Samuel Kerieu 2 - Angami Naga CL (Re-edited) Bible (BSI)

Hana Tsaliu

¹ Siro Hanae kecha chü sa di sie, “A noue Jihova geinu puo nei bate; Ukepenuopfü geinu a kekuo piesieshüte. A ngumvümia mho a tie chü kemeyakuoshüe, n kelakelie nu a nei baketa la.

² “Jihova kemhie Kemesa kekrei tuo mo, n rübei sie kekrei jü; úko Kepenuopfü kemhie Tsiekrie kekrei tuo mo.

³ Kelhiekecü die pu sa hietacie, kemelhacü die bu n tie nunu par sa hietalie; Jihovae kesikele Kepenuopfücü la, Puoe mia mhathoko mejüya.

⁴ Miavimiako theü bietshewa, derei meca kemomia kekuo se u chie phalie.

⁵ Ketshukelhuo chü kebako niekhrüda la u thuo u khapie zhakramia chü tuote, derei merü ketuoko we mha vakelieko pie u kelhuo chüliete. Nuojüpfü nuo thenie penuo; mu kekra kebapfü thedzükou bate.

⁶ Jihovae biekhrishü, tsiu chü perhei lashü; puoe mia ze Sheol nu tsu, tsiu se la siershü.

⁷ Jihovae chü pejüshü, tsiu chü penyishüya; puoe huo chü kerünuoshü, tsiu chü kerükrieshü.

⁸ Puoe nyophe nunu kejümia phou sesiershü; tsiu mige kepupie keba nunu ketsopfhümia piesieshü; puoe süko bu kedinuoko donu baketuo chüshü, uko bu therhu kayie wetuo üdi. Kijüu mvüdzeko Jihova gei bacü la, puoe kijüu chüpie süko gei shü.

⁹ “Puoe puo kemesako rüguolietuo derei kerüzhüko we dathepie kezei nu shüwatuo, miapuorei puokuopuohie nu thalie lhocü la.

¹⁰ Kehoupuorei Jihova kepetsoumia tseütsatatuo; Kerükrietho-u teigei nu teikese tuoishütuo. Jihova kijü vala ketso capi chütuo; puoe puo kediko chü pekuoshütuo, mu puoe kenhekelieu kekuo piesieshütuo.”

Eli Nuonie Kerüzhü

¹¹ Süsie Elkanae Rama nu puo kinu la vorta, derei unuoyo we Eli zievo-u ze Jihova lietho chü bata.

¹² Siro Eli nuonie ziezhü mothorta; unie gei Jihova rhukecü puorei jüta,

¹³ tsiu zievomiae themiako gei chüshü kezhüko rei üse mhaü mota. Sidi themia kehoupuo vor ruosuo chü di themuo be keba ki rei, zievo kituoue themuo rukecü rata sei puotie pro secü puo pie vor meya,

¹⁴ sidi süu se themuo li kehoupuo nu rei shü di themuo rukelie pete zievo-u thuo lielieya. Sidi unie-e Israelmia Shilo nu kevorko pete gei mhatho sükemhie chüta.

¹⁵ Sizomonyü chüshuo thekecü mhodzü rei zievo-u kituou vor di ruosuo kechü themiau ki, “Zievo-u bu the cüketuo la themuo khashücie, kekreilamonyü puoe n kinu themuo chakewau lielie lho, derei chürhei rübei lietuo,” siya.

¹⁶ Sidi mhanuü themiaue puo ki, “Chüshuo thewa periecie, di süsie nu n thuo pie kenyü de pieliecie,” iliro kituoue sie, “Lie lho, tsie khashüwalie, moliro a thuo n kemvü chü di chülietuo,” itaya.

¹⁷ Süla khriesanie kephouma hau Jihova mhiki zhathorta; kekreilamonyü unie-e Jihova ruosuo se kemethuo chüketa la.

Unuoyo Samuel Shilo nu Keba

¹⁸ Derei süki Samuel we nhicu zorei linen zievoboulie se puo chie phapfü di Jihova mhodzünu lietho chü baya.

¹⁹ Siro teiciekepra puo zuoe puo la boulie kerütshu yopuo chülie di puo nupfu unie ruosuo chütuoü kekhor ki kha puo tsütsüya.

