Rommiako 4 - Angami Naga CL (Re-edited) Bible (BSI)

Abraham Geinu Thakie

¹ Siro u puotsa Abraham-e chüüphou kitsa nu krakelie dze kedipuo pulie ta?

² Kekreilamonyü Abraham-e puo mhathoko la miatholie üliro, puo kemholielie kevi ba, derei Ukepenuopfü mhodzünu we silie kenjü.

³ Siro kethodie-e kedipuo pu ga? “Abraham-e Ukepenuopfü pele, mu süla puo ü miatho ülie.”

⁴ Siro mhakechümia puoe puo zha ngulie rei puo zhakhrau üse methuo ngulie üya mo, derei süu krakelie puo.

⁵ Sirei mhatho la mo zo, derei miatho kemomia chü kemiatholieyakezhau pelekecü, puo kepele hau la puo üse miatho üya.

⁶ Süla u mhathoko la mo di Ukepenuopfü thuo u chü kemiatholiekezhamia thejakepfü dze David rei pu:

⁷ “U kejokemou vashü u tsüwaketamia, mu u kephoumako whekewamia thejakepfütho;

⁸ Niepuue puo ü kephoumamia ü sa lhoketamia thejakepfütho zo.”

⁹ Siro thejapfükecü hau zhükeremia rübei pu me, mo zhürekemomia rei sa pu ga? Hie kepuu ro, “Abraham kepele la puo ü miatho ülie.”

¹⁰ Kimhie di puo ü silie ga? Puo zhürekelie mhodzü mo zhürekelie sie nu ga? Süu puo zhürekelie sie nu mo, derei zhürekemo nu zo.

¹¹ Puoe zhüre moluo ürei kepele la miathokelie nu zhükere zasi vükewa ngulie. Sidi puo bu zhürekemo nu rei pelekelie khe puotsa chülie, mu ukoe pelekelie la Ukepenuopfü uko chü kemiatholie.

¹² Puoe zhürekeliemia puotsau rei zo, süu zhürekelie rübei la mo, derei u puotsau Abraham puo zhürekelie mhodzü kepele kelhouu mhiei lhoukelie geinu zo.

Kepele geinu Ukepenuopfü Phrakeshüko Ngukelie

¹³ Siro Abraham mu puosepuoyieko bu kijüu pie u vie chüketuo phrapie kezhü thezho-u la monyü pelelie di miathokelieu geinu zo.

¹⁴ Mhanuü thezho chüüzeyakezhako bu theka süu lietuo üro, kepele se mhapuorei kechü jüte mu phrapie kezhüu rei kemethuote.

¹⁵ Kekreilamonyü thezho-u noupfhü se vorya; derei thezho kejüra thezho kevarhuo rei ba mo.

¹⁶ Süla phrapie kezhüu kepele geinu zo, tsiu süu geinu ngukemezhie khapie seyie pete tsü zo, mu süusü thezho chüüzeyakezhako rübei zomonyü Abraham kepele mhie pelekezhako la rei zo (puo u pete puotsau zo,

¹⁷ süu thupie kezhü, “A n bu seyie kekra puotsa chütuo”), sidi puoe peleyakezhau kesiamia chü perhei lashüyakezha mu mha tuo moto zokecüko nunu mhachü se parshülieyakecü Ukepenuopfü mhodzünu u puotsa chü.

¹⁸ Siro kemerü tuo moketa kemhie ki zorei puo peletsa zo, süla puo “Seyie kekra puotsa chütuo,” ikecüu chülie, sidi, “N seyiemia bu kra phituo” idi pupie kezhü tuoi chülie.

¹⁹ Siro puo chü puo mo-u phichüta mu puophi puodzie laketa ki ze (puo teicie krie puo penuote) morei Sara rei nuo lhoulie kevi tei keyieta zorei puo kepele rükreta mo.

²⁰ Puoe Ukepenuopfü phrapie kezhüu pele kemo chüta mo di kepeleu nu metei miemie sie di thetshetherhu se Ukepenuopfü tsülie,

²¹ Ukepenuopfü phrapie kezhüu chü motalie lho zo ücü pele khruta.

²² Puo kepele la “Puo ü miatho ülie.”

²³ Siro “puo ü siketa” die süu puo rübei la thupie zhü mo,

²⁴ derei u la rei sa zo. We rei kesia nunu u Niepuu Jisu perheikelieu peleya liro, kepele la u üse miatho ülietuo,

²⁵ u kephoumako la puo bu sia mu u chü kemezhülieketuo la puo perhei lalie.