Samuel Kenieu 10 - Angami Naga CL (Re-edited) Bible (BSI)

Ammonko mu Siriako Penyükewa

¹ Siro puotei huo sie Ammonko kediu siata, mu puo nuou Hanun puo sou nu kedi chülie.

² Sitse David sie puo ki, “A ketseikevi thapie Nahash nuou Hanun kieshütuo, puo puoe a gei tseiüvikeshü tuoi.” Süla David-e puo puo siaketa la thenousuo keba thupeluotuoü themia ketsepie puo ki shü. Siro David themiako Ammonmia kijü nu kekelie ki,

³ Ammonmia kedinuoko sie uko niepuu Hanun ki, “David-e thenou chü peluoketuo ketse n ki keshü ha no puo üse n puo kerhu la ükecü leya me? David-e puo themia ketsepie n ki keshü ha nadiu pfhü meho, süu rie mu süu chü kelhouwaketuo la mo üme?”

⁴ Süla Hanun-e David ketsekeshü themiako telie, sidi uko tiemie tietsa puopuokecü thiewa, siro uko boulieu metsuo nunu cierhawa, di uko ketsewa.

⁵ Siro süu David ki pushü tse, puoe mia ketsepie uko ki shü, themiako mengathor tuoketa la. Kediu sie, “Nieko tiemie tsülie kemochie Jeriko nu batacie, süsie nu la vorliecie,” sishü.

⁶ Siro Ammonmiakoe uko David thepesuokewa ngulie tse, Ammonmiako mia ketsepie Bet-rehob nu Arammia, siro Zoba nu Arammia zha khrülie, phituo chüpahimia nyie mepfü, süsie Maka kediu themia nyie puo rei sa, tsiu Tob themia nyie kerekenie.

⁷ Siro David süu sikeshü ki, puoe Joab mu terhümiaviko ze di chüpahi pete ketseshü.

⁸ Siro Ammonko par di kharu mhodzüki u kesepfü thalie; derei Zoba mu Rehob Arammiako, tsiu Tob mu Maka themiako we phouyo nu bata.

⁹ Joab-e terhü puo mhodzütsa siro puo sietsa puo perhie baketa ngulie tse, puoe Israelmia kethepfu huo kedalie, sidi uko bu Aramko perhie.

¹⁰ Siro puo themia keshako Joab-e puo siezeu Abishai pelewa, sidi puo bu uko pie Ammonmia perhie balienuwa.

¹¹ Siro puo sie, “Mhanuü Aramko a la kuothorta liro, no a khruohi morosuo; derei mhanuü Ammonko n la kuothorta liro a vor di n khruohituo.

¹² Thepfulie, sidi avu themiako la, mu Ukepenuopfü nadiko la thepfulie khe; mu Ukepenuopfü bu puo mhiki vi ücüu chüliecie.”

¹³ Süla Joab mu themia puo ze ketuoko Aramko perhietuoü rüyachünu phi; sitse ukoe puo mhodzü nunu tata.

¹⁴ Siro Ammonmiakoe Aramko taketa ngu tse, uko rei sükemhie Abishai mhodzü nunu ta lata, sidi nadiu nu leta. Sitse Joab la vor di Ammonmiako ze kegei, sidi Jerusalem nu vorlie.

¹⁵ Derei Aramko Israel bu u penyüwaketa ngu tse, uko thuo vo kengulie.

¹⁶ Sitse Hadadezer ketseshü di vo Arammia Eufrat rü khie kebako ze vorta; mu ukoe Hadadezer chüpahi mhokezhau Shobak bu uko krüta chü di Helam nu vorlie.

¹⁷ Siro süu se David ki pushü tse, puoe Israel pete kie kengulie, sidi Jordan cie par di Helam nu vorlie. Sitse Aramko David petsou di puo ze kegei.

¹⁸ Sirei Aramko Israel mhodzü nunu tata; sidi David bu uko kierbagei krie thenie, mu kierkese mia nyie hiedia dukhriwa, tsiu chüpahi mhokezhau Shobak bie kerüzawa, sidi puoe sükinu siata.

¹⁹ Siro kedimiako Hadadezer kituo chüyakezhako Israel-e uko penyüwaketa ngu tse, ukoe Israel ze vitho chüwa, sidi uko lie chüta. Sidi Aramko Ammonmia khruohi sa michieta.