Samuel Kenieu 23 - Angami Naga CL (Re-edited) Bible (BSI)

David Die Thelako

¹ Hako David die thelako: Jese nuou David die, Ukepenuopfüe chü pezhakeshü themiau die, Jakob Kepenuopfü thuo puo kenhekelieu, Israel Kekuou keneitho-u:

² Jihova Ruopfüu a geinu die pushü, puo die a meü nu tuo.

³ Israel Kepenuopfüe pushüte, Israel Tsiekrieu a ki pushü; dietho di themia Kekhayakezhau, Kepenuopfü keprei nunu mha kekha sekebau,

⁴ puoe khise kezieu mhie zo, khise kimhou jü di niakithu kepar mhie, kijü nu nha thekeba gei teirüpie vashü di phriephrie keba tuoi zo.

⁵ Ukepenuopfü ze di a kiu rei hailie mo üme? Kekreilamonyü puoe a ze di kechachie dietseidiekho puo chüliete, mha pete nu mezashü mu khrukhre bate, puoe a kekhruo mu a mengu pete chüpie vi kechülie motuo me?

⁶ Derei pelekemomia pete a la we zohu kelhouwaketa mhie zotuo, sükoe u dzie se chülie kenjücü la;

⁷ süko nyüketuo la mia thegi morei rüngou jü seya, sidi puo chü nunu mi pie süko the pejüwaya.

David Themia Kekuoko

⁸ David themia terhümiavimiako za hako: Tahkemon-u Josheb-bashebet, puoe mia Seko mhokezhau, puoe va puo nu puo ngoupie mia krie thetha geiwa.

⁹ Siro puo sie terhümiavimia seko donu mia puo liro Ahohi nuo Dodo nuou Eliazar. Filistinko terhü chütuoü vor kengukelie nu puoe David ze di uko chie. Israelmiako tsiesieta,

¹⁰ derei puoe puo chü nu tha zolie. Sidi puoe puo bou mezieta kemochie Filistinko bie zo thalie, puo zhiecha thezepie tha zolie. Jihovae sünhie uko bu kuo pevi philie. Süsie themiako puo ki la vor derei kesiako gei mhanya bieketuo la rübei zo.

¹¹ Siro puo sieu liro Hararmia Agi nuou Shama. Siro Filistinko vo Lehi nu kengukelie ki, süusü rücü thuo tshukecü lie puo, mu chüpahiko Filistinko kinu tata.

¹² Derei puo ro lieu metsuo nu thalie, sidi süu yalie, sidi Filistinko dukhriwa; sidi Jihovae kuo pevi phikelie se vorshü.

¹³ Siro liekere sede ki miavimia mia serko donu mia se-e tuo Adulam tsiepfüu nu David ki ker, süki Filistin kro puoe Refaim razhau nu ba.

¹⁴ Siro David-e dahou kemetei nu ba; mu Filistin chüpahikoe Bethlehem nu ba.

¹⁵ Sitse David-e dzü mengu se di sie, “He-i mia puo tuoicü vo Bethlehem nu kharuki dzükhouu nu dzü pie vor a bu krie ücüwe!”

¹⁶ Sitse terhümiavimia sekoe Filistin chüpahiko pfüthe vo di Bethlehem nu kharuki dzükhouu nunu dzüülie, sidi süu se vor David tsü. Derei puo süu krie mota; sidi puoe süu rupie Jihova ki shü.

¹⁷ Sidi puoe, “A bu hau chü a thiediu chü, he-i Jihova. U thuo u kelhoupie kemichie nu keshümia zie ae krietuo me?” Süla puo süu krie lho üta. Terhümiavi se hako mha hako chüwe.

¹⁸ Siro Joab siezeu Zeruia nuou Abishaie mia Serko donu kezhau chü. Puoe puo ngou se di mia krie se perhie, sidi süko geiwa, di mia Seko donu puo za kralie.

¹⁹ Siro puoe mia Serko donu therhutho-u, sidi uko mho kekhakecüu chülie; derei puoe Seko mia puo chülie mo.

²⁰ Jehoiada nuou Benaiae Kabzil nunu kevor terhümiavi kethepfu puo, mha kezha chüyakecümia puo; puoe Moabmia Ariel nuo kenie biewa. Siro puo pekrie krükecü teiki tsu di thekre puo nunu losha puo geilie.

²¹ Süsie rei puoe Ijiptmia khriesa zivi secü puo geiwa; Ijipt-ue puo dzie nu rüngou theze se tuo; derei Benaia kethe puo se di puo perhie vo di Ijipt-u dzie nu rüngouu selie, sidi süu ngouu pie süu geiwa.

²² Sü kemhiekecü Jehoiada nuou Benaiae chüshü, sidi terhümiavimia seko ze puo za kralie.

²³ Puoe mia Serko donu therhupfü phi, derei mia Seko mia puo chülie mo. Siro David-e puo bu puo kepfheko mhokezhau chü.

²⁴ Siro mia Serko donu hako rei sa; Joab siezeu Asahel, Bethlehem-u Dodo nuou Elhanan;

²⁵ Harod-u Shama; Harod-u Elika;

²⁶ Paltimia Helez, Tekoamia Ikesh nuou Ira;

²⁷ Anathot-u Abiezer, Hushatmia Mebunai;

²⁸ Ahohit-u Zalmon; Netofau Maharai;

²⁹ Netofamia Bana nuou Heleb; Benjaminmia Gibiau Ribai nuou Itai;

³⁰ Pirathonmia Benaia; Gash rücüu nu keba Hidai;

³¹ Arbatmia Abi-albon; Bahurimmia Asmavet

³² Shalbon-u Eliaba; Jashen nuonuoko: Jonathan

³³ Hararmia Shama nuou, Hararmia Sharar nuou Ahiam;

³⁴ Makamia Ahasbai nuou Elifelet; Gilonmia Ahithofel nuou Eliam;

³⁵ Karmel-u Hezro; Arbiu Parai;

³⁶ Zobamia Nathan nuou Igal; Gadmia Bani;

³⁷ Ammonmia Zelek, Birotmia Naharai, Zeruia nuou Joab rüngou kepieu;

³⁸ Ithritmia Ira; Ithritmia Gareb;

³⁹ Hitmia Uria: pete kesa mia serethenie.