Rommiako 5 - Angami Naga CL (Re-edited) Bible (BSI)

Kepenuopfü Ze Kezevikelie

¹ Siro kepele geinu u chü kemiatholie di we rei u Niepu Jisu Khrista la Ukepenuopfü ze kezeviliete,

² puo geinu we ngukemezhie tha nu thakelie cha ngulie, mu we Ukepenuopfü zayieu kezaketuo kemerüu se u mhokuo chüya.

³ Mu sikecü rübei zomonyü we kemezhiekecüko nu rei u nei tuoya, kekreilamonyü kemezhiekeshü geinu shügeshühielieya,

⁴ siro shügeshühiekelie geinu u zho vilieya, tsiu u zho vikelie geinu kemerü nyilieya,

⁵ mu kemerü hau u nou chü pesuowa lho; kekreilamonyü pie u tsükewa Kemesa Ruopfü nunu Ukepenuopfü kekhrie rupie u nou shüwaketa la.

⁶ We thachü ketuo ki, Khristae puotei tou ki pelekemoko sou chü siawate.

⁷ Khatho zo moro miapuorei kemiathomia puo sou chü sia lho, derei lakipuo huomia themia kevimia puo la sia rei michie molie vi nhie.

⁸ Derei we kephoumamia chü ketuo nu rei Khrista bu u phousou chü siakeshü geinu Ukepenuopfü u khriekecü tha toushüwate.

⁹ Sizomonyü we tsie puo zie la u chü kemiatholieta üro, we puo la Ukepenuopfü noupfhüu nunu u kelalietuo ükecü si kemeciekuota zo.

¹⁰ Mu we puo ngumvümia chü ketuo ki thuo rei puo Nuou se la u bu Ukepenuopfü ze kezevilie liro, puo ze kezevikelie sie puo kerheiu la u kela reikuolie zotuo.

¹¹ Sü rübei monyü we tsie puo la kezevikelie u Niepu Jisu Khrista lanu Ukepenuopfü geinu u nei rei sa bate.

Adam la Kephouma mu Khrista la Kelakelie

¹² Siro mia puo la kephouma kijü vor, tsiu kephouma la kesia vor, mu themia pete phoumaketa la kesia rei themia pete gei vorta,

¹³ thezho-u mhodzü kephouma kijü nu tuo, derei thezho-u ba kemo ki kephouma rei si mo.

¹⁴ Sirei Adam geinu vo Mosa ketso kesia themia mho di, Adam kephouma kemhie chü kemoko gei zorei, Adam-e mia puo vortuoü ketuou rhiu zocü la.

¹⁵ Derei methuo pie u ketsüu we phoumakewa mhie mo. Kekreilamonyü mia puo phoumakewa la themia kekra siata liro süki rei Ukepenuopfü kinu kepar ngukemezhieu mu mia puo süusü Jisu Khrista u ngukemezhie la methuo khakeshüu we themia kekra kelhuo chükuotuo.

¹⁶ Siro methuo kha u ketsüu we mia puo phoumakewa mhie mo. Kekreilamonyü mia puo phoumakeshü geinu pejokewa vor, derei themia kekra phoumakewa la methuo khakeshüue chü kemezhükelie se vorshü.

¹⁷ Kekreilamonyü mia puo phoumakewa geinu kesia bu u mho di tuota liro, süki rei Jisu Khrista la ngukemezhie mu kemiatho methuo khapie u ketshukelhuo chükeshüue u kelhou gei di kuotatuo.

¹⁸ Süla mia puo kephouma la mia pete pejokewa tuoi, kemiathomia puo mhatho la themia pete bu mezhülie mu rheilie.

¹⁹ Mia puo dieze chü mokeshü geinu mia kekra chü kephoumakewa mhiei mia puo dieze chükeshü geinu mia kekra bu miatholietuo.

²⁰ Derei thezho-u vorta, mu süki ze thezho kevarhuo rei kra parta; derei kephouma krakecü ki ze ngukemezhieu rei krakuota,

²¹ sidi kephouma la kesia bu diketuo tuoi, chü kemezhükelie geinu ngukemezhie bu di, sidi u Niepu Jisu Khrista geinu kechachie kerhei ngulie vite.