Rommiako 9 - Angami Naga CL (Re-edited) Bible (BSI)

Ukepenuopfü Israel Kedakelie

¹ A Khrista nu ketho touu puya, a tijü ba mo; mu Kemesa Ruopfü geinu a noule süue mezhü zo ücü zhapu chüya.

² A nou kemezhie mu a melou chütei-i tuoya.

³ Chülie vikecü sie we a chü a phou tsatie a themiako mu a se a yieko kelalieketuo la a bu rüsepfüta di Khrista kitsa a khawanu sie zotieciü.

⁴ Sükoe Israelmiako zo; mu uko peviepie nuothonuo chülieketako, zapuzayie, dietseidiekhoko, thezho-u khakeshü, rüsuokecü, mu pupie kezhüko rei süko vie;

⁵ upuonuoko rei uko vie, chüüphou tsa nu le vo ro uko geinu Khrista, mha pete mho kebau lhou vor, kechachie thetshepfülie kesü sü Ukepenuopfü zo. Amen.

⁶ Ukepenuopfü dieu chü tso mota mo zo. Kekreilamonyü Israelmiako pete rei Israel ketho zo mo,

⁷ mu Abraham nuonuo pete rei puo nuosenuoyie ketho phre mo; derei “Isak geinu n seyiemia za kiesietuo,” isi.

⁸ Hau ca liro chüüphou nuonuokoe Ukepenuopfü nuonuo mo, derei pupie kezhü nuonuoko üse puosepuoyie üte.

⁹ Hau la phrakeshü dieu pukecü, “Ha meseki a la vortuo mu Sara thepfunuomia puo penuolietuo,” si.

¹⁰ Siro sü rübei zo mo; Rebeka rei puo nupfu u puotsau Isak nuonuoko nuonipfükelie ki rei sükemhiecü puo chü.

¹¹ Puo nuonie penuokelie mhodzü kevi morei kesuo puorei chüwa mo zoluocü nu (Ukepenuopfü kedakelie mharhüu bu ba seilieketuo la,

¹² mhathoko la monyü puo u kiekelie la zo) puoe pukecü, “Phichüue nhicuu lie chütuo,” isi.

¹³ Süu thupie kezhü, “A Jakob khrie, derei Esau ngumecü,” si.

¹⁴ Siro we kedipuo pu sa ta? Ukepenuopfü gei kethoca ba mote me? Si mo zo!

¹⁵ Kekreilamonyü puo Mosa ki, “A ngumezhieketuomia ngumezhie zotuo, mu a khrieshüketuomia khrieshü zotuo.”

¹⁶ Süla süu themia medo morei u rhiechükecü geinu mo, derei Ukepenuopfü u ngukemezhieu la zo.

¹⁷ Kekreilamonyü kethodie-e Faro ki pukecü, “A n geinu a kekuo pesishü di a za pie kijü pete nu pushüketuo la a n se sierkeshü zo.”

¹⁸ Sidi puoe puo medomia ngumezhieya mu puo thuo puo medomia nou chü perewaya.

Kepenuopfü Noupfhü mu Ngukemezhie

¹⁹ Süla nieko a ki, “Siüro kidi puo mia kejo pfhülie vi ta? Kekreilamonyü supuonie puo medo-u perhielie vi ta?” idi putuo nhie!

²⁰ Sirei no themia zo di Ukepenuopfü prülikezha ha supuo ga? Chükelie mhanyau sie puo chükeshüu ki, “No kedipuo la a chüpie hiwa ga?” ilie vi me?

²¹ Lithomia puoe rügau se puo medo chü di huo chüpie therhu li chü mu huo chüpie therhu phikemo li chülie kevi puo kekuo jü üme?

²² Di siro mhanuü Ukepenuopfü puo noupfhü mu puo kekuo pie mia pekieshüketuo la pekawaketuoko gei puo nou cha ba üro mha puote me?

²³ Mu puoe pedzüperie zayie chüketuo la kedase tuoketako bu puo zayieu kinyiko nguketuo la sita üro,

²⁴ mu sünu Judamia donu rübei zomonyü Judakemomia donu rei kiekelie úko rei sata üro, we mha huo pulie vi me?

²⁵ Puoe Hosea nu pukeshü: “A themia kemoko ü, ‘A themiako’ üdi kielietuo, mu a khriekemopfü ü, ‘A khriepfü’ üdi kietuo.”

²⁶ “Siro thiedzü, ‘Nieko a themia mo’ idi uko ki pukeshüra nu, uko üse rhei tuoyakezha Kepenuopfü nuonuo üdi kietuo,” isi.

²⁷ Siro Isaya Israelmia dze pu shiekhoui di, “Israel nuonuoko thuo krapie dzükezha khie huocanyo mhie zorei, lhiekeliekoyo rübei kelakelie zotuo;

²⁸ kekreilamonyü Niepuu pecha mo di kijü hau ze mhachü kemezhüketuo dienyau pepi mhatuoü bate.”

²⁹ Mu Isayae pukeshü tuoi, “Krodiko Niepuu thuo huomia khapie u tsia chüshü kemosie, we Sodom mhieta mu u chüpie Gomora tuoiwa zotuo,” si.

Israel Pele Kemvü

³⁰ Siliro we kedipuo pu ta? Judakemomia, kemiatho pfhü kenounyü mo zocüko, süu nguliete, süusü kepele la miatholiete;

³¹ derei Israelko, thezho-u medzi di kemiatho la thehiechü tuo di thezho-u chü tseiütsolie mote.

³² Kedipuo la ga? Kekreilamonyü u kepele sa mo di uko mhathoko geinu ngulie thenyüsieketa la. Uko mia phi kemesü tsieu geinu uko phi mesüwate.

³³ Süu dze, “Harie, a mia phi kemesü tsie puo, mu mia perhekhrüwayakezha tsie puo pie Zion gei zhü ho, sirei themia kehoupuorei puo pelekelieu thenga chütalie lho,” idi thupie zhü.