Rommiako 3 - Angami Naga CL (Re-edited) Bible (BSI)

¹ Siüro Judamia kedipuo mia ki vikuo ga? Morei zhükere la kide puo kevi ba ga?

² Mha pete nu kevi ba phi, kekreilamonyü therie nu Ukepenuopfü thuo dieu pie Judako peleshü.

³ Mhanuü mia huo dietholie mota ro ki ta? Uko dietholie moketa la Ukepenuopfü dietho-u bie pejüwatuo me?

⁴ Suotuo! Themia pete tijüta zo ürei, Ukepenuopfü bu we kedietho-u chücie, süu thupie kezhü, “N dieko geinu no ü dietho ülietuo, mu no capi kechü ki no kuolietuo,” si.

⁵ Derei we mezhü kemoko la Ukepenuopfü kemezhü thashüya liro, we kedipuo pulie ta? Ukepenuopfüe noupfhü se u pechü üro puoü miatho mo ütatuo me? (A themia rhiu geinu pu ba.)

⁶ Suotuo! Siliro Ukepenuopfüe kikidi kijüu nyie kecü ta?

⁷ Mhanuü a miatho kemo-u geinu Ukepenuopfü zayie mu puo mhatho-u tha kemeyie kuoshülieya üro, kiüdi mia a üse kephoumamia üdi puya ga?

⁸ Di siro “Úko mha keviu bu parlieketuo la mha kesuo chü khe, situo me?” (ikecü hie üse puya üdi huomia hie thate.) Uko pejowa zhü zo!

Miapuorei Miatho Mote

⁹ Siro kita? We mia ki vikuo me? Mo, si moto; kekreilamonyü hamhodzü Judamia rei mu Grikmia rei kephouma kekuo khrükhro tuota ükecü pushüte,

¹⁰ süu dze thupie kezhü: “Themia kemiatho jüte, puorei jüte;

¹¹ themia mhacamhala sikelie puorei jüte, Ukepenuopfü kepfhü puorei jüte.

¹² Pete cha vajowate, uko mhacümhatho mo phrete; themia mha kevi kechü jüte, puorei tuo mote.”

¹³ “Uko mezha sü mekhru kecie mhie; uko meü se mia kese die pu.” “Uko menie khro priele mhitsie tuo.”

¹⁴ “Uko me nu mia rüpfhürüsekecü mu kepfhükerhu thuo tshu.”

¹⁵ “Uko mia dukhrituoü u phi yha rhürhüi zo;

¹⁶ kepeka mu kemezhiekecü rübei uko cha nu zhü,

¹⁷ tsiu ukoe noune chau si mo”

¹⁸ “Uko mhodzüki Ukepenuopfü khrükeprei puorei jü.”

¹⁹ Siro thezho-u nu mha puyakezhako thezho kenyiko ki puyakecü we si zo, süla mia pete die va pejüwaya, mu kijü pete rei Ukepenuopfü mhodzü u nyie kecütuo.

²⁰ Kekreilamonyü thezho zeyakezha la “miapuorei puo mhinguki miatholieya mocü la,” thezho lanu kephouma dze silieyakezha ze ru.

Kepele la Miatho Lakelie

²¹ Sirei tsie we thezho-u nu kemo, Ukepenuopfü kemiatho puo bakecü thashüte, süu thezho-u mu siedzekesikoe zhapu chüya,

²² süu Jisu Khrista kepele geinu Ukepenuopfü kemiathoe pelekecü khe gei voryakezhau, siro kehoupuorei kekreilie lho,

²³ themia pete phoumate mu Ukepenuopfü zayie zho-u tsolie mote;

²⁴ sirei Khrista Jisue rhakelie do chükeshü geinu puo u ngukemezhie la we puoma chü mo di miatholieya,

²⁵ Ukepenuopfüe puo bu u la ruotho chü di sia mu kepele geinu puo zieu pie kephoumako valie kevi chüshü. Puo hau chükeshü puo kemiatho-u pekieshüketuo la zo, kekreilamonyü voketa teiko nu puo shügeshühie tsiu themia kephoumako ngu rei ngu kemo chü vor;

²⁶ süla tsie we puo thuo miatho zokecü mu Jisu pelekelie kheko chü kemiatholie vikecü thashüya.

²⁷ Siro kemholiekecü ha kiü ta? Süu tha jü. Thezho kikecüpuo la shi? Mhathoko la me? Mo, pelekelie zho-u la zo.

²⁸ Kekreilamonyü we ngukelie, mia puo Ukepenuopfü mhodzü mezhülieketuoe thezho-u u ki kepu mhathoko la zomonyü kepele geinu mezhülieya ücü silie.

²⁹ Mo, Ukepenuopfü ha Judako Kepenuopfü rübei me? Puo Judakemoko Kepenuopfü rei mo üme? U, Judakemoko la rei zo.

³⁰ Ukepenuopfüe puocü zo, puoe u zhükeremia rei mu zhürekemomia rei peleu pelelie liro chü kemiatholietuo.

³¹ Siliro we kepele la thezho-u kha kegewatuo me? Suotuo zo! Sikecüumonyü, we thezho-u mvü kemeteishüya.