Samuel Kenieu 8 - Angami Naga CL (Re-edited) Bible (BSI)

David Terhü Kechü

¹ Siro puotei huo sie, David-e Filistinko whuo di süko penyüwa; sidi David-e Filistinmia dzie nunu Metheg-ama lielie.

² Siro puoe Moabmia rei sa penyülie, mu uko bu tsu kijü zhü, sidi kero pie mejülie; siro puoe dukhriwaketuo la kero süu chie kenie mejülie, mu rhei baketuoko la süu chie puo mejülie. Siro Moabmiakoe David kituomia chüta sidi khezhanuo se vorya.

³ Siro David-e puo za nu tsiepou sepie kebau lalietuoü tuo Eufrat rüu nu kevo ki Zobamia Rehob nuou Kediu Hadadezer rei dukhriwa.

⁴ Siro David-e puo kinu kierkese mia nyie puo di krie thenie, mu pephi ketuo chüpahi mia nyie mepfü zelie. David-e bageikese kierko pete phika zawa, derei kierbagei krie puo la we khapie balie.

⁵ Siro Damaska nu Arammia Zoba Kediu Hadadezer khruohituoü vor tse, David-e Arammia nyie mepfüekenie dukhriwa.

⁶ Süsie David-e Damaska nu Siria donu chüpahiko khapie bawa, sidi Arammia David kituomia chüta sidi khezhanuo khashüya. Siro Jihovae David bu kehoura vo zorei kuolielieta.

⁷ Sidi David-e Hadadezer kituokoe piekecü suna pezhüko pielie di süko se Jerusalem nu vorta.

⁸ Siro Hadadezer rünako, Beta mu Berothai nunu kediu David-e mese kekra chülie.

⁹ David kediue Hadadezer rüpfhünuo pete penyüwata ükecü Hamat nu Kedi Toi-e silie tse,

¹⁰ Kediu David-e Hadadezer ze kegei di puo penyüwaketa la, Toi Kediu David kelushüketuo la puo nuo Joram ketseshü. Hadadezer-e tsiekenuo Toi ze terhü chüyacü la. Siro Joram-e rakachü, suna mu mese pie kechü vienyako sa se vor;

¹¹ hako rei Kediu David-e kenyüpie Jihova tsüwa, siro puoe seyie kekreikreikecü penyükelieko nunu rakachü mu suna sa kenyüpie khashü,

¹² Edom nu, Moab nu, Ammonmia, Filistinmia, Amalek mu Rehob nuou Kediu Hadadezer Zoba kinu vakelie vieko pete.

¹³ David-e kuolie di puo thuo puo za kralie. Puoe la kevor ki, puoe metsie Razhau nunu Edommia nyie kerethetha dukhriwa.

¹⁴ Puoe puo chüpahiko khapie Edom nu bawa, mu Edommia pete David kituomia chüta. Siro Jihovae David kevo cha pete nu kuokelie pie puo tsü.

David Khro Kezhako

¹⁵ Süla David-e Israel pete mho kedi chülie; sidi David-e puo themia pete gei kethocau mu thetouu chüshü.

¹⁶ Siro Zeruia nuou Joab-e rüpfhünuoko mhokezhau chü; Ahilud nuou Jehoshafat kethuu chü;

¹⁷ Ahitub nuou Zadok mu Abiathar nuou Ahimelek unie bu zievo chü; Seraia bu leshükethuu chü;

¹⁸ Jehoiada nuou Benaia bu Keretko mu Peletko mhokezha chü; mu David nuonuoko bu zievo chü.