Rommiako 15 - Angami Naga CL (Re-edited) Bible (BSI)

Huoniehuo Zhazhü Kepfhü

¹ We meteiketako, u thuo u nei u nyü chüta mo di kethachüko kho rei yalie zhü.

² We kehoupuorei u siezanuomia chü pevikelie le di sümia nei chülie khe.

³ Kekreilamonyü Khrista rei puo thuo puo zhazhü pfhü mo; sikecüumonyü süu dze thupie kezhü, “Mia nie kengakecü dieko a gei pfürte,” si.

⁴ Siro thiedzü thupie ketuo kehoupuorei se u pethaketuo la zo, sidi u bu shügeshühiekelie mu Ketholeshü geinu u chü kethepfulie di u siedze nyilieketuo la zo.

⁵ Siro shügeshühiekelie mu kethepfu khashüyakezha Ukepenuopfü bu nieko huoniehuo nou chü kerhepie Khrista Jisu nou mhie shükelieu chüliecie,

⁶ süu geinu nieko keze puo chü mu kedierhe di u Niepu Jisu Khrista-nuo Puo Ukepenuopfü tshelietuo.

Dieliekeviu Judakemoko la rei Zo

⁷ Ukepenuopfü bu zayie chülieketuo la Khrista nieko zekelie tuoi nieko rei huoniehuo zeliecie.

⁸ Siro a nieko ki puya, Khristae Ukepenuopfü kedietho-u thashütuoü zhürekelieko la lhou vor di u puonuoko ki phrapie kezhü chü tseishü,

⁹ di Judakemoko bu rei puo u ngumezhiekeshü nunu Ukepenuopfü tshelieketuo la. Süu thupie kezhü: “Süla Judakemoko donu a n tshetuo, mu keli n za tshetuo.”

¹⁰ Siro puoe pu sakecü, “He-i Judakemoko, puo themiako ze di nie neiliecie.”

¹¹ Süsie rei, “Judakemoko pete, Niepuu tsheliecie, tsiu themia pete bu puo tsheliecie”

¹² Siro Isaya rei pukecü, “Jese geinu puo yie puo the partuo; puo Judakemoko mho dituo üdi kesier-u; Judakemoko puo gei u kemerü batuo,” si.

¹³ Pelekelie la kemerü Kepenuopfü bu kenei mu noune pie nie ketshu chücie, silie ro nie kemerü süu bu Kemesa Ruopfü kekuou geinu krakechü salieketuo la.

Paul Thepfu Se di Leshü Kethu Cau

¹⁴ Siro a siezedzürieko, nieko mha kevi pie nie ketshu chüketuo, mhakesi neiüko se nie ketshu chükepfü, mu huoniehuo tarholie vi keba, nie gei a kethepfu nyi.

¹⁵ Derei Ukepenuopfüe ngukemezhie pie a ketsü la nieko kekhrokecü leshü hau nu a thepfu se di mha dze huo thupie nie ki shü ho.

¹⁶ Süusü a bu Judakemoko la Khrista Jisu lie chü mu Ukepenuopfü dieliekeviu zievo lietho chü di Judakemoko pie Ukepenuopfü tsü di Kemesa Ruopfü bu nieko chü kemesapie puo bu lielie kevi chülieketuo la.

¹⁷ Jisu Khrista nu, a Ukepenuopfü lietho kechü la a kemholielie vite.

¹⁸ Khrista a geinu chükeshü, die mu mhatho nunu Judakemoko bu dieze nu vorlieketuo la zo moro mha kekrei puorei pulie lhote.

¹⁹ Zasi siro u ngoko tsiu Ukepenuopfü Ruopfü kekuou nunu chüshüwate, sidi a Jerusalem nu mu sükhieümhou vo Ilirikom ketso Khrista dieliekeviu se mia petha ketsoshü.

²⁰ Sidi a kemenguu sü Khrista za si moto zokecüra dieliekeviu pushü nyü bei tuoya, sidi kekreimia puo mvüdzepie zhüwaketau geinu sede molieketuo la,

²¹ derei süu dze thupie kezhü, “Puo dze u ki pu mo zokecükoe ngutuo, mu puo dze si moto zokecükoe puocapuola silietuo.”

Paul Rom nu Vo Nyükecü

²² Siro tsiekenuo a nieko ki vor nyüketuou nunu a kedeiwakuo phi.

²³ Derei tsie we hatsatie mharapuorei kevo ba sa mote, mu teicie kekra a nieko ki vor nyü tuo,

²⁴ a Spain nu kevo ki vortuo. Kekreilamonyü a rüve teiu nu a nieko ze kengushü di nieko bu a ketseshütuo, va puo puotei huo nieko ze a nei zalieketa sie.

²⁵ Derei tsie zowe kemesako khruohishüketuo la a Jerusalem nu votazhie;

²⁶ Makedonia mu Akaya nu kebako mha huo khapie Jerusalem nu keba kemesako donu kejüko tsütuo ükecü u neite.

²⁷ Uko sikecü uko neita zo, mu uko süko pu pfü tuota ketho zo; kekreilamonyü Judakemoko süko kinu ruopfü thejako ngulie liro, uko kishükinyiko se süko khruohi zhü zo.

²⁸ Süla a mhatho hau chü tseiwa mu mha kengukelie pete pie uko tsükewa sie, a nieko ki vor di Spain nu votuo;

²⁹ mu a nieko ki kevor ki a Khrista geinu ngukelie ketshukelhuochükecü thejako se vortuo.

³⁰ Siro a zenuoko, u Niepuu Jisu Khrista lanu mu Ruopfüu kinu kepar kekhrieu la, a ze di nie teitsochü Ukepenuopfü ki a la cha banuya,

³¹ süusü kekreilamonyü pele kemo Judia nu kebako kinu a kelalieketuo la mu a Jerusalem nu kebako khruohituoü tuokecü kemesako bu u neilieketuo la,

³² sidi a bu Ukepenuopfü medo nunu a nei di vor nieko tsolie di nieko ze rüleilieketuo la.

³³ Ukepenuopfü nouneu bu nieko pete zebakelieu chüliecie. Amen.