Samuel Kenieu 11 - Angami Naga CL (Re-edited) Bible (BSI)

David-e Bathsheba ze Pieü Chükewa

¹ Siro bayie teiu nu, kedimiako terhü nu voyakezha teiki, David-e puo kezhako pie Joab mu Israel pete sa di ketseshüwa; sidi uko Ammonmiako pekawa, mu Raba re. Derei David-e Jerusalem nu bata.

² Si ba di thevatie, David-e puo zhü nunu sielie di kediu ki mhogei rühou tuo, sitse puoe ki mho geinu thenumiapfü puo dzürülu keba ngu; thenupfü zivithor.

³ Sitse David-e thenupfü dze ketsotuoü mia ketseshü. Sitse mia puo üse, “Hapfüha Bathsheba, Eliamnuopfü Hitmia Uria kimiapfülie,” ishü.

⁴ Süla David-e dieliemia ketseshü di puo ze vor, mu hapfü puo ki tuo ler, sitse puo hapfü ze zhüwa. (Hateiki hapfüe kerhu sekecü nunu puo chü kemesawata.) Süsie hapfü la puo thuo puo ki vota.

⁵ Thenupfü puo rübei mo bata; süla hapfü mia ketseshü di David ki, “A phoupiemo bate,” ishü.

⁶ Süla David die ketsepie Joab ki shü di, “Hit-u Uria ketsepie a ki shücie,” ishü. Süla Joab-e Uria ketsepie David ki shü.

⁷ Siro Uriae David ki vor tse, David-e Joab mu puo themiako kedipuo mhie ba shi, mu terhü kechü kimhie ba shicü ketso.

⁸ Süsie David-e Uria ki, “N kinu kelie di n phikhrüwacie.” Sitse Uria kediu ki nunu tuota, süki kediue mha khapie puo ketsü ketseshü.

⁹ Derei Uria we puo niepuu kituoko pete ze di kediu kikha ki zhüta, sidi puo kinu vo mota.

¹⁰ Siro ukoe kediu ki, “Uria puo ki ke mowe.” Sitse David sie Uria ki, “No rüve tuo di vor zo. Siro kiüdi n kinu vo mo ga?”

¹¹ Sitse Uria sie David ki, “Dietseidiekhobouu mu Israel tsiu Judae pru nu ba zo, siro a niepuu Joab mu a niepuu kituoko pete phouyo nu ba zo; siüro a a kinu ke di mhacümhakrie di a kimia zezhütuo me? No rhei ketuo mhie, tsiu n ruopfü rhei ketuo mhie, a mha haikecü chülie lho.”

¹² Süsie David sie Uria ki, “Thie rei sa batalie, mu a sodu nu n ketsewatuo,” si. Süla Uria sünhie sa Jerusalem nu bata. Süsienhie,

¹³ David-e puo bu puo mhodzünu mhacümhakrietuoü kieshü, sidi puo die kemezewa; mu thevatieta tse puoe puo niepuu kituoko ze zhütatuoü puo zhü nu vota, sidi puo kinu vo mota.

David-e Uria bu siaketa

¹⁴ Siro süsieduü, David-e leshü puo thupie Joab tsü, sidi süu pie Uria dzie nunu ketseshü.

¹⁵ Leshüu nu puo thukeshü “Uria ketsepie terhü keretho nu shücie, sidi no puo kinu tuotalie, sitse puo biewa di siatatuo,” sishü.

¹⁶ Siro Joab-e nadiu re ba zo, mu puo Uria ketsepie terhümiavimia tha nu shü.

¹⁷ Sitse nadiu nu themiako tuo par di Joab ze kegei; siro themiako donu ketuo David kituomia huo siata. Sünu Hit-u Uria rei sa siata.

¹⁸ Sitse Joab-e terhükegeikecü dze pete ketsepie David ki pushü.

¹⁹ Sidi puo dielieu ki, “No kediu ki terhükegeikecü dzeko pu tseikewa,

²⁰ ki mhanuü kediu puo nou meyie parta, mu puo n ki, ‘Kiüdi nieko terhü chütuoü nadi penuo phi vo ga? Niekoe uko dahou geinu theü cieshüyakecü si mo me?

²¹ Supuonie Jerubal nuou Abimelek dukhriwa ga? Thenumiapfü puoe dahou geinu mha kegetsie puo kelhoupie puo peshü di puo bu Thebez nunu siata mo üme? Kiüdi nieko dahou penuo se phi ga?’ isi ro, no sie, ‘N kituou Uria Hit-u rei sa siate,’ ilie.”

²² Süla dielieu tuota, di vor David ki Joab pukecü pete pushü.

²³ Dielieu sie David ki, “Themiako hieko mhokuo vorta, sidi lie nu hieko perhie vorta; derei hieko kharu nu kele kinu uko whuo pesie lawa zo.

²⁴ Sirei dahou geinu theü ciepie n kituoko peta; sidi kediu kituoko huo rei siate; mu n kituo Hit-u rei sa siate.”

²⁵ Sitse David sie dielieu ki, “No hakemhie di Joab ki pushülie, ‘Mha hau bu n nou chü kemezhie hie, zhiechae tsie rei kenuo rei mia dukhriwayacü la; nadiu perhiezhü zolie, sidi süu penyüwacie.’ Sidi puo chü kethepfushülie,” ishü.

²⁶ Siro Uria kimiapfüe puo nupfu siaketa silie tse, puoe puo la thekrü chü.

²⁷ Siro thekrü kechü teiu tseita tse, David-e mia ketseshü di hapfü ze puo ki vorta, sidi hapfüe puo kimia chüta, tsiu thepfu puo penuoshü puo tsü.