Samuel Kenieu 1 - Angami Naga CL (Re-edited) Bible (BSI)

David-e Saul mu Jonathan la Krakecü

¹ Siro Saul se sie, David-e Amalekmia geiwa di la vorta, mu David-e teisozha kenie Ziklag nu bata.

² Sidi zha se nhie, mia puoe Saul razhüchü nunu vor, puo pfheneiko rürha mu nyophe puo tsügei shüpfü tuo. Sidi puo David ki vorlie tse, te kijü tsu di puo kelu.

³ Sitse David sie puo ki, “No kirapuo nu vor ga?” Puoe sie puo ki, “A Israelmia razhüchü nunu tapraliete.”

⁴ David sie puo ki, “Thedzeko kimhie vota ga? A ki pucie!” Puo sie, “Chüpahiko rüyachü nunu tate, derei chüpahi kekra tetsu di siate; siro Saul mu puo nuo Jonathan rei siate.”

⁵ Sitse David sie thedze se kevor khriesau ki, “Kimhie di no Saul mu puo nuou Jonathan siaketa silie ga?”

⁶ Sitse khriesau sie puo ki, “A Gilboa Kijüthou gei vo tuo; mu sügei Saul-e puo rüngouu geinu puo rhüpfü tha, tsiu kierbageiko mu kier themiako puo khieki tha.

⁷ Sidi puo puo sietsa mehoshü tse, puo a ngulie, sidi a kieta. Süla a sie, ‘A haki bawe.’

⁸ Sitse puo a ki, ‘No supuo ga?’ si. A sie puo ki, ‘Ae Amalekmia,’ sishü.

⁹ Puo a ki, ‘Vorlie sidi a gei thashü di a dukhriwacie; a kemezhiethorte, sirei a kerheiroe tsie rei a gei ba zo,’ sita.

¹⁰ Süla a puo gei siethashü, di puo biekhriwate, kekreilamonyü puo tetsukezhü sie rhei la sierlie lhokecü a si toutacü la. Siro a puo tsü gei ketuo keditsüreu mu puo bou gei ketuo kethuou bielie, sidi hako se a niepuu ki vorzhülie.”

¹¹ Sitse David puo pfhenei chülie di süko cierhata; mu puo ze ketuo themiako rei sükemhie chü phre.

¹² Uko Saul mu puo nuo Jonathan, Jihova rüpfhünuoko mu Israel kiu la kra di thekrü chü mu mevo ba thevatie tso, sükoe zhiecha geinu tetsuketa la.

¹³ Süsie David-e thedze se kevor khriesau ki, “No kirapuo nu vor ga?” Puo sie, “Ae chazoumia, Amalekmia puolie.”

¹⁴ Sitse David sie “No n dzie yhapie Jihova kenhekelieu gei shüketuo michie mo me?”

¹⁵ Süsie David-e khriesako mia puo kielie di sie, “Haki vor di puo dukhriwaliecie,” sishü. Süla puoe süu dukhriwa.

¹⁶ Siro David sie puo ki, “N zieu thuo n tsü gei pfütuo; kekreilamonyü n tie thuo n petsou di pukecü, ‘Ae Jihova kenhekelieu dukhriwate,’ ikeshü la.”

¹⁷ Siro David-e thekrü chü di Saul mu puo nuo Jonathan unie krükrakecü hamhie.

¹⁸ (Siro puoe Theü Tsali hau pie Judako pethalienu diekhashü; süue Jashar Leshüdau nu thupie zhü.) Puoe sie:

¹⁹ He-i Israel, n zapuzayieu, n thechü kerükrieko geinu geipie zhüwate! Kimhie di kekuomia tetsute shi!

²⁰ Süu pie Gath nu pu hie, süu pie Ashkelon chaüko nu pesi hieluo; moro Filistinmia nuopfükoe u neituo, u zhürekemo nuopfükoe u nei lhe motatuo.

²¹ Nie Gilboa nu kijüthouko, thezei bu morei teirü bu nieko gei tsur motacie, morei lieko bu puosi vüshü motalie! Kekreilamonyü kekuomia pezhüu perhuwate, Saul pezhüu, tier pie kenhekelieu ba sa mote.

²² Dukhrikewamia zie nunu, kekuomia shuo nunu, Jonathan theü rürei la vor mote, morei Saul zhiechau methuo di vorlie mote.

²³ Saul mu Jonathan, thekhriekepfü mu u keneinie! Kerhei nu mu kesia nu rei unie chükhowa mo; unie tsüüra ki rei rükrikuo, unie loshako ki rei kuoko.

²⁴ He-i Israel nuopfüko, Saul la kraliecie, pfhe meriemegekecü, ketshukelhuo kechü pie nieko whekeshüu, suna pienyie pie nie pfheneiko gei ketsokeshüu.

²⁵ Kimhie di kekuomia rüyachü nunu tetsuta mu! N kijü kerükrieko geinu Jonathan geipie zhü.

²⁶ N la a nousuolie, a siezeu Jonathan; no sü a kekhriethomia zo; a gei n kekhrie sü u ngothor zo, thenumia kekhrie ki rei vi.

²⁷ Kimhie di kekuou tetsute shi, mu terhü rünyieko kaüjüte shi!