Samuel Kerieu 10 - Angami Naga CL (Re-edited) Bible (BSI)

¹ Sidi Samuel-e tierpouu chülie di rupie Saul tsü gei shüshü mu puo meboshü di sie, “Jihovae n kenhepie puo kayie themia Israelko kediu chüliete. Noe Jihova themiako mho kedi chütuo, sidi ngumvümia uko houpfü kebako donu uko yalietuo. Mu hau n bu Jihova themiako mho dituoü n kenhekelie zasiu zo.

² No thie a kinu tuoshü ro no Benjamin kijü tierie ki Zelza nu Rachel mekhru chü khieki nu mia kenie ze kesetuo. Mu unie-e n ki, ‘No gada pfhü ketuoko nguliete, sirei harie n puoe gadako dze la puo noumeca monyü n la puo nou kemezhie di: A nuou la kedipuo chü ro vituomu, si batelie,’ isituo.

³ Süsie no sünunu tuo zo vo Tabor nu phriebo-u tsolie kemochie tuo volie; sitse sünu mia se Bethel nu Ukepenuopfü ki khotuoü ketuoko ze kesetuo, uko mia puou temvünuo se, kekreiu niekhrüda se mu seu khubedzü chüzhüsü puo icü setuotuo.

⁴ Siro ukoe n kelushü di niekhrüda kenie pie n tsütuo, mu noe süu uko dzie nunu pielietuo.

⁵ Sidi no Gibiat-elohim nu vorlietuo, mu sünu Filistinmia chüpahi razhü chü ba. Siro noe rüna careu kepenuoki vorlie tse siedzekesimia kro puo harp, tambourin, luoü mu lyre keseko bu uko mhodzü rie di thechü kerükrie geinu süko khou di kerkezhü ze keselietuo, mu uko siedzedie putuo üdi melie u kethelie lho batuo.

⁶ Siro Jihova ruopfüu kuo se di n gei vortatuo, sidi no rei uko ze siedzedie putatuo, mu no themia kekrei puo chütatuo.

⁷ Siro zasi hako n gei vorta liro, süki chü morokesuoko chüliecie, Ukepenuopfüe n ze tuoketa la.

⁸ Siro no a mhodzü Gilgal nu kelie, sünu kethe ruosuo mu noune ruosuo chüketuo la a khor di avu keselietuo ho, derei a khor di n bu chüketuoko thashü kemochie zha thenie ketso a pfhe baliecie.”

Saul Siedzedie Pukecü

⁹ Sidi puoe Samuel kinu tuotatuoü rüreishü mumetha, Ukepenuopfüe thenou kekrei puo pie puo tsüwata, mu sünhie zasiko pete chü tsei vorta.

¹⁰ Sidi unie-e sünunu Gibia nu vorkezhü ki, siedzekesimia kro puo vor puo ze keselie, ru Jihova Ruopfüu puo gei vorta, sidi puo rei uko ze siedzedie puta.

¹¹ Sitse tsie mhodzü puo kesimiako puoe siedzekesimiako ze siedzedie puketa ngushü di huoniehuo üse, “Kish nuou gei chüketa hau kiüte mu? Saul rei siedzekesimiate me?”

¹² Siro sünu mia puoe sie “Siro uko puo supuo ga?” Süla “Saul rei siedzekesi chüte me?” icü die hau pu kemeyieta.

¹³ Sidi puoe siedzedie pu thewa tse, puoe puo kinu vota.

¹⁴ Siro Saul-nuo nieu unie ngushü mu unie ketso di, “Nnie kirapuo vo ga?” Siru puoe sie, “Gadako pfhütuoü volie, derei hienie süko mhakipuorei tuo ngu mota tse, hienie tuo Samuel ki votelie.”

¹⁵ Sitse Saul nieu sie, “Samuel nnie ki kedipuo pu shiü a ki pushücie.”

¹⁶ Siro Saul sie puo nieu ki, “Puoe hienie ki gadako ngulieketa pulie,” si. Derei Samuel puo ki pukeshü kedi kechü dzeu we pie puo nieu ki pu mota.

Saul bu Kedi Chükelie

¹⁷ Tsiu Samuel-e themia kie kengupie Mizpa nu Jihova mhodzünu shülie.

¹⁸ Puoe uko ki, “Jihova, Israel Kepenuopfüe puya; ‘Ae Ijipt nunu n ze parshü mu Ijiptmia nie pese mu pechüpenyükezha kediko pete dzie nunu nieko kelashü.’

¹⁹ Ae nieko ngumvümia dzie nu mu nie kemezhiekecü nunu nie kelashü, derei nieko thie Kepenuopfü mha kepeka nie gei kevorko mu nie kemezhiekecü peteko nunu nie kelakeshüu meliewate, sidi a ki, ‘Molie, kedi puo bu hie mho dicie’ ite. Sizo üliro tsie nie seyieseyie mu chienuochienuo di, nie thuo nie khapie Jihova mhodzünu shüliecie.”

²⁰ Sidi Samuel-e Israel seyieseyie di ze vorcü ki, Benjamin yieu kedalie.

²¹ Tsiu Samuel-e Benjamin seyieu nu kikrukikru di ze vorlie tse, Matrit kikru kedalie. Süsie Matrit kikru nu mia puopuo keda vor ru Kish nuou Saul za nu parta. Derei uko puo pfhü sie tse puo ngu mota.

²² Süla uko Jihova ketso di, “Themiau hanu vor ba mo mo ga?” Sitse Jihova sie, “Co, puo mhadzeko donu rüshü ba ho,” sita.

²³ Süla uko ta vo puo zelie; sidi puo ze themiako donu vorshü, ru harie puo bouka nunu mia kekreiko pete ki rükrieta.

²⁴ Tsiu Samuel-e themia pete ki, “Harie nieko Jihovae kedakelie themiau mehoshüyi, themiako donu puo kemhie puorei jü zo die?” Sitse themiako shie peto di sie, “Kediu bu rhei kechau chücie,” sita.

²⁵ Süsie Samuel-e kedi kechü zhoko vatsha menuopie themiako kieshü. Sidi puo süko pete pie leshüda nu thulie di Jihova mhodzünu khapie zhüwa. Siro Samuel-e themiako ketsewa di u bu u kinu vo phreta.

²⁶ Mu Saul rei Gibia nu puo kinu vota. Siro Ukepenuopfü u melou nyükeshü miavimia kro puo puo ze vota.

²⁷ Derei miasuomiaruomia kro puo thuo sie, “Kedipuo mhie di themia hau u kelalie vitie shi?” Sidi uko Saul pese di mhapuorei se vor puo tsü mo. Derei puo kemekriei zo. Siro Ammonmia kediu Nahash-e Gadmiako mu Reubenko pesethor zo. Sidi puoe Israelmia shüphrakeshü bu par kelho la uko mhi u zatsa kerüla phrewa. Sidi Israelko Jordan cie kepra ki, Ammonmia kediu Nahash bu u mhi kerülawa kemo puorei tuo mota. Derei mia nyie thenie Ammonmia dzie nunu talie di Jabesh-gilid nu vota.