Samuel Kenieu 5 - Angami Naga CL (Re-edited) Bible (BSI)

David bu Israel Pete Mho Kedi Chükelie

¹ Siro Israel seyieko pete Hebron nu David ki vor, sidi sie, “Harie, hieko ha n ru mu n chü zo.

² Siro puotei huo, Saul hie mho dikecü ki, Israel cha tha pra mu lekecüu sü no zo. Jihovae n ki: A themia Israelko kepfheu sü no zo, n bu Israel mho kekhatuo,” si zo.

³ Süla Israel phichüko pete Hebron nu kediu ki vor, sidi kediu David-e Hebron nu Jihova mhodzü nunu uko ze dietseidiekholie; tsiu ukoe David kenhepie Israel mho kedi chülie.

⁴ David di sedekelie ki puo cie serta, mu puo cie hiedia kedi chü.

⁵ Puoe Hebron nu Juda mho cie thenie mu khrü sorou di, mu Jerusalem nu puoe Israel mu Juda mho cie serese di.

Jerusalem pie Israel Seluobau Chükelie

⁶ Kediu mu puo themiakoe Jebusmia perhietuo üdi Jerusalem nu kho, ukoe kijü süu nu lhou baya, ukoe sie David ki, “No hanu vorlie kenjü, mhiciemia mu phiyhomia zorei n whuo petawalie vi,” si. Ukoe, “David-e hanu vorlie kenjü” icü lekecü la.

⁷ Sirei David-e Zion badiu lielie, süusü David nadiu.

⁸ Sitse David-e sünhie pukecü, “Kehoupuorei Jebusmia biekelieu, puo bu dzüchau meli kho di mhiciemia mu phiyhomia, David-e ngumecüyakezhako biewatuo.” Süla ukoe pukecü, “Mhiciemia morei phiyhomia kinu lerlie lho” isiya.

⁹ Siro David-e badiu lielie, sidi süu za pie David rüna isilie. David-e Milo nunu sede di nadi houkeselie.

¹⁰ Siro David-e zha miemie sieta, kekreilamonyü Jihova, krodiko Kepenuopfüe puo ze ketuo la.

¹¹ Tur nu kediu Hiram dieliemia ketsepie David ki shü, puoe sedarboko, mu sei mistirimia tsiu ketsiekechümia sa ketseshü di David kiu chü.

¹² Siro David-e Jihova puo bu Israel mho kedi chü, tsiu puo themia Israel la puo kedirüvieu chü pezhakeshü silieta.

¹³ Siro David-e Hebron nunu vorkelie sie, puoe Jerusalem nu puo pelipfümia mu puo kimia lie salie; sidi thenumia mu thepfumia penuo sapie David tsüshü.

¹⁴ Hako Jerusalem nunu penuopie puo ketsüko: Shamua, Shobab, Nathan, Solomon,

¹⁵ Ibhar, Elishua, Nefeg, Jafia,

¹⁶ Elishama, Eliada mu Elifelet.

Filistinko David Petsoukecü

¹⁷ Siro Filistinkoe David kenhepie Israel mho kedi chülieketa silie tse, Filistinmia pete David pfhütuoü kho; derei David süu silieta süla puo badiu nu keta.

¹⁸ Siro Filistinko khor di Refaim razha pete tshupfü balie.

¹⁹ Sitse David Jihova ketso di sie, “A bu Filistinko perhieketuo la khotuo me? No uko khapie a dzie nu shüwatuo me?” Sitse Jihova sie puo ki, “Khocie, kekreilamonyü a Filistinko khapie n dzie nu shü touwa zotuo.”

²⁰ Süla David Baal-perazim nu vorlie, sidi David sünunu uko penyüwa, di puo sie, “Jihovae dzüdipie pfüphakeshü mhie a ngumvü pfüphashüte.” Süla thechü süu zapie Baal-perazim silie.

²¹ Siro Filistinkoe uko terhuorhiko khapie sünu zhüwa, David mu puo themiako süko chüseta.

²² Siro Filistinko la vor, sidi Refaim razhau nu tshupfü balie.

²³ Siro David-e Jihova ketsokecü ki, puoe sie, “No kho hie; derei uko sietsa rho volie, sidi balsambo kepetsoutsa nu uko ki voliecie.

²⁴ Sidi niekoe balsambo mezü geinu mia tuoketuo pfhe sishükecü ki, nieko sie dojülie; Jihova Filistinmia rüpfhünuoko biewatuoü nieko mhodzü voketa la,” sita.

²⁵ Siro David-e Jihova puo ki diekhakeshü mhie chülie; sidi puoe Geba nunu vo Gezer chau nu kevo ketso Filistinko biewa.