kha a tsücie” sita.

⁴ Sitse zievo-u David ki, “A dzie nu tsie kemesa niekhrüda zo moro niekhrüda kekrei ba mote, khriesako thenumia geinu u thuo u kelakrei seketuomia mo mo ga?”

⁵ Sitse David zievo-u ki, “Kethowe, a mhatho chütuo üdi parketa sie thenumia bu hie khieki vor mote; kehoukeruo chü rüvekecü nu zorei khriesamia viebouko sü mesa zo; siüro thie uko mhabouko kidepuorei mesa batuo ga?”

⁶ Süla zievo-u kemesa niekhrüda pie puo tsüshü; Kepekieniekhrüda sie niekhrüda kekrei ba kemo la, süusü Jihova mhodzü nunu se par, süko sou nu niekhrüda kele kha lashüwatuo üdi süu chüwa.

⁷ Teisozha sünhie Saul kituomia, Jihova mhodzünu khapie keba mia puo ba; puo zae Doeg, Edommia, Saul kuopfheko donu kezhatho-u.

⁸ David-e sie Ahimelek ki, “N dzie nu zhiecha morei rüngou ba mo me? A zhiecha morei a rünyie se vor mote, kekreilamonyü kediu mhatho-u rükri di chü morosuoketa la.”

⁹ Sitse zievo-u sie, “Filistin-u Goliat, no Ela razha nunu dukhrikewau, zhiechau ba, süu zievoboulie khapie kezha sietsa pfhe puo nu dzepie zha, mhanuü n thuo süu selietuo üro, süu seliecie; süu sie kekrei hanu ba mo.” David sie puo ki, “Süu kemhiecü kekrei tuo mo zo; süu pie a tsüshücie.”

David Ta Gath nu Voketa

¹⁰ David-e sünhie Saul kinu tata; sidi puo Gath nu kediu Akish ki vota.

¹¹ Sitse Akish kituoko sie puo ki, “Hau kijüu nu kediu David mo üme? Uko u dowhuo di tsali chü ketsie di, ‘Saul we nyienyie dukhri, mu David we nyie kerür dukhriwawe!’ isi ketuou mo me?”

¹² Siro David-e die hako pie puo nou shü se sei tuota, mu Gath Kediu Akish prei se bata.

¹³ Süla puo uko mhodzü puo zho chü pekreiwa, sidi puoe uko mhodzünu kenyamia do chüta. Puoe care kikhako rha, mu puo mhitsie bu kru puo tiemie gei tsu.

¹⁴ Sitse Akish sie puo kituou ki, “Mehoshücie, themiau nyate; kiüdi nieko puo ze a ki vor ga?

¹⁵ A kenyamia se sa morosuo ba üdi nieko themia hau ze vor puo bu a mhodzünu kenyamia kechü chütieya me? Themia hauha bu a kinu lertieya me?”