Rommiako 16 - Angami Naga CL (Re-edited) Bible (BSI)

Kelukeshü

¹ A nie ki u üpfü Foibe, Kenkria nu dikon chüyakezhapfü zhapu chüshüya,

² nieko puo üse Niepuu kitsa ketuomia üdi puo zeliecie; kemesako sikecü mese, mu nieko puo tsopfhü ki mhakehoupuo nu rei puo khruohiliecie, kekreilamonyü puo themia kekra mu a zorei vaphi seyakezhapfü puo zo.

³ A ze kedziese di Khrista Jisu lietho chüyakezha Priskila mu Akila nie kelushü ho,

⁴ unie a la unie phou rei khashütuo üsie zo, a rübei monyü Judakemoko kehou pete rei unie pezieya ho.

⁵ Siro unie ki nu kehouyakezhako rei kelushü ho. Mu a khrieu Epaineto rei kelushücie, puoe Asia nu Khrista pelelie kerietho-u.

⁶ Maria rei kelushücie, puoe nieko la thehiechü phi.

⁷ A seyiemia mu a ze kedie kechü Adronika siro Junia unie kelushücie, unie apostelko donu rei therhukepfümia, mu unie a mhodzü rei Khristamia chüketamia.

⁸ Ampliata rei kelushücie, u Niepuu kitsatie a khrieu zo.

⁹ Khrista kitsa kere lietho chüyakezha Urbano mu a khrieu Staki rei kelushücie.

¹⁰ Khrista kitsa va kethoketau Apele rei kelushücie. Aristabulo kikruu rei kelushü ho.

¹¹ A seyiemia Herodion rei kelushücie. Niepuu kitsa tuoketa Narkiso mu puo kinuko kelushücie.

¹² Niepuu kitsa lietho chüyakezha Trifena mu Trifosa unie kelushücie. Thekhriekepfü Persi rei kelushü ho, puo Niepuu la thehiechü phi zo.

¹³ Niepuu la kedakelieu Rufu rei, mu puo zuo rei, puo a zuo rei sa zo, unie kelushücie.

¹⁴ Asinkrito, Flego, Hermes, Patroba, Herma mu süko ze keba u zeko rei kelu phreshücie.

¹⁵ Filologu mu Julia, Nerio siro puo üpfü, mu Olimpa, siro süko ze keba kemesako pete kelu phreshücie.

¹⁶ Kemesako kemebokecü zho se nieko huoniehuo kelushücie. Khrista kehouko pete nie kelushü ho.

Tarhokeshü Die

¹⁷ A siezedzürieko, nie pfükho mu thephi kemesü chüyakezhako, tsiu nie pethapfülieketau petsouyakezhako la balie mu therhie zolienu nie tarhoshüya.

¹⁸ Kekreilamonyü siyakezhamia u Niepu Khrista lie chü monyü u thuo u va lietho chükezha zo, mu süko die pu pesikhuoi mu mha kese die pu di miamoko nou se ketsiwaya.

¹⁹ Nieko dieze chüyakezha, mia pete site, a rei nieko la a nei ba, a nieko bu mha kevitsa la mhasilie nyü, derei mha kesuotsa we si kemopfü chü zo nyü.

²⁰ Noune Kepenuopfüe pecha mo di Satan penyüpie nie phikhroshüwatuo. U Niepu Jisu ngukemezhieu bu nieko ze baliecie.

²¹ Timothi, a dzieseu nieko kelushü ho, siro sütuoi a seyiemia Lukia, Jason mu Sosipater rei sishü ho.

²² Leshü hau thukeshüu, a Tertio, rei Niepuu za nu nieko kelushü ho.

²³ A puo so chü keba Gaya mu puo kinu kehouyakezha kehouu rei nieko kelushü ho; Erasta, rüna kinyikeseu, siro u zeu Kouarto rei nieko kelushü ho.

²⁴ Niepuu Jisu Khrista ngukemezhieu bu nieko ze baliecie. Amen.

Ketshe mu Kecha Thelau

²⁵ Ukepenuopfü nie chüpie nie kepele nu, a dieliekeviu mu Jisu Khrista dze pukeshü, thiedzü keviepieketuo die kesou pie u pekiekeshüu nunu nie bu metei thalietuo,

²⁶ derei tsie we kechachie Kepenuopfü diekhakeshüu la siedzekesiko leshüko geinu süu si kemecielie di mia bu kepele dieze chülieketuo la pupie Judakemomia peteko pesishüwate,

²⁷ puo rübei mhakesi Ukepenuopfü, bu Jisu Khrista geinu kechachie zayie chücie. Amen.