Samuel Kerieu 20 - Angami Naga CL (Re-edited) Bible (BSI)

David mu Jonathan Unie Khrietho

¹ Siro David-e Rama nu Naiot nunu tata. Sidi puo Jonathan mhodzünu vor di sie, “A kedipuo chüwata ga? A kejo kicüpuota ga? Siro n puo mhodzü a kephouma kedipuo ba di puoe a kerheiro pfhü tuo zota ga?”

² Sitse puo sie, “Kenyüthor! No siatalie lho. A puoe mha kezha rei kecü rei se a pesi mo di mhapuorei chüya mo, mu kiüdi a puo mha hau a ki pekhrewatuo mu? Silie kenjü zo!”

³ Derei David rei rüse di, “N puoe no a khrieya ücü si pevi se ba ze; mu puoe lecü, ‘Jonathan bu hau silie lho, moro puo puo nousuota rei si mo’ ilie vi. Derei ketho zo, Jihova rhei ketuo mhie mu no rei rhei ketuo mhie, süu ba zo, kesia hienie donu phicha puo zote.”

⁴ Sitse Jonathan sie David ki, “No mhakehoupuo pu zo shierei, a süu chüshütuo.”

⁵ David sie Jonathan ki, “Sodu khrüsate, mu a kediu ze ba di mhacü morosuo; derei a bu tuotacie, di a bu zha se nhie thevatie ketso a thuo a kevie se batacie.

⁶ Mhanuü n puoe a ba moketa si toulieta ro, no sie, ‘David puo nadi Bethlehem nu voketuo la a ki cha beitelie; kekreilamonyü teiciekepra kikru pete keze di ruosuo teiu ütelie’ siwacie.

⁷ Mhanuü puoe sie, ‘Viwe’ isi liro süu n kituou la vituo; derei mhanuü puo puo nou meyieta liro, puo mha kesuo rhü baketa siliecie.

⁸ Süla n kituou gei tseiüvishücie, kekreilamonyü noe n kituou ze kemesa dietseidiekho puo chüliete. Derei mhanuü kejo huo a gei ba üro, n thuo a dukhriwacie. Kiüdi no a ze n puou ki la votuo ga?”

⁹ Jonathan sie, “Süu bu n ze kepecietacie! Mhanuü a puoe mha kesuo süu se n gei vortuoü pepikelie a silieta ro, a n ki pu lho üme?”

¹⁰ Sitse David sie Jonathan ki, “Mhanuü n puo puo nei mo di n die kelata ro supuonie süu se a ki putuo ga?”

¹¹ Jonathan David die kela di, “Vorlie, avu keze lie nu tsu khe,” ita. Süla unie keze lie nu vo.

¹² Jonathan sie David ki, “Jihova Israel Kepenuopfü za se puya! Sodu hateiki morei zha se nhie a puo ketsoshü, sidi mhanuü puoe David gei keviu chütuoü ba zo ro, a süu ketsepie morei se n pesilie lhotuo memu?

¹³ Derei mhanuü a puoe n gei mha kesuo chütuoü le bata ro, Jihova bu Jonathan gei sükemhie morei sü kezie rei chüshücie, mhanuü a süu se n pesilie mota, mu n ketsewa moro, sidi n bu khrukhrekecüra volie mota ro. Jihova bu n ze tuolie, puoe a puo ze ketuo mhiei.

¹⁴ Mhanuü a tsie rei rhei ba zo ro, Jihova kekhrie pie a pekieshücie; derei mhanuü a siata ro,

¹⁵ n kedietho kekhrieu bu a kiu nunu lata hie zocie, mhanuü Jihova thuo kijüu zie geinu David ngumvümia kehoupuorei dathewa zo shierei.”

¹⁶ Hamhiei di Jonathan-e David kiu ze dietseidiekho chüshü di sie, “Jihova bu David ngumvüko pfhü se parkelieu chüliecie.”

¹⁷ Jonathan-e David bu puo khriekecü la rüse la; puoe puo thuo puo kerheiro khriekecü mhiei puo khriekecü la.

¹⁸ Jonathan sie puo ki, “Sodu sü khrüsa; n rükra batie, n chüu methuotaketuo la.

¹⁹ Siro kenuonhie, no tuo zo votacie; no thiedzü rüshü bakelie chüu nu la votacie, sidi ketsieu khieki baliecie.

²⁰ A theütsie ciepie mha vakeshü tuoi, tsie se cieshütuo.

²¹ Süsie a thepfumia yopuo ketseshütuo, di ‘Vo theütsieko pfhüliecie’ ishütuo. Mhanuü a thepfunuoyo ki, ‘Mehoshülie, theütsieko n khie hatsa zhü ho, süko chüliecie’ ishü ro, no la vorlie, kekreilamonyü, Jihova rhei ketuo mhie, n la khrukhrete mu kemichie ba mote.

