Samuel Kerieu 12 - Angami Naga CL (Re-edited) Bible (BSI)

Samuel Die Thelako

¹ Siro Samuel-e Israel pete ki pu di sie, “Harie nieko a bu chünukecüko chüshüwate, sidi nieko mho diketuo puo khashüwate.

² Mu tsie nieko kediu bu nie cha thatuo. A zowe tsate mu a tsü rei rüpoute, sirei a nuonuoko we nieko ze ba zo. Tsiu a a nhicu nunu vor thie ketso nieko cha tha vor.

³ Siro harie, a haki baba ze, nieko huomia a gei kenyakecü huo nyi me? Jihova mhodzü mu kenhekelie kediu mhodzünu pushüliecie. A mia thudo lielie me? morei huomia gada lielie me? A huomia sewa me? A supuo pesewa ga? morei a supuo dzie nu theso lielie di süu bu a mhi bie peciewaü ga? Sikecü huo nyi üro tsie pushülie, siro a tsie süu chü kemezhüwatuowe.”

⁴ Sitse ukoe sie “No hieko sewa mo, morei hie pese rei mo mu mia puo dzie nu rei theso lielie mo.”

⁵ Siro Samuel sie, “Nieko a geinu kekrükecü ngulie mo ükecü Jihova mu kenhekelie kediu rei thie a zhapukota zo.” Siru ukoe sie, “U zo, puo sü u zhapuu zo,” sita.

⁶ Siro Samuel-e themiako ki pu sa di, “Mosa mu Aron kedakelieu Ijipt nunu nie puonuoko ze parkeshüu sü Jihova zo.

⁷ Süla tsie nie tha nu tha zolie, sidi a bu Jihova mhodzünu Jihovae nieko mu nie puonuoko gei kemiatho mhatho kezha chü di nieko kela ze vorkeshü dze pete nie ki pushüthie.

⁸ Jakob mu puo kinuko Ijipt nu tsukelie ki Ijiptmiako uko pese seta, sitse nie puonuokoe Jihova ki rükhruoshü ru Jihovae Mosa mu Aron unie ketseshü, di unie bu nie puonuoko ze par di uko bu thechü hanu lhoulie.

⁹ Derei ukoe Jihova uko Kepenuopfü rükra mota, süla puoe uko zepie Hazor rüpfhünuo mhokezhau Sisera tsiu Filistinko mu Moabmia kediu tsüshü di uko bu uko ze terhü chü.

¹⁰ Süki ukoe Jihova ki meheimelo di sie, ‘Hieko phoumawate, hieko Jihova khawa di vo Baalko mu Ashtarotko lie chü tuote. Derei tsie ngumvümia dzie nunu hieko kelashücie, sitse hieko n lie chütatuowe.’

¹¹ Sitse Jihovae Jerubal, Barak, Jeftha mu Samson uko ketseshü, sidi puoe nie ngumvümia lutsahatsa pete dzie nunu nie shüphrashü di nie bu kemichie kejü nu lhou.

¹² Sirei Ammonmia kediu Nahash vor nieko perhietuo üta ru Jihova nie Kepenuopfüe nieko mho di ba zo ürei nieko a ki, ‘Molie, kedi puo bu hie mho di zocie,’ site.

¹³ Süla tsie we harie, niekoe kedakelie kediu mehoshücie, Jihovae kedi puo khapie nieko mho shüshüte ho.

¹⁴ Mhanuü niekoe Jihova preilie di puo lie chü, puo die ze, siro puo diekhakeshüko petsouta molie liro, tsiu nieko mu nieko mho di kebau rei Jihova rhulie liro mha pete puotou volietuo.

¹⁵ Derei mhanuü nieko Jihova die ze mota, mu puo diekhakeshüko petsouta liro, puoe nie puonuoko perhieketa tuoi nieko rei perhietatuo.

¹⁶ Süla tsie tha zolie di Jihovae nie mhinguki nu mha kezha chüshütuo ükezha mehoshücie.

¹⁷ Thie thoulha lieyie teisozhau mo üme? A Jihova kieshütuo, sitse puoe tei bu se mu rüshü, süze niekoe Jihova ki kedimia puo chakecü puo mhodzünu phoumathorketa silietuo.”

¹⁸ Sidi Samuel-e Jihova kieshü, sitse sünhie Jihovae tei bu se mu rüshü, ru themia pete Jihova mu Samuel preipie mhapuochüta.

¹⁹ Tsiu themia pete sie, Samuel ki, “N kituoko bu siata molieketuo la n Kepenuopfü Jihova ki chacie, kekreilamonyü hiekoe kedimia puo cha di hau pie hie kephouma kekreiko chü pekraliete.”

²⁰ Süki Samuel-e themiako ki, “Michieta hie; nieko mha kesuo chüwata zo, sirei Jihova therhieta hie, derei nie melou pete se Jihova lie chü zolie.

²¹ Nieko kemethuo rhuoko sie whuota hie süko mha kevi puorei chüshülie lho morei nie kelashülie lho, sükoe kemethuo zocü la.

²² Jihovae puo die phrashüte, mu puoe puo themiako khawalie lho, Jihova nieko bu puo themia chüketuo puo medoliete.

²³ Tsiu a la zo we a bu nieko la cha sei balie mota di Jihova gei jowa hie üthienyü. Siro harie a mha keviu mu kemezhüu thashü nieko pekietuo.

²⁴ Jihova khrüprei zolie di nie melou pete se dietho di puo lie chülie. Sidi puoe mha kezha kedithede nie la chüshüte shi leshücie.

²⁵ Derei nieko phouma tha zocü sie nieko rei mu nieko kediu rei pekawatuo.”