Samuel Kerieu 19 - Angami Naga CL (Re-edited) Bible (BSI)

Saul David Dukhriketuo Rhüketa

¹ Saul-e David biewaketuo rhükeba se puo nuou Jonathan mu puo khro kezhako ki pushü. Derei Saul nuou Jonathan-e David ngu puo neithor,

² süla puo David ki, “A puo Saul-e n biewaketuo le bate ho, süla no soduü n kireiliecie, sidi mharapuo rüshü bataliecie.

³ A a puo ze di n keba lieu nunu n la puo ze kerüchütuo, sidi a sikelieko se n ki pushütuo.”

⁴ Jonathan-e David kevi dzeko pie puo puo Saul ki pushü di sie, “Kediu bu puo kituou David gei phoumawa hie zocie, puo n gei kejo puorei chü mo zocü la, sikecüumonyü puo chükeshüko n la vithor zo.

⁵ Puo puo phou khrie mo zo di Filistinko dukhrishü, mu Jihovae Israelko la kuokelie kezha phi khashüe. No rei süu ngu di n nei zo. Di siro kiüdi puoca kejü nu mu kejo kejü David dukhri di phoumatieya ga?”

⁶ Sitse Saul rei Jonathan die rünyülie mu rüse zo di sie, “Jihova rhei ketuo mhie a puo dukhriwalie lho zo,” sita.

⁷ Süla Jonathan-e David kielie di mha süko se puo ki pushü. Sidi Jonathan-e David ze Saul ki la vorshü, sidi puoe hadzü tuoi Saul ki nu ba lata.

⁸ Situo di Filistinko ze terhü tei puo la vorta. Süki David-e vo di Filistinko ze terhü chü. Ru puoe süko dukhri sewa, sidi uko bu puo mhodzünu ta phi.

⁹ Derei Jihova kinu kesuo ruopfü vor Saul kebi lalie, mu puoe puo dzie nu rüngou pie ba, siro süki David-e puo mhodzünu bazha khou ba ru,

¹⁰ Saul-e puo ngou peyiepie David tshiepie sozha gei shüwatuoü sie, derei David-e süu rüdalie di rüngouu sozha gei tshiepfü zhata. Sidi süzhü David ki nunu talie di tuota.

¹¹ Sitse Saul-e khise David biekewa le di puo themia ketsepie David ki shü di puo la bata. Derei David kimia Mikal-e puo ki, “No tsiezhü talie di n phou kelalie moliro, sodu n biewatuoü bate ho.”

¹² Sidi Mikal-e khirki nunu David peteshü di puo bu tapralie di tata.

¹³ Sitse Mikal-e terhuorhi puo pie thezhü nu zhülie tsiu temvümie kezüpie tsükhe nu shüwa di pfhe pie whewa.

¹⁴ Süki Saul-e themia ketseshü di David telietuoü vor tse Mikal sie, “Puo suo batelie” isiwata.

¹⁵ Derei Saul puo themiako ketse la di uko bu uko thuo vo David mehoshünu di sie, “Puo zhü nunu puo pie vorliecie, sitse a puo dukhriwatuomu,” sita.

¹⁶ Süla uko kinu tuo le ru, terhuorhi puo mu temvümie kezipie puo tsü chüpie zhü ngulie.

¹⁷ Sitse Saul Mikal ki, “No kiüdi hakemhie chü di a sewa di a ngumvüu bu tata ga?” Sitse Mikal Saul die kela di, “Puo a ki, ‘A bu tuotalie, kiüdi a bu n dukhriwatuo ga?’ sitelie.”

¹⁸ Siro David-e ta la parlie di tuose Rama nu Samuel ki vor di Saul puo gei chükeshü pete pie puo ki pushü. Sitse puo mu Samuel unie rüdei se Naiot nu vo lhou bata.

¹⁹ Süki mia “David-e Rama nu Naiot nu ba ho,” ishü.

²⁰ Süla puoe David telietuo üdi puo themia ketseshü. Derei ukoe siedzekesi kro puo Samuel bu krüta chü di siedzedie pu ketha ngushü tse, Ukepenuopfü Ruopfüu Saul themiako gei rei vorta, sidi uko rei siedzedie puta.

²¹ Saul-e süu sishü tse, puo themia ketse sashü, ru süko rei siedzedie pu lata, süsie Saul-e va seu themia kekrei ketse lashü, süko rei siedzedie pu lata.

²² Thelatho-u puo thuo Rama nu votuoü tuoshü. Sidi puo Seku nu dzükhou kezhau khieki vorlie di sie, “Samuel mu David unie kirapuo ba ga?” idi ketso. Sitse mia puoe sie, “Harie Rama, kijü nu Naiot nu ba ho.”

²³ Süla Saul-e Rama nu Naiot nu vor, siru Ukepenuopfü ruopfüu puo gei vorta, sitse puo Naiot nu vorlie kemochie tuo phi mu phi di siedzedie puta.

²⁴ Sidi puoe puo pfhenei rei rhuowa di Samuel mhodzü nunu siedzedie pu tuota. Sidi puoe sünhie zhate mu teizeizha pete methuo zhü tso. Hau la, “Saul rei siedzekesiko donu mia puo me?” ita.