Rommiako 1 - Angami Naga CL (Re-edited) Bible (BSI)

¹ Paul, Jisu Khrista kituou, apostel chünu di kielieketau, Ukepenuopfü dieliekeviu la kelakreikelieu,

² süusü thiedzütho puoe puo siedzekesiko ki pupie kezhü kemesa kethodieko nu thupie ketuo,

³ dieliekevi süu puo Nuou dze, puo chü puo phou tsatie lesie ro David yie geinu lhou vor

⁴ mu ruopfü kitsa kemesa lesie ro kekuo geinu Ukepenuopfü Nuou zo ükecü kesia nunu rheilasiekelieu geinu thashü, u Niepuu Jisu Khrista

⁵ geinu hie ngukemezhie nu apostel chükelie zo; sidi puo za nu Judakemomia seyie neiüko ze vor kepele diezeu nu shülieketuo la zo,

⁶ süusü nie, Jisu Khrista vie chüketako rei sa zo.

⁷ Thupie Rom nu keba Ukepenuopfü khriekepfü, kemesamia chütuoü kielieketa pete ki shüya: Ukepenuopfü u Puou mu Niepuu Jisu Khrista ngukemezhie mu noune bu nie gei bakelieu chücie.

Kethezie Khakeshü Kecha

⁸ Therieu, a nie pete la Jisu Khrista nu Ukepenuopfü tshe baya zo, kekreilamonyü kijü pete nu nieko kepele dze si voketa la.

⁹ Siro a a nou se puo Nuou dze dieliekeviu zhapu chü di lietho chüyakezhau, mu a a kechako nu petewa mo di nieko rükra sei bayakecü Ukepenuopfü thuo a zhapu ba zo,

¹⁰ Ukepenuopfü medo üro tsie we a bu nieko ki volie kevi chüshüketuo merü ba.

¹¹ Kekreilamonyü a vor nieko ze kengushü di ruopfü theja huo rei se kezashü mu nieko chü kemetei sashü nyü phi bayakezha la,

¹² u, süu geinu nieko rei mu a rei idi úko huoniehuo kepele geinu huoniehuo chü kethepfu salieketuo la.

¹³ Siro a siezedzürieko, Judakemoko donu tuoi nieko donu rei a mhatho si huo ngulie kenyü la, a tsiemelie nieko ki vor nyü seyakecü (sirei tsie ketso vorlie mo ba zo) a nie bu si ba nyüya.

¹⁴ Ae Grikmiako mu kemomiako rei, mhakesimia rei mu kemomia rei pu pfü tuote.

¹⁵ Süla a dieliekeviu pie nie Rom nu kebako ki rei pushü nyü phi tuo zo.

Dieliekevi Kekuo

¹⁶ A dieliekeviu la we mengaya mo; süusü pelekelieko pete kelalieketuo la Ukepenuopfü kekuou zo, Judako ki shü rie mu Grikmia la rei zo.

¹⁷ Kekreilamonyü kepeleu geinu pelekelie nu Ukepenuopfü miatho-u thashüya, süu thupie kezhü, “Kemiathomia kepele geinu rheilie zotuo,” si.

Themia Phoumaketa

¹⁸ Mha kesuo chü di ketho-u chakha chükewako la teigei nu Ukepenuopfü noupfhüu miatho kemoko mu mha kesuo kechü pete petsoukecü thashüte.

¹⁹ Ukepenuopfü dze silie keviko uko bu si ba zo, kekreilamonyü Ukepenuopfü thuo thapie uko kiewate.

²⁰ Kijü chükelie yawinu Kepenuopfü kekuo kechachie keba tsiu puo zhorüliko, ngu mo zo ürei, puo mhathoko geinu si mu nguliete. Süla uko mhapuorei kerüpulieketuo cha ba mo zo.

²¹ Uko Ukepenuopfü si ba zorei puo üse Ukepenuopfü üdi puo rhu mo, siro kethezie rei pie puo tsü mo, sikecüumonyü u nouleko kemethuo mu u nouko zeibouite.

²² Ukoe u thuo mhasi üdi leketa geinu kenyamia chüte;

²³ mu kechachie tuoyakezha Ukepenuopfü zayieu pie kaüjütaketuo themia, morei pera, morei khunuo phidiapfü morei tinyhüko miarhiko ze keliwate.

²⁴ Süla Ukepenuopfü uko bu kerüzhü nu u nei u nyü chü nyü ro chücie idi uko khapie mesa kemonu shüwate, sidi uko bu u thuo u donu u phou khriekemo chüwate.

²⁵ Kekreilamonyü ukoe Ukepenuopfü kedietho pie ketijü chüwa di mhachükeshüu, kechachie thejakepfüu monyü mhachükelieko rüsuorüsu mu lie chü tuoketa la! Amen.

²⁶ Hauha la Ukepenuopfüe uko khapie chüüphou menguko nu shüwate. Sidi thenuko rei lhenuzho-u mo di u thuo keze kethenga mhathoko chüta,

²⁷ mu sümhiei thepfuko rei lhenu thenumia zekecü zho-u monyü u menguko se huoniehuo gei shü di thepfuko thuo keze thenga mhathoko chüketa nu uko kekrükecü siazha ngu kezhüu ngulie.

²⁸ Siro ukoe Ukepenuopfü pie uko nou shü nyü moketa tuoi, Ukepenuopfü rei uko khawa di u bu chü zhü kemoko chü tsiu thenou rüporüvükecü nu shüwate.

²⁹ Uko kerüzhü noule neiü se u tshupfü tuote, mha kesuo, kemehou, kethakecü, mia ngu u rokecü tshukepfü, mia kedukhri, kegeikecü, mia sekedakecü, kedovikecü, sieü kechü,

³⁰ kethakemele, Ukepenuopfü ngukemvü, mia rhu kemo, kemiakokecü, kemelhakecü, thedo kesuo pfhükeshü, u krünuo die ze kemo,

³¹ mha lelieya kemo, u die se balieya kemo, mia ngumezhie kemo mu uzho suokecü.

³² Ukepenuopfü zho nu hakemhie kechümia sia zhücü ukoe si ba zo, sirei ukoe mha süko chükecü zomonyü süko chüyakezha kekreimiako rei üse vi üya.