Samuel Kenieu 17 - Angami Naga CL (Re-edited) Bible (BSI)

¹ Süsie rei Ahithofel sie Absalom ki, “A bu mia nyie kerekenie kedaliecie, sitse a tsiezhü sie di David whuotuo.

² Sidi puoe thachü tsiu puo nyie keba ki a puo gei phituo, di puo kedeshütuo; sitse themia puo ze ketuo pete tatatuo. A kediu rübei dukhrituo.

³ Siro yasapfüe puo nupfuu ki la kevor tuoi di a themia pete ze la vor n tsüwatuo. Noe mia puo kerheiro rübei pfhüya, mu themia pete kezevi di batatuo.”

⁴ Sitse pukeshü süu Absalom mu Israel phichüko pete nei chülie.

Hushai Ketarhokecü

⁵ Sitse Absalom sie, “Arkit-u Hushai rei sa kieshücie, sidi puo kedipuo putie shi úko keze rünyüshü khe.”

⁶ Sidi Hushaie Absalom ki vor tse, Absalom sie puo ki, “Ahithofel hamhiekecü puyalie; úko puo pukeshü kemhie chütuo me? Mhanuü silie lho ro, no hie ki pushülie.”

⁷ Sitse Hushai sie Absalom ki, “Ahithofel tarhokeshü dieu tsieu va la vi mote.”

⁸ Siro Hushai pu sa di, “Noe n puo mu puo themiako terhümiavimiacü si ba, mu ukoe u nou meyiemehü bate, lie nu thega krüpfü mia puo nuonuo chüseketa kemhie bate. Süsie rei, n puoe terhü chü sithor; puoe chüpahiko ze di teizeizhau rei pevolie lho.

⁹ Siro tsie zorei puoe vo kheho puo nu rüshü ba, morei thechü kekrei huora rei batuo. Siro keperhiekecü therie nu u chüpahi huo penyüwa, sidi kehoupuorei süu kesimia sie, ‘Absalom siemedziketuo chüpahiko u thuo u donu kegei bate,’ isituo.

¹⁰ Sitse terhümiavi kethepfutho-u, puo meloue losha melou kemhiekecüu rei michie di ze jütatuo; kekreilamonyü Israel pete rei n puoe terhümiavimia, mu puo ze ketuokoe terhümiavimia kethepfuthomia ücü si ba.

¹¹ Derei a tarhokeshü liro Israel pete kie kengupie n kitsa shüliecie, Dan nunu vo Beersheba ketso, dzükezha khie huocanyo tuoi zolie, sidi n thuo, mia puo chü di terhü nu voliecie.

¹² Sidi hiekoe puo ngulie kevira nu puo gei phituo, sidi thezei krü kijü ketsur tuoi hieko puo gei tsurlietuo; siro puo morei puo ze ketuo kehoupuorei pesha pie balie lho.

¹³ Mhanuü puoe nadiu nunu tsiesieta tse, Israel pete-e kero se nadiu nu vorlietuo, sidi hieko süu teshüse kerü nu votatuo, ketsie kecünuo yopuo zokecü rei keba chie siwa zotuo.”

¹⁴ Sitse Absalom mu Israelmia pete sie, “Arkit-u Hushai tarhokeshüu Ahithofel tarhokeshü ki vikuote.” Jihovae Ahithofel mharhüu penyüwatuo ücü la, süusü Jihovae kepeka pie Absalom gei vorshüketuo la zo.

Hushaie David bu Rüshütanu Pukeshü

¹⁵ Süsie Hushai sie zievomia Zadok mu Abiathar ki, “Hakemhie di Ahithofel-e Absalom mu Israel phichüko tarhoshü; mu hamhie di a ketarhoshüwe.

¹⁶ Süla rükri di mia ketsepie David ki, ‘Tsiezhü rayha razhau nu zhü motalie, derei kehouchürei ketsa khie votaliecie, si moliro kediu mu puo ze ketuoko pete mezulie rei si lhomu’ ishüliecie.”

¹⁷ Siro Jonathan mu Ahimaz unie En-rogel nunu pfhe ba; kituopfü yopuoe haki vor di unie ki mha pushüyacü la, mu unie-e vo di kediu David ki pu lalieya; kekreilamonyü unie-e nadi nu ler di mia bu ngu suokecü la.

¹⁸ Derei thepfu yopuoe unie nguwa, sidi Absalom ki puwa; süla unie kenienie rei rükri tuota, sidi Bahurim bu mia puo ki vorta, puoe puo kitiezha nu dzükhou baya; sidi unie-e sünu lelie.

¹⁹ Sitse themiau kimiapfüe mha kewhe puo se vor dzükhouu whewa, sidi sügei telha khashüwa; süla sünu mhapuorei silie kenjüta.

²⁰ Siro Absalom kituoko vor di kiu nu thenupfü ketso di sie, “Ahimaz mu Jonathan unie kirapuo ba ga?” Sitse thenupfü sie unie ki, “Unie-e rücüu cie vote.” Sidi unie pfhü derei ngulie mota, sidi ukoe Jerusalem nu la vota.

²¹ Ukoe tuoketa sie, themianie dzükhou nunu parlie, sidi vo kediu David ki pushü. Unie sie David ki, “Sielie di tuo rükri dzüu cie votalie; kekreilamonyü Ahithofel n petsou di hakemhie pushüte.”

²² Süla David mu puo ze ketuo themia peteko sielie di tuo Jordan cie prata; sidi khise teiso kevor ki Jordan ciepfülie kemonu miapuorei tuo mota.

²³ Siro Ahithofel-e puo tarhokeshüu medzi moketa ngulie tse, puoe puo gada gei pfülie di tuo puo thuo puo nadiu nu puo kinu vorta. Siro puoe puo kinu mhako kepfewa, sidi puo thuo puo gou khriwa, sidi puo siata mu puo puou mekhru nunu puo khruwa.

²⁴ Süsie David-e Mahanaim nu vorlie, süki Absalom-e Israel thepfumia pete ze di Jordan rüu ciepfülie.

²⁵ Siro Absalom-e Amasa bu Joab sou nu rüpfhünuo mhokezhau chüta. Amasae Ishmaelmia Ithra nuou, puoe Abigail, Nahash nuopfü Zeruia üpfü Joab-nuo zuo lielie.

²⁶ Ishmaelko mu Absalom-e Gilid kijü nu razhü chü balie.

²⁷ Siro David-e Mahanaim nu vorlie tse, Raba nu Ammonmia Nahash nuou Shobi, Lo-debar nu Amiel nuou Makir, siro Rogelim nu Gilidmia Barzilai,

²⁸ thezhüko, mekhouko mu rünyo liko, telha, barli thoulha, lhako, rücü mu kerhü thuokecü,

²⁹ mepfhidzü mu thunudzükhie, tekuo, tsiu chis, David mu puo themiako bu cüketuo la se vor; kekreilamonyü ukoe sie, “Chüpahikoe rayha nu merü, mezie mu terhü bate,” isikecü la.