Rommiako 6 - Angami Naga CL (Re-edited) Bible (BSI)

Jisu Ze Sia mu Rhei Lakelie

¹ Siro we kedipuo pu sa ta? Ngukemezhie bu kralieketuo la kephouma nu ba zotuo me?

² Suotuo! We kephouma kitsa siaketako kikidi sünu lhou sa volie vituo ga?

³ We Jisu Khrista nu dzülupfükelie pete rei puo seu nu dzülupfülieta zocü nie si mo me?

⁴ We dzülupfükecü nu puo seu ze puo chü di u khruwate, sidi Puou zayie üse kesia nunu Khrista chü perhei lakelie mhiei u bu rei kelhou kesa se lhou tuolieketuo la.

⁵ Kekreilamonyü we puo seu nu puo ze puo chülieta ro, puo mhiei we rei rheilakesie nu puo ze puo chülietatuo.

⁶ We u kephouma miau pejüwa di kephouma die chü sa molieketuo la themia keweu pie puo sa krus geinu gouwatakecü si touliecie.

⁷ Kehoupuorei siakewamia kephouma nunu phreishüta zocü la.

⁸ We Khrista ze siawata üro, we puo ze di rhei reilieketuo pelete.

⁹ Kekreilamonyü Khrista kesiako donunu rheikelie sie sia la salie lhotakecü we si bate; puo mho kesia puo kekuo ba sa mote.

¹⁰ Puo se süu, kephouma la vapuochü sia, puo rhei tuoketa kerheiu we Ukepenuopfü kitsa la zo.

¹¹ Süla nieko rei kephoumatsa siata zo, mu Jisu Khrista nu Ukepenuopfü kitsa rhei tuota ücü leliecie.

¹² Süla nieko siatalie kevi chüüphou menguko dieze chü di kephoumau bu cieürietaketuo nie mo-u mho di sa hie.

¹³ Nie mo-u gei za puorei khapie kephouma nu shü di mhatho kesuo chüketuo nya puorei chü hie, derei kesia nunu kerhei nu praketa themia chü di nie thuo nie pie Ukepenuopfü kitsa shülie, mu kemiatho mhatho chüketuo nyako chülieketuo la nie mo rei pie Ukepenuopfü kitsa shüliecie.

¹⁴ Silie ro kephouma nie mho di sa lhote, nie thezho-u khrükhro monyü ngukemezhieu khro baketa la.

Kemiatho Kituo Chükelie

¹⁵ Di siro kita? We thezho-u monyü ngukemezhieu khro baketa la kejokemou chü ba zotuo me? Suotuo!

¹⁶ Nieko si ba mo me, nie thuo nie khapie miadie chü di mha huo dieze chüketa ki puo dieze chüyakezhau diemiate, süu kephouma diemia liro kesia nu vo iya, mu die ze üro miathokelie nu voya mo üme?

¹⁷ Derei Ukepenuopfü peziewe, nie va puo kephouma die chü, derei süsie nie melou pete se ketho-u pie nie pethakeshü ngukelieu dieze chü tuote.

¹⁸ Kephouma nunu nieko shüphralie di nie bu kemiatho die chüliete.

¹⁹ Nie chüüphou thachücü la a themia rüli geinu nieko ki puya. Nie thiedzü nie phou kha tseipie mesa kemo mu suo miemieketau die chükewa tuoi, tsie we mesalieketuo la nie phou khapie kemiatho die chüliecie.

²⁰ Nieko kephouma die chü ketuo ki kemiatho kitsa ba mo.

²¹ Süla nie chükewa mhathoko la tsie menga keba nunu nie kedipuo kemevi ngulie ba ga? Mha süko thelaue kesia zo.

²² Derei nie tsie we kephouma cie pralie di Ukepenuopfü diemia chüte, süu siue nie chü kemesalie. Süu thelae kechachie kerhei.

²³ Kekreilamonyü kephouma zhakhrae kesia, sirei Ukepenuopfü u Niepu Jisu Khrista nunu methuo khapie u ketsüu we kechachie kerhei zo.