Ruth 3 - Angami Naga CL (Re-edited) Bible (BSI)

Ruth mu Boaz Sie nu Kesekecü

¹ Süsie puo niapfü Naomi-e puo ki, “A nuopfü, a n bu lhou n neiketuo la kerülei puo pfhüshü morosuote.

² Siro tsie Boaz, noe puo kituopfüko ze ketuou u seyiemia zo. Harie, tsiezhü puo sieu nu telha hetuo üya.

³ Süla no dzürüluwa di tier pie n kenhelie, siro n pfhenei kevithoko chü selie di tuo sieu nu leliecie, derei puo bu mhacümhakrielie kemochie no supfü puo shikecü puo bu siwa hiecie.

⁴ Mu puo zhüketuo chüu si balie; di puo zhütsu tse; ke di puo phi hieshülie di süki zhüliecie; sitse puo n bu kedipuo chü morosuo shikecü n ki pushütuo ho.”

⁵ Sitse Ruth-e sie puo ki, “No a ki kepu peteko a chü zotuo.”

⁶ Sidi puo sieu nu tsulie, mu puoe puo niapfü puo ki kepu pete chülie.

⁷ Siro Boaz-e mhacümhakrielie di puo nou puo neilie, sidi telha kengupie kezhü phi ki tsu zhüta. Sitse Ruth-e pesikhuoi ke puo phi hieshü di süki zhüta.

⁸ Süsie khisoteiluo ki mhapuo themiau kerieshü, sidi puo rükhe pra tse thenumiapfü puoe puo phi ki zhücü ngulie.

⁹ Sitse puoe sie, “No supuo ga?” Ru puo sie, “A n kituopfü Ruth lie; süla n pfhetie kelhapie a wheliecie, kekreilamonyü noe a kinumia kepenuotho puota zeru.”

¹⁰ Sitse puoe sie, “A nuopfü, Jihova bu japie n tsücie; kekreilamonyü noe therieu ki rei tsie n kedietho thakuoshüte; mu noe khriesamia puo thuo mhajü rei nyi rei süko siemedzita mokecü la.

¹¹ Süla a nuopfü, tsie no michie hie a n kecha pete chüshütuo, kekreilamonyü a rüna nu themia pete rei no thenu kemiathopfü puo zokecü si batakecü la.

¹² Siro ae n seyie kepenuomia zo ükecü ketho zo, sirei a ki n penuokuokecü n seyiemia puo baluo.

¹³ No tsiezhü pfhe baliecie, mu khise puo n gei keseyiekecü mhatho-u chüshütuo üro, vi zo; puo bu süu chüshülie. Mhanuü puo n gei keseyiekecü mhatho-u chülie lho üro, Ukepenuopfü rhei ketuo tuoi, a n gei keseyiekecü mhatho-u chüshütuo. Süla tsie teisolie kemochie haki zhü zoliecie.”

¹⁴ Sidi Ruth-e teisolie kemochie puo phi ki zhü, ru hapfüe miapuorei huoniehuo silie kevi chüketa mhodzü sieta, kekreilamonyü Boaz-e sie, “Miapuorei bu thenumiapfü puo sieu nu vor ükecü si hiecie,” iketa la.

¹⁵ Siro Boaz-e puo ki, “No dzie keba pfheu se a ki vorshülie di teshü kelha thalie.” Mu puoe süu teshü thalie tse, Boaz-e telha zharha sorou medo pie hapfü bouka gei shü; sidi puoe rüna nu vota.

¹⁶ Puoe kinu vorlie tse, puo niapfüe puo ki, “A nuopfü no kimhiei ro?” Sitse puoe themiau puo gei kedipuo chüshü shikecü pete se puo ki pu di

¹⁷ sie, “Puoe barli lha zharha sorou hako khashü di a ki, ‘Dziethuo di n niapfü ki la volie lho,’ itelie.”

¹⁸ Sitse Naomi-e sie, “A nuopfü, n nou jü di pfhe balie, kedipuo kemhiei vortie shi silie kemochie, kekreilamonyü puoe thie mhatho-u chü tseilie kemochie themiau rüleitalie lho.”