Pulakeshüzho 8 - Angami Naga CL (Re-edited) Bible (BSI)

Kijü Kevi Puo Pevielieketuo

¹ Nie le Jihovae pie nie puonuoko tsütuoü rüsekeshü kijüu pevielie di lhou mu kruolieketuo la, a thie n ki diekhakeshü pete menuo di chüüzelie.

² Mu puoe n chü kerünuoshütuoü mu n dojü tsiu n nou kedipuo ba shikecü sishüketuo la Jihova n Kepenuopfü rayha nu cie hiedia n ze tuokecü no rükra se tuoliecie.

³ N bu themia ha niekhrüda rübei geinu lhouya mo derei Jihova tie nunu kepar die kehoupuo geinu rei lhouyakecü silieketuo la, puoe n chü kerünuo mu n chü kemesashü, di no siya kemo, n puonuo rei siya kemo Manna pie n vachüshü.

⁴ Cie hiedia hako nu, n pfhenei n geinu prieta mo, mu n phi rümieta mo.

⁵ Süla n nou nu siliecie, themia puoe puo nuou pethayakecü tuoi Jihovae n pethaya.

⁶ Süla noe puo cha nu tuo mu puo prei di Jihova n Kepenuopfü diekhakeshüko zeliecie.

⁷ Jihova n Kepenuopfüe n ze kijü kevi puo, razhako nu mu kijüthouko nu rücü dzü, dzüluo, dzü kekru kijü puo nu vorkeshü la.

⁸ Thoulha mu barli lha, khube tsiu chiede mu turaü kelhou kijü olivbo mu mepfhidzü kijü,

⁹ sünu no tsamere mo di niekhrüda cüketuo kijü, no mhapuorei tsopfhülie lho, puo tsieko thegi zokecü kijü mu puo kijükhruko gei mese thielie kevi kijü.

¹⁰ Mu noe cü di pevülie ro Jihova n Kepenuopfü thezietuo, puoe kijü keviu pie n ketsü la.

¹¹ Jihova n Kepenuopfü diekhakeshüko puoe pethokeshüko mu puoe chünukecüko ae thie diekhapie n ketsüko rükra mota molieketuo la, menuoliecie.

¹² Si moliro, noe cü di pevülie, mu ki kevi chülie di süko nu balie,

¹³ tsiu n thukroko mu n kuokroko kruolie, siro n rakachü tsiu suna kralie mu n vie pete kralie ro,

¹⁴ n nou kemiavi sieta di, Jihova n Kepenuopfüe Ijipt kijü nunu, kedie chü keba kiu nunu n ze parkeshü rükra motalie vi.

¹⁵ Puoe rayha zha mu kemeriekecü nunu, tinyhü kerhuko tsiu sebako kenyi kijü mu dzü kejü kijü keso nunu n ze parshü, puoe tsiekrie nunu dzü se par n tsü.

¹⁶ Rayha nu rei n puonuokoe siya kemo Manna pie n vachüshü, puoe n chü kerünuoshü mu n dojüshü di thelatsa n la kevi chüshüketuo la.

¹⁷ Siro no n nou kinu; “A kekuo mu a dzie kekuo thuo kinyi hau pfhülie,” ita molieketuo la menuoliecie.

¹⁸ Noe Jihova n Kepenuopfü rükratuo, puoe thie ha tuoi, n puonuoko ki rüse di puo dietseidiekho khakeshüu chüshüketuo la n bu kinyi ngulieketuo kekuo pie n tsüshüya.

¹⁹ Siro noe Jihova n Kepenuopfü rükra mota di terhuo kekrei siemedzita ro, nie kaüjüta zotuokecü a thie nie tarhoshü ho.

²⁰ Jihova nie mhodzü seyieko bu kaüjüketa tuoi nie rei kaüjütatuo. Jihova nie Kepenuopfü pfhe ze kemosie.