Rommiako 13 - Angami Naga CL (Re-edited) Bible (BSI)

Sorkari gei Chü Kezhüu

¹ Kehoupuorei sorkari kekuo se kebako die zeliecie; Ukepenuopfü kinu vor kemosie kekuo puorei tuo kemo la, mu kekuo se keba zhoko Ukepenuopfü thuo khapie keba zo.

² Süla kehoupuorei kekuo süu petsou ro Ukepenuopfü thuo pethopie kebau petsoute, mu siyakezhamia kepejo ngulieya.

³ Kekreilamonyü kezhamiakoe mha kevi chüyakezhamia kedeya mo, derei sükoe mha kesuo chüyakezhako gei phiya. No kekuo seyakezhamia prei mo di ba nyüya me? Siüro, mha kevi chülie, sitse no thetshe pfülietuo.

⁴ Puoe Kepenuopfü kituomia chü di n la mha kevi chü keba zo. Derei mha kesuo chüya üro, no michieliecie, kekreilamonyü kekuo se kebau kemethuo nu zhiecha se ba mo. Ukepenuopfü kituomia chü di mha kesuo kechümia gei noupfhü khashüketuo la baya.

⁵ Süla mia puoe noupfhü keprei la rübei monyü puo nou nu puotouu le di chü morosuo.

⁶ Kekuosekebakoe Ukepenuopfü liethomia chü keba la, nie rei süu la khezhanuo khashü zhü eru.

⁷ Süla mha pie tsü kezhüko tsüwalie, khezhanuo khashü kezhüu khashüwalie, u zha khashü kezhüu chüwalie, prei kezhüu preilie, mu rhu kezhüu rhulie.

Huoniehuo Khriekecü

⁸ Huoniehuo khriekecütsa sie mia puo pu rei pfü hie; kekreilamonyü mia khriekezhau thezho-u chü tseilieya.

⁹ Diekhakeshüko nu pukecü, “No pieü chü lho; No mia dukhri lho; No rügu lho; No mha mehou lho;” mu diekhakeshü kekreiko rei die hau nu par zo: “N siezanuomia khriepie n thuo n kekhrie mhietuo,” icü nu.

¹⁰ Kekhrie-e puo siezanuomia gei mha kesuo puorei chüya mo; süla kekhrie-e thezho-u chü tseishüya.

¹¹ Sizomonyü, nieko puoteiu si ba, süusü nie zekezhü nunu cokelie tei toute. Thiedzü we pelechie siekelie kiki rei tsie we kelakelieu u penuokuoketa la;

¹² teizeizhau tseitazhie, teisotiete. Süla úko kezeiu mhathoko khawa di kezieu rünyieko chü pfülie khe;

¹³ teiso gei tuoi úko lhou menuolie khe, kerüyo tsiu mezemelu, mha kesuo morei unei unyü chü, kegeikecü mu mia ngu u rokecüko chü molie khe.

¹⁴ Sikecüumonyü u Niepuu Jisu Khrista chü dzielie, mu chüüphou rüyako chütuoü mhapuorei le hie.