Samuel Kenieu 6 - Angami Naga CL (Re-edited) Bible (BSI)

David-e Dietseidiekhobouu Se Jerusalem nu Vorkelie

¹ Siro David-e Israel donu kedakelieko kie kengu lalie, süko mia nyie ser.

² Siro David mu puo ze ketuoko pete tuo Bale-Juda nu vo, sünunu Ukepenuopfü dietseidiekhobouu, krodiko Jihova idi puo kieyakezhau Cherubnie donu bayakezhau se vortuo üdi.

³ Siro ukoe Ukepenuopfü dietseidiekhobouu pie sei bagei kesa puo gei shülie, sidi kijükhruu gei keba Abinadab kiu nunu se parlie. Siro Abinadab nuonie Uza mu Ahio unie bu sei bagei kesau whuo.

⁴ Mu Ukepenuopfü dietseidiekhobouu sa di sü gei tuo; sitse Ahioe dietseidiekhobouu mhodzünu tuo.

⁵ Siro David mu Israel kinumia pete Jihova mhodzünu u kekuo pete se tsaliko chü mu luoü mu harp khou, tsiu tambourin kekrei, siro ketsü khou mu kejokecü khouko se u dowhuo ituo.

⁶ Siro uko vor Nakon sieu nu tsokelie ki, Uzae puo dzie yhapie kho Ukepenuopfü dietseidiekhobouu meheipielie, kekreilamonyü thudonie-e süu pfükenie pelashütuo üketa la.

⁷ Sitse Jihova nouyieu Uza gei phita; sidi Ukepenuopfü sükinu puo vüshü, puoe puo dzie yhapie dietseidiekhobouu biekecü la; sidi puo Kepenuopfü dietseidiekhobouu khieki nu siazhüta.

⁸ Sitse David-e puo nei mota. Kekreilamonyü Jihova nouyieu rupie Uza gei keshü la; süla thechü süu zapie Perez-uza üdi kieta mu thie ketso rei si tuoya zo.

⁹ David-e sünhie Jihova preita di puo sie, “Kimhie di Jihova dietseidiekhobouu se a ki vorlie vituo ga?” sita.

¹⁰ Süla David-e Jihova dietseidiekhobouu se puo ki David nadiu nu vorketuo puo medo mota; süla süu se vo Gitmia Obed-edom kiu nu shüwa.

¹¹ Siro Jihova dietseidiekhobouu Gitmia Obed-edom ki nu khrü se bata; sitse Jihova japie Obed-edom mu puo kiu pete tsüshü.

¹² Sitse mia kediu David ki, “Jihova Ukepenuopfü dietseidiekhobouu la japie Obed-edom kiu gei mu puo vienya pete gei shüshüte” sishü. Süla David-e puo nei phi di vo Obed-edom kiu nu Ukepenuopfü dietseidiekhobouu se David nadiu nu vorta.

¹³ Siro Jihova dietseidiekhobouu kepieko phicha sorou philie tse, puoe thudo mu khunuo puophou keviko pie ruosuo chüshü.

¹⁴ Siro David-e puo kekuo pete se Jihova mhodzünu puo dowhuo; siro David-e zievoboulie linenpfü se puo chie phapfü tuo.

¹⁵ Süla David mu Israel kiu pete shiekhoui mu ketsü khou di Jihova dietseidiekhobouu se vorlie.

¹⁶ Siro Jihova dietseidiekhobouu se David nadi nu vorlie tse, Saul nuopfü Mikal-e khirki nunu mehoshü ru kediu David-e Jihova mhodzünu rülhou mu puo dowhuoketuo ngushü; sitse hapfüe puo nou nu puo rütseta.

¹⁷ Siro uko Jihova dietseidiekhobouu se vorlie di khapie David süu la pfheki pethoupie keba chüu nu shülie, siro David-e kethe ruosuoko mu vitho ruosuoko khapie Jihova mhodzünu shü.

¹⁸ Siro David-e kethe ruosuoko mu vitho ruosuoko chü tseiwa tse, puoe krodiko Jihova za nunu japie themiako tsüshü.

¹⁹ Sidi kecüca kezapie themia pete, Israel krodiu pete, thenu rei thepfu rei pete tsüshü, mia puo niekhrüda puopuo themuo huo, mu khube niekhrüda kha phreshü, süsie themia peteko u thuo u kinu vo phreta.

²⁰ Süsie David-e japie puo kiu tsüketuo la vota. Derei Saul nuopfü Mikal David ze kesetuoü vor, sidi sie, “Kiüdi thie Israel kediu puo thuo puo chü ketherhu sete shi, thie puoe puo kituopfüko mhodzü puo whese tuo mote, ziezhü kemo themia puoe menga mo di puo pfhenei se mo tuoyakezhamia puo tuoi tuote!”

²¹ Sitse David sie Mikal ki, “Süu Jihova mhodzünu zolie, puoe n puou mu puo kinuko pete donu a bu Jihova themiako, Israelko mho kedi chütuoü kedalie, süla a Jihova mhodzünu a dowhuotuolie.

²² Siro a haha ki rei mhathomharo kemopfü chütuo, sidi a thuo a mhiki we cü miemietatuo; siro no kituomia dze kepuko a süko rhutuo.”

²³ Süsie Saul nuopfü Mikal sünhie yawinu puo se ketso rei nuojü chüta.