Samuel Kenieu 14 - Angami Naga CL (Re-edited) Bible (BSI)

Absalom-e Jerusalem nu La Vorkelie

¹ Siro Zeruia nuou Joab-e kediu noue Absalom gei bakecü ngu touta.

² Sitse Joab mia ketsepie Tekoa nu shü, sidi thenu mhakesimiapfü puo ze vor. Sitse puo sie hapfü ki, “No thekrü kechümia do chüliecie, sidi thekrü kechü pfhenei selie, mu tier pie n tsü kenhe hie, derei thenupfümia puoe puotei kecha kesia krükra tuoketa do chüliecie.

³ Sidi kediu ki vo di hamhiekecü se pushülie.” Sidi Joab-e dieko khapie hapfü tie nu shü.

⁴ Siro Tekoa nu thenupfüe kediu ki vor tse, puoe zeretsu di kijü zhülie, sidi puo kelushü, sidi sie, “He-i kediu, a khruohishücie!”

⁵ Sitse kediu sie puo ki, “N noukemezhieketuou kedipuota ga?” Hapfüe la sie, “Aya, a sü samimiapfü puo zo; a nupfue siate.

⁶ Siro n kituopfü puo nuo kenie nyi, mu unie-e lie nu kegei; süki miapuorei unie khrüketuo tuo mota, süla mia puoe kekreiu vüshü di puo dukhriwate.

⁷ Süla kikruu pete sier n kituopfü petsoute. Sidi ukoe sie, ‘Puo siezeu dukhrikewa themiau khashücie, sitse puoe dukhriwaketa puo siezeu mese nu hie puo dukhriwatuo, puo thuo puo kau pejüwata zotuo ürei!’ isite. Hamhie di ukoe a mitu peshapie kebayo pemhewatie, sidi a nupfu kitsa kijüu gei theza morei mha peshakeshü tuo motatie,” sishü.

⁸ Süsie kediu sie thenupfü ki, “N ki nu votaliecie, a n la le di diekhashütuo.”

⁹ Sitse Tekoa nu thenupfü kediu ki, “Kejo-u pie a gei, mu a puonuoko kiu gei shüwalie, a niepuu kediu, kediu mu puo kediba bu kejo kejüu chülie” sishü.

¹⁰ Sitse kediu sie, “Mhanuü kehoupuorei n ki mha pu ro, puo ze a ki vorlie, sitse puo mhakipuorei n nyü salie lho.”

¹¹ Sitse hapfü sie, “N pezie rei kediu bu Jihova n Kepenuopfü pie n nou ki balie, sidi thezie khepu bu miapuorei dukhri sawa hiecie, mu a nuou rei pekawa hiecie.” Sitse puo sie, “Jihova rhei ketuo kemhie n nuo tsütha yopuo zokecü rei te kijü tsutalie lho.”

¹² Sitse thenupfü sie, “N pezie rei n kituopfü bu die cayo puo se a niepuu kediu ki pushücie.” Sitse puo sie, “Pushülie,” si.

¹³ Süsie thenupfü sie, “Si üro kidi no mha sikecü rhü di Ukepenuopfü themiako petsouta ga? Kekreilamonyü kediu mha pepikeshü haue puo thuo chü bate, süu kediue puoe whuo petakewamia ze vorlie mo bate.

¹⁴ U pete sia zotuo, u pete rei dzü lapie kijü shüwa, mu süu pfhü kengu lalie kemo mhie zo. Derei Ukepenuopfü we kerheiro chüsetalie lho; sirei puoe puo mhodzü nunu whuokewako kechachie khawa molieketuo do rhüya.

¹⁵ Süla a tsie a niepuu kediu ki, mha putuoü vorya, kekreilamonyü themiako a chü kemichiewa; süla n kituopfü lecü, ‘A kediu ki putuo; kediu puo kituopfü kecha chüshü rei silie lhomu.

¹⁶ Kekreilamonyü kediu rünyüshü, sidi Ukepenuopfü kayieu a mu a nuo hienie pekawatuoü kebau dzie nunu puo kituopfü kelashütuo.’

