Samuel Kerieu 16 - Angami Naga CL (Re-edited) Bible (BSI)

David Kedapie Kedi Chükelie

¹ Jihovae Samuel ki, “No kedithechiepuo Saul la n nousuo batuo ga? A puo bu Israel mho kedi kechü meliewata üro? Tier pie n hiekia tshulie, sidi tuoshülie, a n ketsepie Bethlehemmia Jese ki shütuo; kekreilamonyü a puo nuoko mia puo bu kedi chütuoü kedapie bate.”

² Derei Samuel-e sie, “A kikidi volie ta? Saul-e hau si ro a dukhriwa zotie.” Jihovae puo ki pu la di, “No thuünuo yopuo ze volie di sie, ‘A ruosuo chüpie Jihova tsütuoü vorwe,’ siliecie.

³ Sidi Jese kiepie ruosuo kechü nu shüliecie, sitse a n bu chüketuou tha n kieshütuo, mu noe tier pie ae thakeshüu kenhepie a tsüwatuo.”

⁴ Sitse Samuel-e Jihova kepu kemhiei chüwa di Bethlehem nu la vorlie. Sitse rüna phichükoe pe zo di puo ki vor di sie, “No noune se vorzhü zo mo?”

⁵ Sitse puoe sie, “Uwe, noune se di voryawe, a ruosuo chüpie Jihova tsütuoü vorzhüwe; nie chü kemesalie, di a ze ruosuo kechüu nu vocie.” Sidi puo Jese mu puo nuonuoko chü kemesalie di uko kiepie ruosuo kechüu nu shü.

⁶ Sidi ukoe vorlieta tse, puoe Eliab mehoshü di, “Jihovae kenhekelieu sü Jihova mhodzünu tha toute,” isitha.

⁷ Derei Jihovae puo ki, “Chazou kenguu mehota hie, morei puo da kerükrie mehota hie, kekreilamonyü, a puo khawate. Jihovae themia mha kemeho mhiei mehoya mo. Themia we chazou miau mehoya, derei Jihovae thenouu mehoya.”

⁸ Süsie Jese-e Abinadab kieshü, sidi puo bu Samuel mhodzünu phi. Derei puoe sie, “Jihovae hau rei kedalie mote.”

⁹ Süsie Jese-e Shama bu Samuel mhodzünu phi, derei puoe sie, Jese ki “Jihovae hau rei kedalie mote.”

¹⁰ Hai di Jese-e puo nuonuo thepfu thenieko bu Samuel mhodzünu tuo phi, derei Samuel-e sie “Jihova hako puorei kedalie mote.”

¹¹ Sitse Samuel-e Jese ki, “N nuonuo hako rübei zo me?” Ru puoe sie, “Tsie rei kemedzütho-u baluo, derei puoe tekuo pfhe tuoyalie.” Sitse Samuel-e Jese ki, “Mia ketseshü di puo ze vorliecie, mu puo vorlie kemochie hieko ke balie lhote.”

¹² Sidi puoe mia ketseshü di puo ze vor, ru harie puochü ngu kemesa, puo mhi zivi mu ngu zhü secü puo. Sitse Jihovae sie, “Sielie di puo kenheliecie, themia hau ho,” sita.

¹³ Süla Samuel-e tier hiekiau nu kebau chülie di puo dzürieko mhodzü nunu puo kenhelie, sitse sünhie yawinu Jihova ruopfüu David gei kuo phi vorta. Süsie Samuel-e sielie di Rama nu vota.

David-e Saul Lietho Kechü

¹⁴ Siro Jihova Ruopfüu Saul geinu lata, sidi Jihova kinu kesuo ruopfü puo vor puo kebilie.

¹⁵ Sitse Saul kituokoe puo ki, “Harie Ukepenuopfü kinu kesuo ruopfü puoe n kebi se bate.

¹⁶ Hieko niepuu bu diekhashü n kituoko tsü di uko bu harp pe kesimia puo pfhücie. Sitse Ukepenuopfü kinu kesuo ruopfüu n gei kevor ki puo süu peshüshü ro no vilietuo.”

¹⁷ Süla Saul-e sie puo kituoko ki, “Tsie vo di bazha pe kesimia puo pfhü se a ki vorshücie.”

¹⁸ Sitse kituoko mia puoe sie, “Harie a Bethlehemmia Jese nuo puo, bazha pesi sekecü puo ngu, puoe terhümiavimia puo mu kuo se. Puo mhakesi die puya, mu ngu zivi pere zo. Siro Jihova puo ze tuo.”

¹⁹ Sitse Saul-e mia ketsepie Jese ki shü di sie, “N nuou David, tekuo pfheyakezhau ketsepie a ki shücie.”

²⁰ Sitse Jese-e gada puo gei niekhrüda, khubedzüpou puo mu temvünuo puo se puo pie dashü David tsü di puo ketsepie Saul ki shü.

²¹ Sidi David-e Saul mhodzünu vor thalie tse, Saul-e puo ngu puo neithorta, sidi David bu puo rünyie kepieu chüta.

²² Siro Saul-e mia ketsepie Jese ki shü di puo ki, “A David ngu a neithorte, mu puo bu a lietho nu ba zotacie,” sita.

²³ Siro Ukepenuopfü kinu kesuo ruopfü Saul gei vor puo kebilie ro, David-e puo harp chü pielie di peshüshüya; süki Saul-e mecielie di vitaya; tsiu kesuo ruopfü puo geinu pratataya.