Rommiako 12 - Angami Naga CL (Re-edited) Bible (BSI)

Khrista nu Kelhou Kesau

¹ Süla a siezedzürieko, Ukepenuopfü u ngukemezhieu la, a nieko bu nie phou pie perhei ruosuo kechü, mesa mu Ukepenuopfü bu lielie kesü chüpie puo tsünukecü nieko hüshüzhie ho, süusü nie ruopfü kelhou rüsuo ketho-u zo.

² Kijü hau rüliko mhieta hie, derei nie nou chü kesapie nie chü pekreilie, sitse nie Ukepenuopfü medo-u silie vi, süusü keviu, lielie kesüu mu vilotsokecüu zo.

³ Ngukemezhie pie a tsükewau la a nie donu kehoupuo bu rei u thuo u le pezhata mo di mhale pesoulie, tsiu Ukepenuopfü kepele mejüpie kehoupuorei tsü phrekeshüu mhie selienu di nie ki puya.

⁴ Kekreilamonyü themo puo tuoi u zatho kekra ba, mu süko pete u mhatho kemhie phre mo,

⁵ sütuoi we kekreikecü kekra shierei, Khrista nunu mo puo zo, sidi mia puoe kekreiu ze kekhe phre.

⁶ Siro ngukemezhieu nunu khakeshü u mhaphruo kekreikrei phre: süu siedzekesi mhaphruo üro, u kepeleu de ki ze mhachülie;

⁷ lietho üro, süu se lietho chülie, süu kepetha üro, süu se mia pethalie;

⁸ mia tahitarhokecü üro, se mia tarholie, mha khakeshü üro, mephruomevuoi di khashülie, krüta kechü üro, shürhei di chülie; mia ngumezhiekecü üro, u nei siei di chülie.

Khristamia Ketho Zasi

⁹ Kethera mo di mia khrielie; mha kesuo rütselie, mha keviu rüyalie;

¹⁰ siezedzürie huoniehuo khriekezha tuoi huoniehuo khrie philie; huoniehuo rhu rie nyü kekielie.

¹¹ Nie shürhei bu thachüta hie; nie nou le me balie, Niepuu lie chü ba zolie.

¹² Nie siedze lepie nie nei siei ba zolie; kemezhiekecü ki rei shügeshühielie, cha sei balie.

¹³ Kemesako tsopfhü vaphilie, mia peso nyü sieiliecie.

¹⁴ Japie nie pechüpenyükezhako tsülie; mia rüse monyü japie mia tsülie.

¹⁵ U neiyakezhamia ze nie neilie, krayakezhamia ze kralie.

¹⁶ Huoniehuo ze kenourhelie, kezha nou pfüta mo di miaümia rei ze kekrotholie; nie thuo nie üse mhasikuo üta hie.

¹⁷ Mia mha kesuo puo chüshü rei mia gei sükemhie chü la hie, mia mhodzünu vi ükecüu u rhiechü di chülie.

¹⁸ Nie chülie kevi chie mia pete ze kezevi di lhou balie.

¹⁹ A khrieko, mia gei nie khepu hie zo di pie Ukepenuopfü noupfhüu tsatie shüwalie, kekreilamonyü süu dze thupie kezhü, “Khepu sü a mese, a thuo süu chüwatuo, Niepuue siya.”

²⁰ Sikecüumonyü, “N ngumvümia merütuo ro, puo vachüshülie, terhütuo ro mha pie puo dieshücie; no sishü ro mizhü ketu chüpie puo tsügei pfhekeshü mhie zotuo.”

²¹ Mha kesuo bu n ki kuolie hieü, mha kevi se kesuou penyüliecie.