Samuel Kerieu 11 - Angami Naga CL (Re-edited) Bible (BSI)

Saul Ammonko Penyükewa

¹ Thekhrü puo mese sie, Ammonko kediu Nahash-e puo rüpfhünuo ze kho Gilid nu Jabesh nadiu biewatuo üdi houlieta. Sitse Jabesh themiako Nahash ki, “Hieko ze diete puo chüwacie, siliro hieko n lie chütatuolie,” si.

² Derei Ammonmia Nahash-e uko die kela di sie, “Nieko hau chülietuo liro vitho diete chütuo, mu süu a bu nieko mhi thezatsa kerüla phrewa di süu pie Israel pete pesekecü mhatho chüwacie.”

³ Sitse Jabesh nu phichükoe sie puo ki, “Teisozha thenie khashü hieko tsücie, sidi hie bu dielie ketsepie Israel rüvie pete nu shücie, sidi miapuorei vor hie kelashüketuo tuo mota liro, hie khapie n dzie nu shüwatuowe.”

⁴ Süsie dieliemia Saul keba Gibia nadiu nu vor di thedzeu pie themiako ki pushü, sitse themiako pete rei krakhoui bata.

⁵ Sütei touki Saul lie nu tsu di puo thuko ze la vorzhü, sidi puoe sie, “Themiako kedipuo chüwa di kra bata ga?” Ru uko Jabesh nu themiako dze pie puo ki pushü.

⁶ Tsiu Saul-e thedze süko sishü tse, Jihova Ruopfüu puo gei kuo se vorlie, sidi puo nou meyie phi vorta.

⁷ Sidi puoe thudo dziese puo chülie di da phaphawa, di dieliemia dzie nunu süko ketsepie Israel rüvie pete nu shü di sie, “Themia kehoupuorei Saul mu Samuel unie siemedzi kemomia thudoko pie hakemhiewatuo.” Sitse Jihova khrüpreiu themiako gei vorta, sidi uko puochü di tuo parlie.

⁸ Sidi puoe Bezek nunu uko kie kengulie di phrüshü ru Israelmia nyie krie se mu Judamia nyie serta.

⁹ Sitse ukoe Jabesh-gilid nunu kevor dielieko ki, “Nieko hamhiecü pie nie themiako ki pushülie, ‘Sodu niaki chara kezha ki nieko shüphrashüwatuo ho.’” Sitse dieliekoe süu se vor Jabesh-gilid themiako ki pushü ru ukoe uko neithorta.

¹⁰ Sidi ukoe dielie pie Ammonmia Nahash ki pu di, “Sodu hieko kha n dzie nu shüwatuo mu süki nie thuo hieko pie nie medo chüwaliecie,” sishü.

¹¹ Süsienhie Saul-e puo themiako kezapie kro se chülie, sidi khise rükhou thelau nu ngumvümia razhüchü nu ler uko bievü, tsiu khinhie niaki lesierlie kemochie Ammonko dukhri, mu perheikeshüko rei ta cüre tuota, sizomonyü mia kenie zorei keze tuo mota.

Saul bu Kedi Chüketuo Mvü kemetei Lakeshü

¹² Siro themiako vor Samuel ki, “ ‘Saul bu hie mho di tuolie!’ ikethako suomia ga? Themia süko ze vorshü di hie bu süko dukhriwaliecie,” sita.

¹³ Derei Saul-e sie, “Miapuorei dukhrilie lho, thie Jihovae kelakelie pie Israel nu vorkeshü teisozhau zokecü la.”

¹⁴ Süsie Samuel-e themiako ki, “Úko pete Gilgal nu vo di sünunu u kediu mvü kemetei lalietuo khe.”

¹⁵ Sidi themia peteko Gilgal nu volie di Jihova mhodzünu Saul bu uko kedi chüketuo mvü kemetei lalie. Siro uko sükinu vitho ruosuo chüpie Jihova mhodzünu shü, mu sünhie teiso-u la Saul mu Israelmia pete rei u nei pie mhapuochü.