Samuel Kerieu 15 - Angami Naga CL (Re-edited) Bible (BSI)

Saul-e Amalekko Ze Terhü kechü

¹ Siro Samuel-e Saul ki, “Jihovae a ketseshü di a bu n kenhepie Israel mho kedi chüshüte. Süla tsie Jihova dieko rünyüliecie.

² Krodiko Jihovae puya, ‘A Amalekmia pechüshütuo, ukoe Israelko Ijipt nunu kepar ki uko chadze di uko petsouketa la.

³ Süla tsie kho Amalekmia whuocie, sidi uko peka lotsowalie, uko keba pete rei pekawaliecie. Miapuorei peshashü hie, thepfu mu thenu, phichünhicu mu mithu, tekuo, ut, mu gada pete dukhriwalie.’ ”

⁴ Süsie Saul-e puo themiako kie kengupie Telaim nu shülie, mu süko phrü kesie thephi rüpfhünuo lakh kenie mu Juda themia nyie ker.

⁵ Sidi Saul-e puo themiako ze Amalekko nadi nu khorlie di süu reketuo la razha nunu pfhe zhü.

⁶ Sitse Saul-e sie Kenmiako ki, “Nieko Amalekmia donunu tuotaliecie, moro a uko pekakecü ki nieko rei sa pekawatuo, Israelko Ijipt nunu kepar ki niekoe Israelmia pete ngumezhiekeshü la.” Sitse Kenmiako Amalekko ki nunu tuota.

⁷ Sidi Saul-e Havila nunu vo Ijipt kijü niathutsa keba Shur ketso Amalekko biewa.

⁸ Tsiu puoe Amalekko kediu Agag perhei telie derei zhiecha pie keshako pete dukhriwa.

⁹ Sidi Saul mu puo themiakoe kediu Agag mu thudo, tekuonuo siro mithunuo keluoko mu vi ükecüko pete peshalie, sirei ukoe lie nyü kemo puoma kejüko pete peka lotsowa.

Jihovae Saul Kedi Meliekewa

¹⁰ Süsie Jihova die Samuel ki vor di puo ki,

¹¹ “A Saul pie kedi chükeshü la a rünou mote, puoe a siekemedzi nunu tsiesiete, di a diekhakeshü ze mote.” Sitse Samuel-e süu la puo nei mota, sidi puoe teizeizha pete Jihova ki kra ba tso.

¹² Süsieduü Samuel-e rüna sielie di Saul ze kesetuoü vo, derei mia Samuel ki “Saul-e Karmel nu vo di, sünunu puo za nu kuokelie zasi tsie puo seshü di tuo Gilgal nu tsute.”

¹³ Mu Samuel-e vor Saul tsolie tse Saul-e puo ki, “Jihova bu japie n tsücie, a Jihova diekhakeshüko chü tseiwate.”

¹⁴ Derei Samuel-e sie, “Siro a nyieto nu tekuo keruo pfhe mu mithu kemo pfhe hako kiüta ga?”

¹⁵ Sitse Saul-e puo die kela di, “Ukoe Amalekmia dzie nunu hako se vor, ukoe tekuo mu mithu kevithoko pie n Kepenuopfü Jihova ki ruosuo khashütuo üdi peshalie, derei keshako we peka lotsowate.”

¹⁶ Samuel sie Saul ki, “Thalie, nzhü Jihovae kedipuo a ki pu shiü a se n ki pushütuo.” Sitse Saul rei sie “Pushüliecie,” ishü.

¹⁷ Sitse Samuel sie, “No n mhiki n le pecü balie vi, derei no Israel seyie krütau chü ba mo üme? Mu Jihovae n kenhepie Israel mho kedi chüshü zo.

¹⁸ Sidi Jihovae puo lietho puo la n ketseshü di, ‘Vo kephouma Amalekko peka lotsowacie, uko peka tseiwa kemochie süko ze terhü chücie,’ ishüe.

¹⁹ Siliro no kiüdi Jihova die ze mota ga? Mu kiüdi kepeka vieko se n medo chü di Jihova mhodzüki mha kesuo hako chüta ga?”

²⁰ Sirei Saul-e sie, “A Jihova dieze chü zo, puo a ketsekeshü mhiei a vo di Amalekko peka lotsowa mu kediu Agag teze vorta zo.

²¹ Derei rüpfhünuokoe mha pekakelie nu tekuo mu thudo, siro vi ükecüko pete pieliete, sidi süko se vor Gilgal nu n Kepenuopfü Jihova ki ruosuo khashütuo üte.”

²² Sitse Samuel-e sie, “Jihova pfhe zekecü ki rei kethe ruosuo, tsiu ruosuo khakeshüe vikuo üte me? Dieze ruosuo ki vikuo, siro kerünyüe tekuochü keluou ki vikuo;

²³ Siro mia petsoukecüe themoukecü kephouma mhie zo, tsiu u nou kekhrüe mha kesuo kechü terhuorhi kerüsuomia mhie zo. Noe Jihova die meliewaketa la, puo rei n kedi meliewate.”

²⁴ Sitse Saul-e Samuel ki, “A phoumawate, a Jihova die mu n die vajowate. A a themiako preiketa la uko medo-u chüwate.

²⁵ Süla tsie n ki chaya, a kejo vashü di a ze vocie, sidi a bu rei Jihova rüsuocie.”

²⁶ Derei Samuel sie, “A n ze volie lho. No Jihova die meliewaketa la, tsiu Jihova rei n bu Israel mho kedi kechü meliewate.”

²⁷ Sidi Samuel tuotatuoü rüreishü tse, Saul-e puo pfhephrie teshüshü ru cierhawata.

²⁸ Sitse Samuel-e sie puo ki, “Thie yawinu Jihovae n geinu Israel kedi cierhawate, sidi khapie n zanuomia n ki vikuokecü puo tsüwate.

²⁹ Israel zayieu tijü morei rüdirüli lho, puo themia tuoi puo nou rüdirüliketuomia mokecü la.”

³⁰ Derei Saul-e sie, “A phoumawate, sizorei a n ki chaya, no a themia phichüko mu Israel mhodzünu a rhushü zocie, sidi a ze vo a bu n Kepenuopfü Jihova rüsuolieketuo la.”

³¹ Süla Samuel-e rürei lalie di Saul siemedzi vo, di Saul bu Jihova rüsuo.

³² Süsie Samuel-e, “Amalekko kediu Agag ze hanu a ki vorcie.” Sitse Agag-e michie se di vor. Puoe lekecü, “Kesia prei keba sü vor toute,” itha.

³³ Derei Samuel-e sie, “N zhiechau geinu thenupfümia nuonuo bie pejükewa tuoi, n zuo rei thenumia donu nuojüpfü chütatuo.” Sidi Samuel-e Gilgal nu Jihova mhodzünu Agag dukhripie khrie phaphawa.

³⁴ Süsie Samuel-e Rama nu khota, derei Saul-e Gibia nu puo ki nu vota.

³⁵ Siro Samuel-e puo se ketso vo Saul ngu la mota, derei Samuel-e Saul la puo nousuo phi. Tsiu Jihovae Saul pie Israel mho kedi chükeshü la rünou mota.