²⁰ Siro Eli-e japie Elkana mu puo kimia unie tsü di sie, “Jihova bu thenu hapfüe cha di khapie Jihova tsü lakeshüu sou nu nuosenuoyie pelhoushükelieu chücie,” sidi unie tuo la kinu vorta.

²¹ Siro Jihovae Hana ngumezhieshü, sitse puoe nuonipfülie di thepfumia se mu thenumia kenie penuolie. Siro unuoyo Samuel-e Jihova mhodzünu zha miemie sielie.

Eli Kikru Kepetsou Die

²² Süki Eli-e tsatota. Siro puoe puo nuonie Israelmia pete gei kedipuo chü shikecü pete sishü, siro unie-e kedipuo mhie di dzüpfheki care nu chalie kechü thenumiako zezhüya shikecü dze si phreshü.

²³ Süla puoe unie ki, “Nnie kiüdi mha sükemhie chüya ga? A nnie themia hako pete gei mhatho kesuo kechü dze mia kinu site.

²⁴ Mota zo, a nuonie, a Jihova themiako kinu nnie dze kesi thedze kevi mo.

²⁵ Mhanuü mia puoe kekreiu gei jowa rei kekreimia puoe kephoumau la Ukepenuopfü ki chalie vi, derei miapuonie Jihova gei phouma ro supuonie puo zhapu ta?” Sizorei puo nuonie-e unie puo die rünyü mota. Jihovae unie dukhriwaketuo puo medoketa la.

²⁶ Tsiu Samuel-e phichü miemie sie di Jihova mu themia khrie rei pfülie.

²⁷ Siro Ukepenuopfü themia puo Eli ki vor di sie, “Jihovae pucü, ‘A n puonuo kinumiako Ijipt nu Faro kinu miadie chüketuo ki a thuo a pie uko pengu kemecie tsuoishü mo üme?

²⁸ Ae Israel seyie pete donu puo kedapie a zievo chütuoü, a ruosuoba gei ruosuo khashütuoü, kethengu thetuoü mu a mhodzünu zievoboulie se ituoüshü. Siro ae Israelko ruosuo kechü vie mi nu thekecü pete pie n puo kinumiako tsüshü.

²⁹ Di siro no kiüdi a kinu ruosuo khakeshü vieko mehou hi zota ga? Siro kiüdi a ki rei n nuonie rhukuo di a themia Israelkoe ruosuo khakeshü pete nu kevithoko kedase nie thuo nie chü peluo bata ga?’

³⁰ Süla Jihova, Israel Kepenuopfüe puya, ‘A n kinumia mu n puo kinumia bu kechachie a mhodzünu tha di chalie chütuo;’ ishü ketho zo. Derei tsie Jihovae puya, ‘Süu bu a kinu pecietacie; a tsie we a rhuyakezhamia rhutuo, mu a peseyakezhamia se mhatho mo ütatuokecü la.

³¹ Harie, puoteiu vorzhie, süki a n kekuo mu n puonuoko kekuo dathewatuo, sidi n kinumia donu ketsamia puo bu rei sierlie lho.

³² Sidi no a kiu nu thedzükekou chü di Israel gei mha kevi theja khakeshüko mehou di mehotuo, mu n kinu zowe miapuorei lhou puotei cülie lho.

³³ Siro a ruosuoba geinu chüwa kemo n themiau zorei puo bu puo noukesuo mhidzü pekru mu puo melou nunu thekrü chütuo, n kikru nu mia pete rei zhiecha se chütuo.

³⁴ Siro n nuo Hofni mu Finehas unie khunhie vachü siatuo, mu süu n la zasi puo chütuo.

³⁵ Tsiu ae kemiatho zievo puo sesiertuo, mu puoe a kelekemedo mhiei chü di chalie chütuo. Siro ae ki ba toulieketuo puo chüshü puo tsütuo, sidi puoe kechachie a kenhekelieu mhodzü thatuo.

³⁶ Siro n kinu peshakelie pete rei vor raka morei niekhrüda yopuo zorei cha di sie, A khapie zievoko mia puo mhatho nu shücie, sidi a bu kecüca huoyo rei ngu cücie,’ ituo.”