Samuel Kenieu 24 - Angami Naga CL (Re-edited) Bible (BSI)

David-e Israel mu Juda phrükecü

¹ Siro Jihovae Israel gei puo nou meyie lata, sidi puoe David nou chüpie uko petsou di sie, “Vo di Israel mu Juda themiako phrücie,” si.

² Süla kediue puo ze ketuo Joab mu rüpfhünuo mhokezhako ki, “Vo Dan nunu Beersheba ketso seyie pete nu volie, sidi themiako phrülie, sidi a bu themia kide ba shiü siliecie.”

³ Derei Joab sie kediu ki, “N Kepenuopfü Jihova bu themia kedithedepuo ba shiü, süde thekrie sa pekrashükelieu chüliecie, sidi kediu a niepuu mhi bu süsü ngukelieu chücie! Derei kiüdi kediu a niepuu mha hau chütuo üte shi?” ishü.

⁴ Derei kediu die-e Joab mu rüpfhünuo mhokezhako mho kuota. Süla Joab mu rüpfhünuo mhokezhakoe Israel nuolhou phrütuoü kediu mhodzü nunu prata.

⁵ Siro uko Jordan cie pralie, sidi Aroer nunu sede di razha metsuo nu nadiu nu zo Gad kevatsa Jazer nu zo vota.

⁶ Süsie uko Gilid nu vorlie, sidi tuo Hitmia kijü nu Kadesh nu volie; sidi uko Dan nu vorlie, mu Dan nunu uko Sidon khieümhoura volie,

⁷ sidi Tur badiko nu vorlie mu Hitmia mu Kanan nadiko pete nu vorlie, sidi uko Beersheba nu Juda nu Negeb ketso vo.

⁸ Siro uko kijü süko pete whiwa tse, ukoe khrü thepfü di zha mepfü nhie Jerusalem nu vorlie.

⁹ Sidi Joab-e themia phrükelieko dze se kediu ki pushü; siro Israel nu chüpahi zhiecha selie kevi mia nyie krie thetha ba, mu Juda nu mia nyie krie pengou ba.

David Kephouma la Siazha Khakeshü

¹⁰ Derei kenuotsa David-e puo melou suota, puoe themiako phrükewa la. Sitse David-e sie Jihova ki, “A mhatho chüwaketau la phouma pezhathorwate. Derei tsie, he-i Jihova, a n ki chaya, n kituou kephouma chüsetayi; kekreilamonyü a nyathorkecü mhatho chüwate,” sishü.

¹¹ Siro David khise sielie tse, Jihova die Gad siedzekesiu, David la siedzekenguu ki vor di sie,

¹² “Vo di David ki pushücie: Jihovae puya: A mha se kha n tsüya; süko donu puo kedaliecie, sitse a süu chüpie n tsütuo,” sishü.

¹³ Süla Gad-e David ki vor di puo ki pushü; puoe puo ketso di, “Teicie se pekrie bu n kijü nu vortuo mo? Mo khrü se n ngumvümia bu n whuo di uko mhodzünu tatuo tuo ga? Mo thepe bu teisozha se n kijü nu vortuo ga? Tsie leshü di pepishülie, a bu se vo a ketsekeshüu ki pushüketuo la.”

¹⁴ Sitse David sie Gad ki, “A kemezhie se bate, hie bu Jihova dzie nu letacie, kekreilamonyü puo ngukemezhie zhathor zo; derei a bu we te themia dzie nu leta hieyi,” sishü.

¹⁵ Süla Jihovae khise nu vo puotei chiekeshüu ketso thepe puo ketsepie Israel nu shü; sidi Dan nunu vo Beersheba ketso mia nyie hiethenie siata.

¹⁶ Derei teigeidielieu puo dzie yhapie Jerusalem pekawatuoü sie tse, Jihovae mha kesuou la puo nou kedita, sidi kepeka se themiako gei vorkeshüu ki “Ci zorei vite, n dzie kethetalie” ishü. Süki Jihova dielieu Jebusmia Arauna sieu khieki tha.

¹⁷ Siro David-e teigeidielieu themia pekakewau ngu tse, puoe sie Jihova ki, “A rübei phoumakewa zo, mu a a rübei mha kesuou chüwate; derei tekuo hako kedipuo chüwata ga? A n ki chaya n dzie bu a mu a puo kiu petsoucie.”

Sieu nu David Ruosuobau

¹⁸ Sünhie Gad-e David ki vor di sie, “Vo di Jebusmia Arauna sieu nunu ruosuoba puo chüpie Jihova tsücie.”

¹⁹ Siro Gad pukeshü tuoi, David tuo kho, Jihova diekhakeshü mhiei di.

²⁰ Siro Arauna mehoshü tse, kediu mu puo kituoko tuo puo kitsa vorkezhü ngulie; sitse tuo pra di vo puo khapie kediu mhodzü tsu kijü zerepfü zhüta.

²¹ Sidi Arauna sie, “Kiüdi a niepuu kediu puo kituou ki vorzhü ga?” Sitse David sie, “Ruosuoba puo chüpie Jihova tsütuoü n kinu sieu khrülieketuo la, sidi themiako gei thepeu bu lalieketuo la,” sishü,

²² mu Arauna sie, David ki, “A niepuu kediu bu lielie di puo mhodzüki vi ücüu chüliecie; hakiha kethe ruosuo la pedo tsiu liekenyü nyako mu sei chülieketuo la pedo vocieko bawe.

²³ He-i kediu, hako pete, idi Arauna se kediu tsüshü.” Sitse Arauna sie kediu ki, “N Kepenuopfü Jihova bu n gei puo neikelieu chüliecie,” ishü.

²⁴ Derei kediu sie Arauna ki, “Mo, derei a puoma puo sa di n kinu khrü petuo zotuo; siro a puoma puorei chü kemo se kethe ruosuo chüpie a Kepenuopfü Jihova tsülie lho zo.” Süla David-e sieu mu pedo la rakachü shekel hiepengou pie khrülie.

²⁵ Siro David-e sünu ruosuoba puo chüpie Jihova ki shü, sidi kethe ruosuo mu vitho ruosuo khashü. Siro Jihovae kijüu la puo kechau rünyülie, sidi Israel gei thepeu chü kediwa.