Samuel Kenieu 12 - Angami Naga CL (Re-edited) Bible (BSI)

Nathan-e David Pejokeshü

¹ Derei David mhachükeshüko Jihova neimo chüwa, süla Jihovae Nathan ketsepie David ki shü. Puoe puo ki vor, sidi sie puo ki, “Nadiu nu themia kenie ba, mia puoe mhanyi mu kekreiu mhajü.

² Mhakenyiue tekuokro mu kicükiri kekra ba;

³ derei mhakejüue mhapuorei jü derei tekuo, puo khrükelie yotele zo. Puoe süyo sesier, sidi süyoe puo mu puo nuonuoko ze di memie sier; süla süyoe puo kecücako cü, mu puo hieu nunu krie, mu puo merü gei zhü, süla süyoe puo mhodzüki we puo nuopfü kemhieta.

⁴ Siru mia puoe mha kenyiu ki vor, sitse puoe puo kuokro mu kicükiri nunu pie rüve puo ki kevor-u la mha kesewaketuo khrieta; derei mhakejüu kuo telie, sidi puo ki kevor themiau la mha kesewa.”

⁵ Sitse David themiau gei puo nou meyie seta. Sidi puo sie Nathan ki, “Jihova rhei ketuo mhiei, mha hau chükeshü themiau bu siatazhü zo;

⁶ puo bu tekuou sou va dia sutuo, puo hau chükeshü la mu puoe mia ngumezhie mokecü la.”

⁷ Sitse Nathan sie David ki, “Themia süusü no zo! Jihova Israel Kepenuopfüe puya: A n kenhe pie Israel mho kedi chüshü mu a Saul dzie nunu n kelashü;

⁸ a n niepuu kiu pie n tsü, mu n niepuu kimia khapie n merü gei shü, sidi Israel mu Juda kiu khapie n tsü, mu mhanuü süu n la tsathor üliro, a sü kezie rei khapie n tsü sashütuo.

⁹ No kiüdi Jihova dieu rütseta di puo mhinguki mha suo ükecüu chüwata ga? No zhiechau se di Hit-u Uria dukhriwate, sidi puo kimia liepie n kimia chüliete, sidi Ammonmia zhiecha se puo dukhriwate.

¹⁰ Süla tsie zhiechau mhakipuorei n kiu therhielie lho, no a thepesuowaketa la.

¹¹ Jihovae puya: A mha kesuo pie n gei sier tuo mu n kiu thuo n petsou; mu a n kimianuoko n mhodzü chüsetatuo, sidi süko khapie n zanuou tsüwatuo, sidi puoe niaki hau mhinguki nu n kimiako zezhüwatuo.

¹² Kekreilamonyü no süu pekhre di chüwate, derei a hau Israel pete mu niakiu mhodzü nunu chüshütuo.”

¹³ Sitse David sie Nathan ki, “A Jihova mhodzü jowate.” Sitse Nathan sie David ki, “Tsie Jihova n kephouma vashüwate; no siatalie lho.

¹⁴ Sirei, no mhatho hau nu Jihova pesekecü chüwate, süla nuo penuopie n ketsüyo siata zotuo,” sishü.

¹⁵ Süsie Nathan puo kinu la vota. Siro Jihovae Uria kimia penuopie David ketsüyo bieshü, süki süyo mhachü seta.

Bathsheba Nuoyo Siaketa

¹⁶ Süla David-e Ukepenuopfü ki unuoyo la cha; sidi David-e mevo, tsiu tuo le di teizeizha pete kijü zhü.

¹⁷ Siro puo kinu phichüko puo khieki vor thalie di puo bu kijü nunu sielienu pu bei zo; derei puo mvü tsiu kecüca puorei uko ze cü mvüta.

¹⁸ Si ba di zha thenie nhie unuoyo siata. Siro David kituoko unuoyo siaketa puo ki pu michieta; kekreilamonyü ukoe sie, “Unuoyo rhei baluokecü ki, uko puo ki mha pu, sirei puo u die rünyü mo; siliro we kimhie di unuoyo siaketa se puo ki pulie vi ta? Puoe puo thuo puo pechüpenyüta rei si mo?” sita.

¹⁹ Derei David-e puo kituoko kenoupu keba ngu tse, unuoyo siaketa lelieta, sidi David sie puo kituoko ki, “Unuoyo siate me?” Sitse uko sie, “Puo siate,” ishüta.

²⁰ Sitse David kijü nu sielie, sidi dzürüluwa, tier pie puo kenhelie, sidi puo pfheneiko thulilie. Süsie puo tuo Jihova kiu nu vota, sidi puo rüsuota; süsie puo tuo puo kinu vota; siro puo mha chashü tse, uko kecüca se vor puo mhodzünu shü ru puoe cülie.

²¹ Sitse puo kituoko sie puo ki, “No mhachükeshü hau kedipuote mu? No unuoyo rhei keba ki we puo la mevo mu kra ba; derei unuoyo siaketa sie, no sielie di mhacüliete.”

²² Sitse puo sie, “Unuoyo rhei keba ki we a mevo mu kra, a lecü, ‘Jihova a ngumezhieshü di unuoyo bu rheilie rei silie lhomu’ icü lalie.

²³ Derei tsie we puo siate; a kiüdi mevo ba ta? A puo ze la vorlie vi me mu? A üthoü puo ki votatuo, derei puo we a ki la vor lhote,” sita.

Solomon Lhoukelie

²⁴ Süsie David puo kimia Bathsheba nou thupeluoshü, süsie puo ki le di puo zezhüwa, sitse puo thepfunuomia puo penuoshü, mu puoe puo zathopie Solomon chülie. Jihovae puo khrie,

²⁵ sidi siedzekesiu Nathan ketseshü; süla puo unuoyo za thopie Jedidia chü, Jihova puo khriekecü la.

Ammonko Penyükewa

²⁶ Siro Joab-e Raba nu Ammonmiako perhie, sidi kediu rünau lielie.

²⁷ Süsie Joab dieliemia ketsepie David ki shü di sie, “A Raba ze kegei, sidi dzü nadiu lieliete,

²⁸ tsie süla themia lhiepie kebako kie kenguliecie, sidi nadiu perhiecie, mu süu lieliecie, moro a thuo süu lielietuo, sidi süu pie a za kielietuo.”

²⁹ Süla David-e themia peteko kie kengulie di Raba nu vo, sidi süu perhie di süu lielie.

³⁰ Siro puoe Milkom tsü geinu keditsüreu bielie; süu meseie suna talent puo, mu süu nu ketsie puoma kere sa ba; mu süu khapie David tsügei shülie. Siro puo nadiu nu mha pekakelieko raka kekra ma rei sa se par.

³¹ Siro puoe themia sünu kebako ze par, sidi uko bu seizhie mu thegi kathi tsiu seidurü se mhachü, siro uko ketsepie nyorie kerie thoko chü. Siro puoe Ammonmia nadiko pete nu hakemhiei chüshü. Süsie David mu puo themia peteko Jerusalem nu la vorta.