Rommiako 10 - Angami Naga CL (Re-edited) Bible (BSI)

¹ A siezedzürieko, a melou nu kemengu mu Ukepenuopfü ki kechau sü themia hako bu rei kelakelie ngulieketuou zo.

² Ukoe Ukepenuopfü kitsa u rhiechü phikezhü a zhapu chülie vi zo, derei süue mhasi ketho-u nu mo.

³ Kekreilamonyü ukoe Ukepenuopfü kinu kevor kemiatho-u si mo, di u thuo u kemiatho-u bu metei balietuo üdi Ukepenuopfü kemiatho khrükhro lerlie mo.

⁴ Kekreilamonyü themia kehoupuorei pelekelieu bu miatholieketuo la Khrista geinu thezho-u bu puo thela chüte.

Kelakelie Mia Pete la Zo

⁵ Mosae thezho nunu miathokelie dze thu di “Kehoupuorei hako chüyakezhau rheilie zotuo,” sishü.

⁶ Derei kepele geinu kemiatho paryakezhaue pucü, “N nou nu, ‘Supuoe teigei kho ta?’ ” (Puoca Khrista bu kerketuo)

⁷ “morei ‘Supuo kijü khro kesou nu tsu ta?’ (Puoca, kesia nunu Khrista ze parketuo) idi le hie,” iya.

⁸ Derei süu kedipuo puya ga? “Dieu n penuo ba zo, n tie nu mu n melou nu ba zo,” si. (Puoca, we se puyakezha kepele dieu zo);

⁹ kekreilamonyü no Jisu üse Niepuu zo ükecü n tie nunu puphralie mu kesiako donunu Ukepenuopfü puo chü perheilietacü n nou nu pele liro, n kelalietuo.

¹⁰ Kekreilamonyü miatholieketuo la themia u nou se pelelieya, mu kelakelie ngulieketuo la u tie se phralieya.

¹¹ Kethodie-e pukecü, “Kehoupuorei puo pelekelieu bu thenga chütalie lho zo,” si.

¹² Kekreilamonyü Judamia rei Grikmia rei kekreilie lho; Niepuu sü themia pete mho Niepuu zo mu puoe puo ki chayakezha pete gei mephruomevuo phiya.

¹³ Kekreilamonyü, “Themia kehoupuorei, Niepuu za kiekelieu kelalie zotuo.”

¹⁴ Derei ukoe pele moliro kikidi puo kielie ta? Mu uko kimhie di puo dze si kemo puo pelelie ta? Siro miae puo dze pushü moro kikidi uko puo silie ta?

¹⁵ Mu themia ketseshü moro kimhie di puo dze pushülie vi ta? Süu dze, “Dieliekevi se kevorko phi kide zivi shi!” idi thupie zhü.

¹⁶ Derei mia pete dieliekeviu zelie mo; kekreilamonyü Isayae pucü, “Niepuu, supuonie hieko dielieu pelelie ga?” si.

¹⁷ Süla kerünyü geinu kepeleu parya, mu rünyükelie süusü Khrista dieu geinu zo.

¹⁸ Derei ae uko süu si mo zo me? idi ketso. Uko süu si tou zo; kekreilamonyü “Uko pfhe kijü pete nu si vote, mu uko dieko kijü vala ketso nu rei vote,” isi.

¹⁹ Siro Israel süu caüla silie mo me? Therie nu Mosae pucü, “A seyie ketho mo zocü kro puo la, nieko bu nie rokelie chüshütuo; mu kenya seyie puo la nieko bu nie nou meyietuo.”

²⁰ Sitse Isayae thepfu se di pu sakecü, “A pfhütuo kemo kro puo a nguliete; a thuo a khapie a ki cha kemo kro puo pengushüte,” si.

²¹ Derei puoe Israel ki, “Mia die ze kemo mu mha kepetsou themiako ki we teisozha pete a bounie yhapie kie tha zo,” si.