Rommiako 14 - Angami Naga CL (Re-edited) Bible (BSI)

No Mia Le Pejo Hie

¹ Nieko kepele kethachümia zorei zeliecie, derei u kele pu keprüliketuo le hie.

² Mia huo mhakehoupuorei cülie kevi peleya, sirei kethachümia ga rübei cüya.

³ Süla mhakehoupuo cüyakezhamia cüyakemomia rütseta hie, mu cüyakemomia rei kecümia le pejo hie; Ukepenuopfü u zelieketa la.

⁴ No supuo di kekreimia kituou le pejoya ga? Uko thalie rei krüta rei u niepuu thuotie, mu uko thalietuo, kekreilamonyü Niepuu puo bu thalie kevi chüshütuo.

⁵ Mia puoe teisozha kekrei puo ki rei teisozha puo rhukuoya, mu kekrei puoe teisozha pete rei kemhie zo ükecü leya. Kehoupuo bu rei puo thuo puo nou nu puotouu leliecie.

⁶ Teisozha puo se pekreiyakezhau, süu Niepuu kerhu nu siya. Siro kehoupuorei cüyakezhamia Niepuu kerhu nu cüya, süu la kethezie pie Ukepenuopfü tsüyakezha la; derei cüyakemomia Niepuu kerhu nunu zo mu süu la rei Ukepenuopfü thezieya.

⁷ We kehoupuorei u thuo u la rhei ba mo, mu u thuo u la sia reiya mo.

⁸ We rhei shierei, Niepuu la rhei baya, mu we sia shierei Niepuu la siaya; süla we rhei rei sia rei, we Niepuu vie zo.

⁹ Haha la Khrista bu kesiako mu kerheiko mho Niepuu chütuoü sia di rheilaliete.

¹⁰ Kiüdi no n siezedzüriemia pejoya ga? Morei no, kiüdi n siezedzüriemia thiya ga? Úko pete rei Ukepenuopfü dienya bau mhodzünu tha phre zotuocü la.

¹¹ Süu thupie kezhü: “A rhei ketuo tuoi, khoudza pete a mhodzünu khoutou phretuo, mu meü pete Kepenuopfü tshe phretuo,” Niepuue siya.

¹² Süla u kehoupuorei Ukepenuopfü mhodzünu u thuo u rüli lha phreshütuo.

N Siezedzüriemia Chakha Chü Hie

¹³ Süla úko huoniehuo le pejo molie khe, sikecüumonyü kekreimia phi kemesü morei perheshü molieketuo leliecie.

¹⁴ A Niepuu Jisu geinu mhapuo si tou mu le touse tuote süu mhapuorei puo thuo zowe mesa kemo jü; derei mia puoe mhapuo mesa mo üdi leta ro, süu puo la mesa mote.

¹⁵ N kecüca la n siezedzüriemia bu rüzalieta ro, no kekhrie nu tuo mote. N kecüca la no mia puo Khristae puo la siakeshüu pekawa hiecie.

¹⁶ No vi üdi leyakezhau mia bu thata hie.

¹⁷ Kekreilamonyü Ukepenuopfü kedi-e kecükekrietsa monyü kemiatho tsiu noune mu Kemesa Ruopfü nunu u neikecüu zo.

¹⁸ Kehoupuorei hamhie di Khrista lie chüyakezhau Ukepenuopfü nei chüya mu mia rei sümia rhuya.

¹⁹ Süla u kehoupuorei kezekevi mu huoniehuo chü pevilieketuo whuo zolie khe.

²⁰ Kecüca la Ukepenuopfü mhatho bie pesuowa hie, mha pete rei mesa zo ketho, derei n ca la kekreimia bu krüta ro, süu kekrü.

²¹ Süusü themuo cü mo, morei zu krie mo, morei kehoupuo chü rei n siezedzüriemia phi kemesü chüwa kemo-u puotou.

²² Süla n thuo vi üdi si touketa kepele n gei baketau pie Ukepenuopfü nnie donu tuolie. Puo thuo puo le pejo mo di mu puo chükezhau puotou üleya ro thejakepfütho.

²³ Derei kehoupuorei kenoudo di cü üro, süu jotaya, kekreilamonyü kepele geinu cü mokecü la; mhakehoupuorei kepele geinu bode chü kemo khe sü kephouma zo.