Rommiako 2 - Angami Naga CL (Re-edited) Bible (BSI)

Ukepenuopfü Kemezhü Capi

¹ Süla nie kehoupuorei, mia pejoyakezhau, no mhapuorei pukelie ba jü; no kekreimia le pejo ba ro n thuo n pejo keba zo, no mia pejoyakezhau, no rei sümhie touko chüyakezha la.

² Noe sie, “Ukepenuopfü themia sikecü chüyakezhamia pejoketuoe ketho tou medzi di chüketuo hie si ba,” iya.

³ Nie kehoupuorei, mha sikecü chüyakezhamia le pejoya, sirei n thuo zorei sükemhie chüya üro, sidi no Ukepenuopfü n pejo ketuou therhielie thenyüsiecü leya me?

⁴ Morei no puo kekhrie kezha, puo nou chakecü mu shügeshühiekezha rütseya me? No Ukepenuopfü kekhrieu thuo n cha thapie thenoukedilieya ükecü si mo me?

⁵ Derei n nou kekhrükere mu mengalie kemo la puo noupfhü teisozhau, Ukepenuopfüe kemezhü capi chüketuo pesikeshü nhie la n thuo noupfhüu kengu keba ze.

⁶ Kekreilamonyü puoe u mhatho kheki sü chüpie mia puopuo tsü phre zotuo;

⁷ shügeshühie di mha kevi chü di zayie mu therhu tsiu siatalie kelho pfhüyakezhako we kechachie kerhei pie tsütuo;

⁸ derei kehoupuorei u thuo u zhazhü le mu ketho-u dieze chü mo di kerüzhü chüyakezhamia gei puo noupfhü rushütuo.

⁹ Judamia bu rie siro süsie Grikmia rei sa di kemezhiekecü mu keziekere pie mha kesuo chükezhamia gei shütuo,

¹⁰ derei zayie mu thetshetherhu tsiu noune pie mha kevi chüyakezha pete tsütuo, Judako rie, süsie Grikmia rei sa.

¹¹ Kekreilamonyü Ukepenuopfüe mia puo gei rei puo nei si kreiya mo.

¹² Thezho kejü nunu phoumakecü pete thezho kejü nu katuo, siro thezho-u khro nu phoumacü khe thezho-u nunu u nyie kecütuo.

¹³ Thezho-u rünyükelie la miapuorei Ukepenuopfü mhodzünu mezhülieya mo, derei thezho-u chüüzeyakezhako rübei mezhülieyakezha zo.

¹⁴ Siro Judakemoko thezho ngulie mo zo ürei lhenu thezho-u ze tuoya üro, thezho-u jü zorei süko pie u zho-u chülieta zo.

¹⁵ Ukoe thezho-u nu chü morokesuoko pie uko melou geinu thulieketa thashü, mu uko noue süu zhapu chüya; sidi u noue huoki u pejo mu huoki vashü zoü tuoya,

¹⁶ sünhie, a dieliekeviu nu kepu tuoi, Ukepenuopfüe, Jisu Khrista bu themia rüli kerüshükerüvieko kecütuo.

Judamia mu Thezho-u

¹⁷ Derei nie thuo nie üse Judamia üya mu thezho-u gei tha di Ukepenuopfü n ze keperokecü la kemholie,

¹⁸ mu puo medo-u si, tsiu thezho-u nu n ki pukeshü la kedipuo chü ro puotoutho shi silie,

¹⁹ di mhiciemia chatha puo mu kezei nu ketuoko la mitu puo,

²⁰ kemeloko la chatha, nhicunuoko kepethau, sidi thezho-u nu mhasimhale mu ketho-u bacü siya,

²¹ di no, kekreimia pethaya liro no n thuo n pethalie lho üme? No kerügu petsou di pethaya, sirei no rüguya le?

²² No mia bu pieü chü lho üdi n thuo pieü chüya le? No terhuorhiko rütseya di rüsuokiko nu mha rüguya le?

²³ No thezho-u la kemholiekezhau thezho varhuo di Ukepenuopfü rhu kemo chüya die?

²⁴ Süla süu thupie kezhü, “Nieko lanu Judakemoko donu Ukepenuopfü za tha tuote,” isi.

²⁵ No thezho-u zeya liro zhükere-e puoma nyi; derei no thezho-u varhuoya ro, n zhükereu zhürekemo puo chüte.

²⁶ Süla zhürekemoko thezho nu chü morokesuoko chüya liro, uko zhürekemo üse zhükere mhie zoü motuo me?

²⁷ Süla nie thupie kezhü zho medzi di zhürelie derei thezho-u varhuo liro, chüümo nu u zhüre mo derei thezho-u chüüzekezhako thuo sier nie pejotuo.

²⁸ Kekreilamonyü chazou kengu nu rübei, morei chazou mu chüüphou geinu zhürekelie la Judamia mo.

²⁹ Derei Judamia ücüe u nou nu kechüu zo, tsiu u melou nu zhükere-e zhürekelie ketho-u, süu ruopfüu nunu zo mu kethuu medzikelie la mo. Sikecümia themia kinu monyü Ukepenuopfü kinu thetshe ngulieya.