Samuel Kerieu 1 - Angami Naga CL (Re-edited) Bible (BSI)

Samuel Penuokelie

¹ Thiedzü Zufmia puo, Elkana ükecü puo Efraim kijüthou rüna Ramathaim nu lhou. Puo Efraimmia Zuf nuou Tohu nuo Elihu mu Elihu nuou Jeroham nuo.

² Tsiu puoe puo kimia kenie nyi, miapfü puo za Hana mu kekreipfü za Penina; Peninae puo nuonuo nyi, derei Hanae puo nuo jü.

³ Themia hau teiciekepra puo rüna nunu Shilo nu kho di krodiko Jihova ki ruosuo khashüya, hateiki Eli nuo Hofni mu Finehas unie-e Jihova zievo chü baya.

⁴ Tsiu Elkanae ruosuo khakeshü ki mha pie puo kimia Penina mu puo nuo thenuko mu thepfuko ya chüshüya.

⁵ Siro puoe Hana khrieyacü la puo ya bu mia ya de kenieya, Jihovae puo nuobvü khawata zorei.

⁶ Tsiu Peninapfüe puo nou chü pesuo mu puo pie kezhase phiya, kekreilamonyü Jihovae puo nuobvü khawaketa la.

⁷ Hakemhie di teiciekepra Jihova ki nu kekho ki Peninae puo nou chü pesuo mu chü kerüpeshüya. Mu puo bu kra di mhacümhakrie motaya.

⁸ Sitse puo nupfu Elkanae puo ki, “Hana, no kiüdi kraya ga? No kiüdi mhacümhakrie mota ga? Kiüdi n nousuoya ga? Ae n mhodzüki thepfunuomia ker ki rei vikuo mo üme?”

⁹ Va puo uko Shilo nu mhacümhakrie tseilie tse, Hana sielie sidi puo khapie Jihova mhodzünu shü. Hateiki Eli zievo-u Jihova rüsuoki kikha co-u sieki theba puo gei ba.

¹⁰ Süki hapfüe puo nousuo seta mu puoe Jihova ki kecha chü di krata.

¹¹ Tsiu Hanae Jihova ki rüse di sie, “He-i! krodiko Jihova, No n kituopfü mezhie rükrashü mu mehoshü, tsiu n kituopfü rükra mota mo, sidi thepfunuomia puo a tsüshü liro, a puo bu puo rhei chie, puo se ketso, Nazirmia chü di pie Jihova tsü lashü zotuo, puo bu zu morei kemelu vie puorei krielie lho zo. Mu tsüpfü pie puo tsü gei shülie lho zo.”

¹² Tsiu puoe Jihova ki cha ba zota mu süki Eli-e puotie meho ba.

¹³ Hanae puo nou nu cha ba; puotie mele ba derei puo pfhephra si mo; süla Eli-e puo meze ba nhie icü leta.

¹⁴ Sidi Eli-e sie puo ki, “No kichiepuo meze batieya ga? N zu khawaliecie.”

¹⁵ Sitse Hanae sie, “Molie, a niepuu, ae thenou suo tuoyakezhapfü puolie; a zu morei zu kekuo krie di meze ba mo, derei a nou lapie Jihova ki rükhruo balie.

¹⁶ N kituopfü üse mhatho kemo thenu ükecü leta hiecie, ae kemezhiekecü mu thenou kesuo pete la Jihova ki rükhruo balie.”

¹⁷ Sitse Eli puo ki, “N nou mene di votalie; sidi Israel Kepenuopfü Jihova bu no puo ki kechau chüshü n ketsüu chücie.”

¹⁸ Sitse puoe sie, “N kituopfü bu n mhiki n khriepfükelie chülie üthienyü.” Sidi thenupfü vo mhacümhakrielie, süsie puo thesuo sa mota.

¹⁹ Süsienhie Elkana mu puo kinuko sie zilie di Jihova rüsuolie di Rama nu uko kinu la vorta. Sidi Elkanae puo kimia Hana sishü ru Jihovae puo varükrashü.

²⁰ Sidi Hana nuonipfülie, di thepfunuomia puo penuolie, sitse puoe puo za pie Samuel chülie, di sie, “Ae Jihova ki puo chalie ze ru.”

²¹ Siro süsie cie, Elkanae puo kinuko pete ze di teiciekepra Jihova ki ruosuo khashüyakezha tuoi mu puoe phrakeshüu chütuoü kho.

²² Derei Hana we kho mo, mu puo nupfu ki, “Unuoyo khowa kemochie a kholie lho, mu puo khowata ro, süze a puo ze kho Jihova mhodzünu shütuo, sidi puo rhei chie puo bu sünu batatuo.”

²³ Sitse Elkanae puo üse, “N dzüki vi ücüu chüliecie, puo kholie vita kemochie kinu balie, mu Jihova bu puo dieu chüshüliecie.” Süla thenupfü kinu bata, sidi unuoyo khowa kemochie puo theke bata.

²⁴ Süsie puo khowata tse, puoe unuoyo medzü phi zorei zelie, mu cie seketa pedonuo yopuo, thoulha rhado ker mu khubezu chüzhüsü puo icü selie di Shilo nu Jihova kiu nu vor.

²⁵ Siro unie pedonuou dukhrilie di unuoyo ze Eli mhodzünu vor.

²⁶ Sitse Hanae sie, “He-i, a niepuu; no rhei ketuo tuoi ae thiedzü miapfü puo n mhodzüki nu a Jihova ki cha kethapfülie.

²⁷ Nuo hayoha la a chashü ru Jihovae a kecha chüshüte.

²⁸ Süla a rei tsie puo khapie Jihova tsüshüzhie; puo rhei chie la puo khapie Jihova tsüwate ho.” Sidi süpfüe sükinu puo khapie Jihova tsüwa.