Samuel Kerieu 18 - Angami Naga CL (Re-edited) Bible (BSI)

Jonathan mu David Unie Dietseidiekhokelie

¹ Sidi David-e Saul ki die pu tseiwa tse, Saul nuou Jonathan-e David ngu puo neithorta di David khriepie puo thuo puo kekhrie mhieita.

² Tsiu sünhie yawinu Saul-e David zelie di puo bu puo kinu la vo mota.

³ Sidi Jonathan-e David ze dietseidiekho puo chülie, puoe David khriepie puo thuo puo kekhrie mhie zotakecü la.

⁴ Süki Jonathan-e puo thuo se keba puo boulie rhuolie di khapie David tsüshü, tsiu puo terhü boulie, puo zhiecha, puo theü mu puo chiepha rei pie David tsüwa.

⁵ Siro David-e Saul puo ketsekeshü mhatho pete nu chükhrielielieta. Sitse Saul-e puo khapie puo rüpfhünuo mhokezha chüwa. Tsiu themia pete, Saul kituoko pete rei süu u medolie.

Saul-e David Ngu Puo Roketa

⁶ Siro David-e Filistin-u geiwa di rüpfhünuoko pete ze kinu la vorkezhü ki, Israel rüna pete nu thenukoe tambourin se kenei tsaliko chü, bazha kekreikecüko se mu nashü idi kediu Saul ze kesetuoü par.

⁷ Mu ukoe thepfhe chü kephipra di, “Saul-e nyienyie dukhri, mu David we nyie kerür dukhri” ituota.

⁸ Sitse Saul-e süu sishü puo nou meyiethorta di puoe sie, “Ukoe David üse nyie kerür, mu a zowe nyienyie rübei pute, puoe kedibau mo di kedipuo lie nyü batuo mu?”

⁹ Sidi sünhie yawinu Saul-e David ngu puo ro sedeta.

¹⁰ Süsienhie Ukepenuopfü kinu kesuo ruopfü puo vor Saul kebilieta, mu puoe ki nunu kemerie chü bata, süki David-e teisonhie chükezha tuoi puo bazha khou ba. Tsiu Saul-e puo dzie nu rüngou puo pie ba ru,

¹¹ puoe rüngouu kelhoupie David tshie, puoe lecü, “A David tshie pie sozhau mawatuo,” iketa la. Sidi puoe va kenie rüngou pie puo tshie. Derei David-e puo mhodzü nunu va kenienie therhie phrelie.

¹² Saul-e David preivüta, Jihovae Saul khawa di David ze tuoketa la.

¹³ Süla Saul-e puo ki nunu David ketsewa di puo bu nyiemhokezha chüta, tsiu puoe puo rüpfhünuo krüta chü di terhü nu vo.

¹⁴ Mu David-e puo kevo pete nu kuo phrelielieta, Ukepenuopfüe puo ze tuoketa la.

¹⁵ Saul-e David kuokelie mhathoko sishü tse, David prei kechükuota.

¹⁶ Sirei Israelko mu Judamia pete David ngu u neita, puoe uko krüta chü pra mu le baketa la.

David-e Saul Nuopfü Liekelie

¹⁷ Tsiu Saul-e David ki, “Harie a nuo nuoriepfü Merab haki ba ze, no thepfu se mu Jihova la terhü chüshülie ro a puo bu n kimia chütatuo.” Saul-e puo nou nu le di, “A a dzie pie puo gei shü morei Filistinko bu puo biewatuo,” ikecü medokecü la.

¹⁸ Derei David sie Saul ki, “A supuo mu? morei a kikru mu a puo chienuo Israel nu kedipuo di a kediu nyau chülie sütuo dimu?”

¹⁹ Si ba di Saul nuopfü Merab-e David ki nyiketuo tei penuo vorlie tse, puo penyhüpie Meholatmia Adriel ki shüwata.

²⁰ Sirei Saul nuopfü Mikal-e David ngu puo neithorta. Mu süu Saul ki pushü tse puo neita.

²¹ Sitse puoe mharhü la di, “A hapfü pie puo ki penyishütuo, sidi puo bu David la kebie puo chütuo, siliro sügeinu Filistinko dzie nunu puo dukhriwatuo.” Süla Saul-e David ki pu la di, “N bu a nyau chü zotuo,” sishü.

²² Süsie Saul-e puo liethoko ki, “Vo di David ki hamhiei di pekhre pucie, ‘Harie kediu mu puo kituoko pete n ngu u nei mu n khrie bate, süla tsie puo nyau chülieketuo puo nuopfü lielietacie, ishüliecie.’ ”

²³ Kituoko Saul die se vor David ki pushü. Derei David sie, “Kediu nyau chüketuo nie mha kecü puoü ba me? A sü kejümia mu mhathomharo puo moe!”

²⁴ Sitse kituoko David dieko se vo Saul ki “David sidi puyalie,” ishü.

²⁵ Ru Saul la sie, “David ki pushücie, ‘Kediu thenyhü sa puorei lie nyü ba mo, derei süu sou nu puo ngumvümia gei puo khepu lieketuo la Filistinmia mia krie puo zhüre se vorshünu ükecü pushücie,’ ” ishü. Saul lekecü, David-e terhü nu Filistinmia bu puo biewaketuo do rhükecü la.

²⁶ Sidi kituokoe die hako pie David ki pushü tse, David-e kediu nyanuo chüketuo puo medolie. Süla puotei chiekeshüko tseiketa mhodzü,

²⁷ David-e puo themiako zelie di vo Filistinmia mia krie kenie dukhrilieta. Sidi puoe süko zhü repfü vor di phrüpie puo tsüshü, puo bu kediu nyau chülieketuo la, sitse Saul puo nuopfü Mikal pie David ki penyishüwa.

²⁸ Derei Saul-e Jihova David ze ketuo silie mu puo nuopfü Mikal-e David ngu puo neiketa ngulie tse,

²⁹ Saul-e David prei kechükuo sata, süteiki nu Saul-e David ngumvü chüta.

³⁰ Siro Filistin kezhako terhü chütuoü parkuo phiya, mu uko parkecüko nu David-e Saul khro kezhako ki rei kuo pevikuolielieta, sidi David-e themia pete mhodzü meyie phita.