Samuel Kenieu 9 - Angami Naga CL (Re-edited) Bible (BSI)

David-e Mefiboshet gei Tseiüvikeshü

¹ David sie, “A bu Jonathan la ketseikevi thapie kieshülieketuo tsie rei Saul kinumia huo baluo me?”

² Süki Ziba ükecü puo ba, ru puo kie ze David ki vor. Sitse kediu sie puo ki, “No Ziba me?” Sitse puo sie, “N lietho nu tuowe,” sishü.

³ Kediu sie, “Saul kinumia huo ba di a bu tsie rei Ukepenuopfü ketseikevi thashülieketuo baluo me?” Sitse Ziba sie David ki, “Jonathan nuo puo ba; puoe puo phi rüyho.”

⁴ Sitse kediu sie puo ki, “Puo kirapuo ba ga?” Sitse Ziba sie kediu ki, “Puoe Lo-debar nu Amiel nuou Makir ki nu baya.”

⁵ Sitse kediu David-e mia ketsepie Lo-debar nu Amiel nuou Makir ki nu puo ze vorlie.

⁶ Siro Saul nuou Jonathan nuou Mefiboshet David ki vor tse puo zie pesulie di ke puo rüsuo. Sitse David sie, “Mefiboshet.” Sitse puo sie, “A sü n kituouwe” idi puo die kelashü.

⁷ Siro David sie puo ki, “Michie hiecie, kekreilamonyü n puou Jonathan la a ketseikevi thashü n kietuo; siro a n puotsau Saul kijü pete kela lashü n tsütuo, mu n bu a mizhü geinu mhacü sei tuotatuo.”

⁸ Sitse puoe nuketsu puo kelu la di sie, “N kituou sü kedipuo üdi no puo mehotieya mu? A sü tefü siaketa kemhie puo ze.”

⁹ Sitse kediue Saul kituou Ziba kielie di sie puo ki, “A Saul vie kheko siro puo kiko pie n niepuu tsuu tsüwate ho.

¹⁰ Mu n nuonuoko mu n kituoko lieciepie puo tsütuo, sidi puo si vükelieko se vortuo, sitse n niepuu tsuu kecüca nyilietuo, derei n niepuu tsuu zo we a mizhü geinu mhacü seituo.” Siro Zibae puo nuo thepfumia kerepengou mu kituomia mepfüekenie nyi.

¹¹ Sitse Ziba sie kediu ki, “A niepuu kediu puo kituou ki die khakeshü medzi di a mha pete chütuo.” Süsie Mefiboshet-e kediu nuonuoko mhie di David mizhüu geinu mhacü bata.

¹² Siro Mefiboshet-e puo nuo thepfumia yopuo ba, puo za Mika. Sidi Ziba kiu nu keba pete Mefiboshet kituomia chüta.

¹³ Siro Mefiboshet-e Jerusalem nu lhouta, puoe kediu mizhü geinu mhacüyacü la. Siro puo puo phi kenienie rüyho.