Samuel Kenieu 20 - Angami Naga CL (Re-edited) Bible (BSI)

Sheba Mha Kebvü Kepar

¹ Siro sünu themia kesuo puo baya, puo zae Sheba, Bikri nuou, Benjaminmia. Siru puoe ketsü khoushü di sie, “Úko David kitsa u ya ba mo, Jese nuou kitsa uya jü! Kehoupuorei u thuo u pfheki nu votalie, he-i Israel!” sidi shieshü.

² Süla Israelmia pete David kinu tuota sidi Bikri nuou Sheba siemedzita; derei Juda themiako we Jordan nunu vo Jerusalem ketso David siemedzi zo vo tsolie.

³ Siro David-e Jerusalem nu puo kiu nu vorlie; sidi kediue puo pelipfü kerko, puo uko bu ki pfhe baketako zelie, di uko khapie kepfhemia bu pfhe bata, mu uko caüvako khashü, derei uko ki we le sa mota. Süla uko bu samimia kemhie di uko se ketso uko khapfü di lhou.

⁴ Süsie kediu sie Amasa ki, “Teisozha se donu Juda themiako kie kenguliecie, tsiu no rei sa hanu vor baliecie.”

⁵ Süla Amasae Juda themiako kie kengutuoü vota; derei puoe puotei chiepie puo ketsüu zie bata.

⁶ Süla David sie Abishai ki, “Bikri nuou Shebae Absalom ki rei mha peka krashülie vite; süla no n niepuu kituoko zelie di puo sie whuocie, moro puoe puo dahou houpie keba nadiko lielie di u kinu tata rei silie lhomu.”

⁷ Sitse Joab themiako Keretmiako, Peletmia mu terhümiaviko pete keze puo sie whuo vota; ukoe Jerusalem nunu prata di Bikri nuou Sheba whuo.

⁸ Siro ukoe Gibeon nu ketsie kezhau khieki volie tse, Amasae uko ze kesetuoü vor. Siru Joab-e chüpahimia pfhenei se tuo, tsiu süu mhogei zhiecha puo shiepie puo leikhei nu chiepha gei zhiesha nu tuo; mu puoe tuo vo zhükecü ki süu rüzouta.

⁹ Sitse Joab sie Amasa ki, “A siezeu no vituo zo mo?” Sidi Joab-e puo mebotuoü puo dzie puo zatsa pie puo tiemie teshülie.

¹⁰ Derei Amasae Joab dzie nu zhiecha ketuou ngu mo; mu Joab-e süu pie puo va zewa di puo rie bu rüla kijü tsuta, sidi puo siata. Mu puoe va kenieu ze mota. Süsie Joab mu puo siezeu Abishai unie Bikri nuou Sheba whuo vota.

¹¹ Siro Joab themiako mia puoe Amasa khieki thalie di sie, “Supuonie Joab kitsa mu David kitsa puo neiya shi, puo bu Joab siemedziliecie” sishü.

¹² Süki Amasae tetsu cha metsuo nu puo thuo puo zie nu zhü, mu themiaue themia peteko thathaketa ngushü, siro themiaue themia kevor pete thaketa ngushü tse, puoe cha metsuo nunu Amasa chü keyiepie lieu nu shüwa, sidi pfhe puo kelhapie puo whewa.

¹³ Siro puo cha metsuo nunu puo chüwa mumetha, themia pete rei Bikri nuou Sheba whuotuoü Joab siemedzi vota.

¹⁴ Siro Sheba Israel seyie pete nunu vo Bet-maka nu Abel ketso vo; sitse Biritmiako pete vo kengulie, sidi puo siemedzi leta.

¹⁵ Siro Joab chüpahiko vor Bet-maka Abel nu puo whuo; ukoe nadiu petsoukecü thekhe thielie, sidi le thekhe thiekelieko nu thalie. Siro Joab chüpahikoe dahou biemewatuoü sie.

¹⁶ Sitse thenumia mhakesipfü puoe nadiu nunu mia kie di, “Rünyüshücie! Rünyüshücie! Joab ki, ‘Haki vorcie; a n rüchü nyü balie’ ishülie.”

¹⁷ Sitse puoe puo penuo phir, ru thenupfü sie, “No Joab me?” Puoe sie, “U we.” Sitse hapfü sie puo ki, “N kituopfü dieko rünyüshücie.” Sitse puo sie, “A rünyü ba zo.”

¹⁸ Siru hapfü sie, “Thiedzümia we sie, ‘Uko bu vo Abel nuou ketsocie’ idi mha pepiya.

¹⁹ Ae Israel nu mia ze kezevi mu dietho di lhou bayakezhapfü puo; noe Israel nu keba nadi; Israel nu miazuopfü pekawatuoü pfhüya; no kiüdi Jihova kayieu mezulietuoü pfhüya ga?”

²⁰ Sitse Joab sie, “A mha mezulie morei pekatuo ükecüu bu a penuo hieü, süu bu a therhietacie!

²¹ Mha süu mote! Derei Efraim kijükhru rünau gei mia puo, puo za Sheba, Bikri nuou, puo dzie yhapie Kediu David petsoute; puo khashücie, sitse a nadiu nunu tuotatuo.” Sitse thenupfü sie Joab ki, “Dahouu mho geinu puo tsü kelhoupie n tsüshütuo ho.”

²² Sitse thenupfüe puo mhasi nu rhükelieu se themia peteko ki vo. Sitse ukoe Bikri nuou Sheba tsü zielie, sidi süu kelhoupie Joab tsüwa. Süla puoe ketsüu khoushü, sidi ukoe nadiu nunu tuota, mu uko pete u thuo u kinu vo phreta, mu Joab-e Jerusalem nu kediu ki vota.

²³ Hateiki Joab-e Israel rüpfhünuo pete mhokezha chü ba; Jehoiada nuou Benaiae Keretmiako mu Peletmiako mhokezha chü;

²⁴ siro Adoram-e mhatho themiako mho ba; Ahilud nuou Jehoshafat-e kethuu chü;

²⁵ Sheva bu kethuu chü; Zadok mu Abiathar bu zievo chü;

²⁶ tsiu Jairmia Irae David zievo-u chü.