¹⁷ Siro n kituopfü lecü, ‘A niepuu kediu die geinu a bu rüleilietuo’; kekreilamonyü a niepuu kediu sü Ukepenuopfü dieliemia mhie zo, sidi mha kevi mu kesuo si kekreilieya. Jihova n Kepenuopfü bu n ze tuolie!”

¹⁸ Sitse kediu sie thenupfü ki, “A n ki chaketuou mhapuorei a kinu keviewa hiecie,” sitse thenupfü sie, “A niepuu kediu bu mha pushülie.”

¹⁹ Sitse kediu sie, “Mha hako pete nu Joab dzie-e n ze tuo mo üme?” Sitse thenupfü pu la di “A niepuu kediu, no rhei ketuo mhiei, a niepuu kediu pukeshü nunu miapuorei rürei thezatsa morei thevitsa votalie lho. Kekreilamonyü n kituou Joab a ketseshü zo; puoe die hako pete pie n kituopfü tie nu shü.

²⁰ Siro mhathoko bie kediwa kenyü la n kituou Joab-e mha hau chüshü. Derei a niepuu mhasi-e Ukepenuopfü dieliemia kijü nu mha pete siyakecü tuoi zo.”

²¹ Sitse kediue Joab ki, “Vi sewe, a hau chüshütuo; vo di khriesau Absalom ze vorlie.”

²² Sitse Joab tsu kijü zerepfü zhülie, sidi puo kelu, sidi japie kediu tsüshü sidi Joab sie, “Thie a n nei chülieükecü n kituou si bate, a niepuu kediu, süusü kediue puo kituou kecha chüshüte.”

²³ Süla Joab sielie di Geshur nu vota, sidi Absalom ze Jerusalem nu vorlie.

²⁴ Sitse kediu sie, “Puo bu puo ki nu votalie; puo bu a mhodzünu vor hie.” Süla Absalom-e puo thuo puo kinu vota, sidi kediu mhodzünu vor mota.

David-e Absalom Kejo Vakewa

²⁵ Siro Israel pete nu zivi tshekecü miapuorei Absalom kemhie tuo mo; puo phitshü nunu kho puo tsü gei keditsüre ketso kezisuo yopuorei tuo mo.

²⁶ Siro puoe puo tsü bekecü ki, puoe süu mejüya (kekreilamonyü puoe teiciekepra teicie thela ki puo süu bebeya, süu puo la mesiketa ki puo süu bewaya), sidi puo tsütha bekelieko mejükeshü ki kediu kemejü nu shekel krie kenie mejülie.

²⁷ Siro penuopie Absalom ketsü thepfumia se, mu thenumiapfü puo, puo za Tamar; hapfüe thenu kezivipfü puo.

²⁸ Süla Absalom-e ciete kenie kediu mhodzüki vor mo di Jerusalem nu ba.

²⁹ Süsie Absalom-e Joab kietuoü mia ketseshü, puo ketsepie kediu ki shüketuo la; derei Joab puo ki vor mvüta. Siro puo mia ketsepie va kenieu rei kie, derei Joab-e vor mvüta.

³⁰ Sitse puo sie puo kituoko ki, “Mehoshücie, Joab lie-e a lie sie tou nu ba, mu puo sünu barli leipie ba; vo di mi pie süko thewalie,” sishü. Süla Absalom kituokoe mi pie lieu thewa.

³¹ Sitse Joab-e sielie di Absalom ki vor di puo ki, “Kiüdi n kituoko mi pie a lie thewata ga?”

³² Sitse Absalom sie, “Harie, a n ki die ketsekeshü; haki vorcie, a n ketsepie kediu ki shü di puo ketso di ‘Kiüdi a bu Geshur nunu vorta ga? A we sünu ba zokecü a la vituomu ru!’ idi puketuo la. Siro tsie a bu kediu mhodzünu vocie; sidi mhanuü kejo huo a gei tuo üliro, puo bu a dukhriwacie!”

³³ Sitse Joab kediu ki vo di puo ki pushü. Sitse puo Absalom kieshü. Süla puo kediu ki vor di kediu mhodzünu zeretsu kijü zhüta; sitse kediu Absalom meboshü.