Samuel Kenieu 4 - Angami Naga CL (Re-edited) Bible (BSI)

Ishbal Dukhrikewa

¹ Siro Saul nuou Ishbal-e Abner Hebron nu siaketa silie tse, puo kethepfu jüta, mu Israel pete rei u chamezieta.

² Saul nuo terhü whuokecü kroko krüta kenie tuo; mia puo za Bana mu kekreiu zae Rekab. Unie Birot nu Benjamin yiemia, kekreilamonyü Birot üse Benjamin phou chüta üya.

³ (Siru Birotmia tase Gitaim nu vota, sidi thie ketso rei sünu kelhoumia chü tuote.)

⁴ Saul nuou Jonathan-e puo nuo phiyho puo baya. Siro Jezril nu Saul mu Jonathan unie siaketa dielie si kevor ki puoe cie pengouta. Puo thekepfüe puo chü pielie di tashü, sidi puoe ta rükri seketuo ki unuoyo petewa süla puo phi rüyhota. Puo za Mefiboshet.

⁵ Sitse Birotmia Rimon nuo Rekab mu Bana unie tuoshü, sidi khinhieluo ki Ishbal ki nu vorlie, puoe khinhieluo rüleiyakezha teiu nu rülei keba ki.

⁶ Unie-e kinu telha pfütuo ükecü do chü ler, sidi unie puo vadi zephawa, sidi Rekab mu puo siezeu Bana unie tata.

⁷ Unie-e kinu keler ki puoe puo zhübou nu puo zhü gei zhü, süki unie-e puo biewa, sidi puo dukhriwata, tsiu puo tsü zielie, sidi unie teizeizha pete Araba chau nu vo.

⁸ Siro unie Ishbal tsüu se Hebron nu David ki vor sidi sie kediu ki, “Saul nuou Ishbal, n ngumvüu n kerheiro pfhü tuoyakezhau, tsü sü harie; Jihova thie a niepuu kediu Saul mu puo seyieko khe pushüte.”

⁹ Sitse David-e Rekab mu puo siezeu Bana, Birotmia Rimon nuonie die kela di sie, “Jihova rhei ketuo mhiei, puoe a perhiekezha pete nunu a kelashüte,

¹⁰ mia puoe a ki pu di, ‘Mehoshücie, Saul sü siate,’ isi di thedze kevi se vor zo ürei, a puo telie di Ziklag nu puo dukhriwa, hau sü puo dielie se kevor la puo zhakhra chükeshüu zo.

¹¹ Siüliro themia kerüzhümia kemiathomia puo kiu nu, puo zhü geinu dukhriwaketa ha sü kezie rei ngulie zhü mo üme! Süla tsie puo zie a n dzie nunu lielie, sidi kijüu nu n pekawakecü mese mo üme?”

¹² Süla David-e khriesako ki diekhashü, sitse uko unie dukhriwa; uko unie dzie mu unie phi dawa, sidi unie mo pie Hebron nu rüzieu khieki nu goupiezhawa. Derei uko Ishbal tsü we pie vo Hebron nu Abner mekhru nu khruwa.