Ruth 4 - Angami Naga CL (Re-edited) Bible (BSI)

Boaz-e Ruth Liekelie

¹ Siro Boaz-e kharuu nu khorlie di sünu balie tse, harie Boaz-e pu keba keseyiekecüu vor. Sitse Boaz-e sie, “Yha! a zeu no haki vor di baliecie.” Sitse süue puo ki vor di ke balie.

² Siro Boaz-e rüna nu phichüko mia ker kielie di uko ki, “Haki baliecie,” siru uko ke balie.

³ Sitse puoe sie puo ze keseyiekecüu ki, “Moab nunu la vorketapfü Naomi-e úko siezeu Elimelek vie lietsa puo ze tieyalie.

⁴ A hau n ki putuoü ba: No haki kebako mu a rüna nu phichüko mhodzünu hau khrü nyü ro khrüliecie. No süu rhalietuo üro, rhaliecie, derei moüliro a ki pushü di a bu rhaliecie; kekreilamonyü no süu rhaketuo niepuu zo, mu n sieu sü a zo.” Sitse themiau sie, “A süu rhalietuo.”

⁵ Sitse Boaz la sie, “No Naomi mu Moabmiapfü Ruth unie dzie nunu kijüu khrükelie nhie, kesiamia kayie za khapie balieketuo la kesiau kimiapfü sa khrülie morosuo.”

⁶ Sitse themiau sie, “Sita liro a süu rhalie kenjü, a a thuo a kayie kebvükewa prei eru. No n thuo a mese nu süu rhaliecie, a süu rhalie kenjücü la.”

⁷ Süteiki Israelmia donu rhakelie mu kedzieyiekecü mhatho zasi thezho puo chüya: mu süu mha zekeshüue puo phikou rhuolie di pie kekhrüu tsüwaya; mu hau Israelmia donu zhapu kechü zho puo.

⁸ Sidi keseyiekecüue Boaz ki, “N thuo süu khrüliecie,” sidi puo phikou lhoushü.

⁹ Sitse Boaz-e sie phichüko mu themiako ki, “Ae thie Naomi dzie nunu Elimelek, Kilion mu Mahlon vie pete khrülieketa niekoe zhapuko zo.

¹⁰ Sizomonyü ae Mahlon kimia Ruth, Moabpfü rei khrülie di pie a kimia chüliete, süusü puo kayie geinu kesiamia za pie balieketuo la, tsiu kesiamia za bu puo siezedzüriemia donu, mu puo keba kharu nunu jüta molieketuo la. Hako pete la thie niekoe zhapukote.”

¹¹ Sitse phichüko mu kharuu nu kebako pete sie, “U zo, hieko hau kengu zhapukote eru, Jihova bu n ki nu kevor thenupfü chüpie Rachel mu Leah unie-e Israelmia kiu chükeshü mhieikelieu chüliecie; Efratha nu n nuonuo pelhoulie mu Bethlehem nu n za kemeyieu chüliecie,

¹² tsiu Jihova bu thenu hapfü geinu n seyie pelhoushü di n kiu bu Perez kiu Tamar-e penuopie Juda ketsü kemhieiliecie.”

Boaz mu Puo Nuosenuoyieko

¹³ Sidi Boaz-e Ruth lielie di pie puo kimia chüta. Siro unie keze lhoulie tse Jihova japie puo tsüshü, mu puo nuonipfülie di thepfunuomia puo penuolie.

¹⁴ Sitse thenupfükoe Naomi ki, “Jihova bu thetshekepfüu chücie, puoe thie ketso rei n seyie pejüwa mo, mu puo bu Israelmia donu meyiemeluo tuokelieu chüliecie!

¹⁵ Puoe n kerheiro chü kesa lashü mu no tsaketa nu nourhie kecüu chüliete. Kekreilamonyü n miepfü n khrieyakezhapfü thepfu thenie ki rei vikuocüpfü, puoe n tsunuo puo penuopie n tsüshüte.”

¹⁶ Sidi Naomi-e unuoyo chüpie puo merü gei shülie di theke bata.

¹⁷ Tsiu puo zanuopfükoe puo zathoshü, di sie, “Naomi la thepfunuomia puo penuoliete eru” idi puo za thopie Obed chüshü; puoe David-nuo puou Jese puou zo.

¹⁸ Hakoe Perez nuosenuoyieko: Perez-e Hezron-nuo puo,

¹⁹ Hezron-e Ram-nuo puo, Ram-e Aminadab-nuo puo,

²⁰ Aminadab-e Nahshon-nuo puo, Nahshon-e Salmon-nuo puo,

²¹ Salmon-e Boaz-nuo puo, Boaz-e Obed-nuo puo,

²² Obed-e Jese-nuo puo, mu Jese-e David-nuo puo.