Ruth 2 - Angami Naga CL (Re-edited) Bible (BSI)

Ruth-e Boaz Lie nu Siepfhükecü

¹ Tsiu Naomi nupfu kinumia mhanyi phikecümia puo, Elimelek chienuomia puo ba, mu puo za Boaz.

² Khunhie Moabpfü Ruth-e Naomi ki, “A bu suomia nei chülietie shiü sümia lie nu tsu di sie pfhücie.” Naomi-e puo ki, “Tsulie, a nuopfü.”

³ Sitse puoe tsu. Sidi puo vor liekereko sietsa nu siepfhü tuo. Ru puoe vor Elimelek-nuo kinumia Boaz lie nu tuota.

⁴ Siro süki Boaz-e Bethlehem nunu vor. Sidi lie kereko ki, “Jihova bu nieko ze tuoliecie.” Sitse uko rei sie puo ki, “Jihova bu ja n ketsüu chücie,” ilashü.

⁵ Sitse Boaz-e puo liereko kemeho kituou ki, “Hapfüha supuo rüüpfü puo shi?”.

⁶ Sitse liekereko kemeho kituou puo ki, “Hapfüha Moab kijü nunu Naomi ze kevor Moabmiapfülie:

⁷ mu hapfüe sie, ‘A n ki chayalie, a ngumezhie di a bu liekereko sietsa nu sie pfhülieyi’ sitelie. Sidi puoe vor, mu tsienu rüleikelieu zo moü khise nu tsie ketso mhachü te mo tha zo.”

⁸ Sitse Boaz-e sie Ruth ki, “A nuopfü, no a die siliecie, mia kekreimia lie nu vo siepfhü hiecie, morei hanunu tuota hiecie, derei haki a zetuopfüko penuo baliecie.

⁹ Siro liekereko meho di a zetuopfüko sie nu tuolie. A khriesako bu n kebvü suo ükecü pushüwate ho. Mu no terhütaü mha ro, vo di khriesako dzüü se vor keba mhabouko nunu krielieliecie.”

¹⁰ Sitse puoe puo zie pesulie di nuke kijü tsuta, di sie puo ki, “Kiüdi a nie n mhinguki n khriepfü hade chüliete shi, no a rüli lekecü ha, a sü solhimiapfü puo zemu.”

¹¹ Siru Boaz puo ki, “N nupfu siaketa yawinu no n niapfü gei kedipuopuo chüshü shiü, siro kimhiei zo di n puo n zuo tsiu n kepenuo rüna vawa di no thiedzü si mo zokecü themiamia ki vorte shicü thapie a kie phreshüwate.

¹² Niepuu bu no mhatho chükeshü pete la n zhakhra chüshücie, tsiu Jihova Israel Kepenuopfüu, no puo shükhro vor rüzhülieketau bu n zhakhra chü tseishücie!”

¹³ Sitse Ruth-e sie, “A niepuu, a bu n khriepfü seilie üthienyü, a sü n kituopfüko puorei ze ketou mo zorei noe die kevi pupie n kituopfü nou thupeluoshüte eru.”

¹⁴ Siro mhakecü tei vor tse, Boaz-e puo ki, “Hatsa vorlie, mu niekhrüda pielie di kekhrodzü nu se cülie.” Sitse hapfüe ke liekereko ze balie ru puoe lhako kethuokecü rei khapie puo tsüshü, mu puoe süko cü pevükelie sie rei pesha salie.

¹⁵ Süsie hapfüe sie pfhütuoü sieta tse, Boaz diekhashü di puo liekereko ki, “Puo vo liekhro donu siepfhü zorei puo kerhie hiecie,

¹⁶ sizomonyü liekhro nu telhakre zorei petepie zhüwaliecie, puo bu süko pa kengulieketuo la, mu miapuorei bu puo kerhie hiecie,” sishü.

¹⁷ Sidi Ruth-e khinhie nu theva ketso siepfhü kengulie. Sidi pfhükelieko nyülie, mu barli efa puo meseta.

¹⁸ Mu puoe süko toupfü rüna nu vorlie, mu puo niapfüe puo kidepuo toupfü vorlie shiü ngushü. Sizomonyü puo khinhie nouva cü kepeshako rei se par puo niapfü tsüshü.

¹⁹ Sitse puo niapfü sie puo ki, “No thie kirapuo nu mhachü ga? Suomia lie nu siepfhü ga? N rüli lekeshüu bu thejakepfüu chücie.” Süla puo sie, “A puo lie nu siepfhü pfüliekecüu za Boaz lie,” idi se puo niapfü ki pushü.

²⁰ Sitse Noami-e sie puo miepfü ki, “Jihova bu ja phipie puo tsücie, Jihova bu japie kesiamia mu kerheimia gei tseiüvikeshüu tsücie.” Tsiu Naomi sie puo ki, “Themia süu u chienuomia, u ze kepenuo perekecümia zo.”

²¹ Sitse Moabpfü Ruth-e sie, “Puoe a ki pu sa di, ‘A lie re tseilie kemochie no a liethoko ze bataliecie,’ silie.”

²² Tsiu Naomi-e puo miepfü Ruth ki, “No puo kituopfüko ze vokelieu n la vikuotuo, kekreilamonyü kekreimia lie nu tsu ro mia n pesewa rei silie lhomu.”

²³ Süla thoulha mu Barli lieyie tei tseita kemochie Ruth-e Boaz kituo rüüko ze bata, sidi Ruth-e puo niapfü ze lhou bata.