Samuel Kerieu 13 - Angami Naga CL (Re-edited) Bible (BSI)

Samuel-e Saul Kerhiekeshü

¹ Saul-e kedi chükelie ki puo kelhouzha cie serta, mu puoe cie hiediaekenie Israel mho kedi chü.

² Saul-e Israelmia nyie se kedalie; mia nyie kenie Mikmash nu puo ze ba mu Bethel chazoukhru rüna gei sa, siro mia nyie puo ketsepie Benjamin rüvie Gibia nu Jonathan ze bata. Puoe kekreiko we mia puopuo di ketsepie u thuo u kinu shüwa.

³ Tsiu Jonathan-e Geba nu keba Filistin rüpfhünuo kro puo pekawa, mu Filistinko süu sishü. Siro Saul-e kijü peteu nu ketsü khoushü di sie, “Ibriko bu hau siliecie.”

⁴ Israelmia pete rei Saul-e Filistin rüpfhünuo kro puo penyükewa, mu Israelkoe Filistinko pesekeshü dze sishü, sitse themia kekielie di pete vor Gilgal nu Saul ze thalie.

⁵ Siro Filistinko rei Israelko ze kegeituo üdi, kierbagei nyie ser, kierkese themia nyie sorou mu themia krapie dzükezha khie huocanyo mhiei zocü keselie, di ukoe Bet-aven niathutsa Mikmash nu razhü chü balie.

⁶ Tsiu Israelmiakoe ngumvümiako uko houpfü keba ngushü tse uko noukemezhieta (kekreilamonyü rüpfhünuo geteiketa la), süla uko vo tsiepfüko nu, keciekiko nu, tsiekrieko nu, mekhruko nu, mu dzükhouko nu rüshü bata.

⁷ Mu Ibriko huomia Jordan cie se Gad nu Gilid kijü nu rei vota. Saul we süki zorei Gilgal nu ba zo, mu themiako michie pe zo di puo ze bata.

⁸ Siürei Samuel-e chiekeshü mhiei puoe zha thenie puo pfhe ba, derei Samuel Gilgal nu vor mota, tsiu Saul themiako rülili di rüzu jü vota.

⁹ Süla Saul-e sie, “Kethe ruosuo mu vitho ruosuo se a ki vorshücie,” sidi puo kethe ruosuou khashüwa.

¹⁰ Sidi puoe kethe ruosuou khashüwa mumetha, Samuel vor tsolie, mu Saul-e puo kelutuoü puo ki phi.

¹¹ Sitse Samuel-e sie, “No kedipuo chüwata ga?” si. Saul-e puo ki, “Themiako a khawa di ta sedeketa ngute, siro no rei puotei chiekeshü nu vorlie mote, tsiu Filistinkoe vor Mikmash nu razhü chü baketa ae ngushü,

¹² süla a, ‘Filistinko tsie mu tsie tsur a whuolie vite, mu süki ae Jihova medo rüsa moluo;’ idi lete, süla a bu molie kenjü di kethe ruosuo puo chüshüwate.”

¹³ Sitse Samuel-e sie, Saul ki, “No kenya mhatho puo chüwate, noe Jihova n Kepenuopfü n bu chünukeshü diekhakeshüko zelie mote, no süko chülieücüwe Jihovae tsieha n kedi chüpie Israel mho kechachie bawatuomu ru.

¹⁴ Derei tsie we n kedi kechü ba salie lhote, Jihovae puo nou kele mhiei di mia puo kedaliete, sidi puo bu Jihova themiako krüta chütuoü bate. Kekreilamonyü noe Jihova die kha n ketsüko chüüzelie mote eru.”

¹⁵ Sidi Samuel-e Gilgal nunu tuota. Siro themiako Saul rüpfhünuo chütuo üdi puo siemedzita; ukoe Gilgal nunu tuose Benjamin kijü Gibia nu vota. Süki Saul-e puo ze ketuo themiako phrü sie ru süko mia krie sorou tuo.

Terhü la Dojükecü

¹⁶ Sidi Saul mu puo nuou Jonathan siro themia unie ze ketuoko pete Benjamin kijü nu Geba nu bata, mu Filistinko rei, Mikmash nu bata.

¹⁷ Siro Filistin rüpfhünuoko mha pekatuoü kro se chü di par, süko kro puo Shual kijütsa Ofra kevotsa,

¹⁸ mu kro kekreiu Bet-horontsatie, siro kro seu rayha kevatsa Zeboim razhau kengu tierie chautsa vota.

¹⁹ Süki Israel kijü pete nu rükreimia puorei tuo mota, kekreilamonyü Filistinkoe, “Ibrimia bu zhiecha mu rüngou chü suotuo zo” ibaketa la.

²⁰ Sidi Israelmia pete rei Filistinko ki tsu di zhie, kathi, seidurü mu zhiepfhinuoko ü chü.

²¹ Siro uko kathi mu zhie ü kechü zha shekel se-zakenie tsiu seidurü, zhiepfhinuo mu thegithe ü kechü la shekel se-zapuo pie chü.

²² Sidi terhü chüketuo nhie Saul mu Jonathan unie dzie nu zo kemosie, unie ze keba rüpfhünuoko mia puo dzie nu rei zhiecha morei rüngou puorei ba ngulie mota. Derei Saul mu puo nuou Jonathan dzie nu we ngulie.

²³ Sitse Filistin chüpahi-e Mikmash chau ze prata.