Samuel Kenieu 16 - Angami Naga CL (Re-edited) Bible (BSI)

David Ngumvüko

¹ Siro David-e kijüthou mezüu tse za volie tse, Mefiboshet kituou Ziba vor puo ze kese, puoe gada keniekese se mha toupfü tuo, mu süko gei niekhrüda krie kenie, chiedesi phro krie puo, teile nhasi krie puo mu khubedzüpou puo se tuo.

² Sitse kediu sie Ziba ki, “No kiüdi mha hako se vor ga?” Sitse Ziba sie, “Gadako liro kediu kinumiako bu seketuo la, niekhrüda mu teile nhasiko liro khriesako bu cüketuo la, mu khubedzü liro rayha nu phisiataketuoko bu krieketuo lalie.”

³ Sitse kediu sie, “Siro n niepuu nuou kirapuo ba ga?” Ziba sie kediu ki, “Puoe Jerusalem nu bate, kekreilamonyü puoe sie, ‘Thie Israel kiue a puotsa kedirüvie kha lapie a tsütuo,’ siyalie.”

⁴ Sitse kediu sie Ziba ki, “Mefiboshet vieko pete sü tsie we n viete.” Sitse Ziba sie, “A rünuotsu n keluzhie; a bu n mhodzünu n neiu chüliecie, a niepuu kediu.”

Shimei David Rüsekewa

⁵ Siro kediu David-e Bahurim ki vor tse, Saul kinumia puo vor, puo zae Shimei, Gera nuou, puoe tuo vor chakhrie mia rüpfhürüse tuo.

⁶ Sidi puoe ketsie kelhoupie David tsiu kediu kituoko pete pe; siro themia pete tsiu terhümiavimia pete puo zatsa mu puo vitsa tha.

⁷ Shimeie shie chakhrie mia rüse di, “Parliecie! Parliecie! mia kedukhriu! kejokemouu!

⁸ Jihova kinumia zie pekrukewa pete la khepu se nie pete gei vorshütuo, no puo sou nu kedi chüwate; siro Jihovae kedibau pie n nuou Absalom dzie nu shüwate. Harie, kepekae n teshüse bate, kekreilamonyü noe thezie pekrukecü themia puo.”

⁹ Sitse Zeruia nuou Abishai sie kediu ki, “Kiüdi tefü kesia hau bu a niepuu kediu rüsetuo ga? A bu puo ki vo di puo tsü ziewacie!” sita.

¹⁰ Derei kediu sie, “Nie Zeruia nuonuoko, a nieko se kedipuo chü ta? Kekreilamonyü mhanuü Jihova puo bu mia rüpfhürüsetuo üdi puo ki, ‘David rüsewalie’ ita liro supuonie sie, ‘No kiüdi hakemhie chüya ga?’ isilie vi me?”

¹¹ Sitse David sie Abishai mu puo kituo pete ki, “A nuou thuo a kerheiro pfhü bate, di siliro Benjaminko we ha kezie rei si latie, puo bu mia rüpfhürüse balie; kekreilamonyü Jihovae puo bu silienushüwate.

¹² Jihovae a kemezhiekecü mehoshü, sidi puo thie a rüpfhürüsekecü hau la Jihova mha kevi se a tsü rei silie lhomu,” sita.

¹³ Süla David mu puo themiako cha nu tuo vozhü, mu Shimei rei uko petsou di kijüthou lutsatie vozhü, tsiu puoe tuo chakhrie mia rüpfhürüse; ketsie kelhoupie puo pe, tsiu nyophe kelhoupie puo gei shü.

¹⁴ Siro kediu mu puo ze ketuo themia pete vor Jordan tsokelie ki mezie tuota, süla puo sünunu rüleilie.

Ahithofel Miatarhokecü

¹⁵ Siro Absalom mu Israelmia pete Jerusalem nu vorlie; Ahithofel-e puo ze tuo.

¹⁶ Siro David khrietho-u Arkitmia Hushai-e Absalom ki vor di sie, “Kediu bu rhei kechau chülie! Kediu bu rhei kechau chülie!”

¹⁷ Sitse Absalom sie Hushai ki, “Hauha n zemia gei n tsei n vi thakeshüu me? Kiüdi no n zeu ze vo mo ga?”

¹⁸ Sitse Hushai sie Absalom ki, “Molie, derei Jihova mu themia hako tsiu Israelmia pete supuo kedalietie shiü, a rei sünu tuo, mu a puo ze tuotuo.

¹⁹ Sizomoü, a bu supuo lie chütuo ga? Süu puo nuou mo üme? A n puo lie chükecü tuoi, sütuoi a n lie chütuo.”

²⁰ Sitse Absalom sie Ahithofel ki, “N ketarho die se hie ki pushülie; hie bu kedipuo chütuo ga?”

²¹ Sitse Ahithofel sie Absalom ki, “N puo pelipfüko, puoe khapie ki pfhe bakecüko ki nu lecie, sitse Israel pete-e noe n puo ngumecükecü silietuo, silie ro themia n kitsa ketuo pete dzie meteilietuo,” sishü.

²² Süla ukoe Absalom la kiu mho geinu pfheki puo pethushü, sidi Absalom-e Israel pete mhodzünu puo puo pelipfüko kinu le.

²³ Süki Ahithofel ketarho die-e, mia puoe Ukepenuopfü kinu mha ketsokelie mhieta zo; süla Ahithofel tarhokecü dieko David rei mu Absalom rei rhuta.