²² Derei mhanuü a khriesayo ki, ‘Meholie, theütsieko n tse vote ho,’ ishü ro tataliecie; kekreilamonyü Jihova n ketsepie kepetse nu shüwate.

²³ Siro no mu a pukeshüu dzetsa liro, Jihova thuo avu donu kechachie la zhapuu chüshütuo,” sishü.

²⁴ Süla David lie nunu puo thuo puo kevie se bata. Siro khrüsa vorta tse, kediue theheu nu mhacütuoü ke balie.

²⁵ Kediu ke puo ba nu balie, kekrei teiki mhie, sozha khieki bau nu. Sitse Jonathan vor thalie, tsiu Abner-e Saul khieki balie; derei David bau we methuo bata.

²⁶ Saul sünhie die yopuorei pu mo; kekreilamonyü puoe lecü, “Mhapuo puo gei vorte mo ki shi; puo mesa mo bata mecie, ketho zo puo mesa mo bate,” iba.

²⁷ Derei zha kenie nhie khrüsa zhau sienhie, David chüu methuo lata. Sitse Saul sie puo nuou Jonathan ki, “Kiüdi Jese nuou thehe nu ndu rei thie rei vor mota ga?”

²⁸ Sitse Jonathan-e Saul die kela di, “David a ki Bethlehem nu votuoü cha beitelie;

²⁹ puo sie, ‘A bu vocie; kekreilamonyü a kikru nadiu nu ruosuo puo chütuo üya, mu a dzürieko a bu sünu ba morokesuo pute, süla tsie, mhanuü a n nei chülie üro a bu vo a dzürieko mehoshücie,’ itelie. Mhaca hau la puo kediu mizhüu gei vorlie mote.”

³⁰ Sitse Saul-e Jonathan gei puo noumeyiethor zota. Puo sie puo ki “No mharhi kemo thenu puo zho kesuo nuou! No, n thuo thenga chü rei, mu n zuo thuo puo nga whe motuo rei Jese nuou ya ba ücü a si mo üba me?

³¹ Jese nuou kijü zieu gei rhei ketuo chie no morei n kedi rei sedelie kenjü ze. Themia ketseshü di puo ze a ki vorliecie, puo bu sia petuo zotuo.”

³² Sitse Jonathan-e puo puo Saul die kela di, “Kiüdi puo dukhriwatuo üya ga? Puo kedipuo chüwata ga?”

³³ Derei Saul puo biewatuoü puo rüngou peyieshü; süla sünunu Jonathan-e puo puoe David dukhriwatuoü pepi se baketa silieta.

³⁴ Sidi Jonathan-e puo nei mo se di mizhü geinu sieta, di thekhrüu nu teisozha kenie nhie mhacü mota, puoe David la puo nousuo phita, mu puo puoe puo bie kethengakeshü la.

³⁵ Siro teisolie tse Jonathan-e David ze pethopie keba teiu ze lie nu tsu, mu thepfunuo yopuo puo ze tuo.

³⁶ Puoe thepfunuoyo ki, “Ta vo di theütsie a ciekeshüko pfhüliecie.” Mu thepfuyo takezhü ki, puo theütsie ciepie süyo mhotsa shüshü.

³⁷ Siro thepfuyo Jonathan theütsieko teketsu chüu tsolie tse, Jonathan thepfuyo kie la di sie, “Theütsieko n tse vota mo me?”

³⁸ Jonathan thepfuyo kie di, “Mhailie, rükrilie, thata hie.” Sidi Jonathan ze ketuo khriesayo theütsieko pa kengulie di se puo niepuu ki vor.

³⁹ Derei thepfuyo mhapuorei si mo, Jonathan mu David unie rübei mha hau dze kesi zo.

⁴⁰ Jonathan puo rünyieko khapie thepfuyo tsüshü di puo ki “Tuoshülie, hako pfü nadi nu volie.”

⁴¹ Sidi thepfuyo tuota mumetha David ketsie pfhepie keba khieki nu sielie di puo zie pesupie kijü zerepfü zhüta. Puo va se nuketsushü, sidi unie huohienuo mebo di kra bata; David kra pekrakuota.

⁴² Sitse Jonathan sie David ki, “N nou mene di tuotalie, kekreilamonyü avu kenienie rei Jihova za nu rüsewate, sidi sie, ‘Jihova bu avu donu, mu a seyie mu n seyie donu kechachie batuowe’ iwate ru.” Sidi puo sielie di tuota; mu Jonathan la nadiu nu vota.