Pulakeshüzho 7 - Angami Naga CL (Re-edited) Bible (BSI)

Themia Kemesa Chükelie

¹ Jihova n Kepenuopfüe n bu pevielietuo üdi lekezhü kijüu nu n ze vorshü di n mhodzünu seyie kekra, Hitko, Girgashko, Amorko, Kananko, Perizko, Hivko, Jebusko, n ki zhakuo mu kuokuokecü seyie thenieko whuo kemesashü di,

² uko pie n tsüshü di no uko penyüwa ro, no uko peka tseiwatuo. No uko ze dietseidiekho puorei chü lho, mu yopuorei uko ngumezhieshü lho.

³ N nuopfüko pie uko nuoko ki penyishü mu n nuo thepfuko la uko nuopfüko lie idi uko ze kesekerikecü chü lho,

⁴ kekreilamonyü ukoe n nuo khriesako kewhipie uko bu a medzi mo di terhuo kekrei rüsuota zotuo, sitse Jihova noupfhüu nie gei tuvütuo, sidi puoe n peka mhawatuo.

⁵ Derei nie uko gei hakemhie chütuo, nie uko ruosuobako bierhuowatuo, mu uko tsieseko dutshedutsha phawatuo, mu uko Asherako wiwatuo, mu uko miarhiko mi pie thewatuo.

⁶ Kekreilamonyü noe Kepenuopfü mhodzünu seyie kemesa puo, Jihova n Kepenuopfüe kijü nu themia kekrei pete donunu n kedapie puo kinyi mu puo themia chüliete.

⁷ Jihovae puo kekhrie pie nie gei keshü mu nie kedakelie ha, nie mia kekreimia ki krakuomu ikecü la mo, nie-e themia donu ketsatho kro yopuo zo.

⁸ Derei Jihovae nie khriekecü la, mu puo nie puonuoko ki rüsekeshüu khapie bakecü la, Jihovae puo dzie kuo phikecü pie nie ze parlie, di kedie kechü kiu nunu, Ijipt kediu Faro dzie nunu nie rhalie.

⁹ Süla Jihova n Kepenuopfü sü Ukepenuopfü zocü siliecie, pelelie kesü Kepenuopfü, puo khrie mu puo diezeyakezhamia gei we phou nyie puo ketso rei puo dietseidiekho-u puo kekhrie ketho khapie baya,

¹⁰ mu mhotsou puo ngukemecü zhakhra chüshü di uko pekawaya, puoe puo ngukemecüu zhakhra chüshü menuotalie lho, puoe mhotsou puo zhakhra chüshütuo.

¹¹ Süla thie a n ki pukeshü tuoi diekhakeshüko, chünukecüko mu pethokeshüko chüüze menuolie.

Dieze Chükelie Thejako

¹² Siro nie-e pethokeshü hako rünyü mu chüüzelie ro, Jihova nie Kepenuopfüe n puonuoko gei dietseidiekho-u mu puo kekhrie ketho-u khapie batuo üdi rüsekeshüu puoe n gei khapie ba zotuo;

¹³ puoe n khrietuo, japie n tsütuo, mu n chü pekruoshütuo; puoe n puonuoko tsütuo üdi rüsekeshü kijüu nu japie n phou geinu kepar siu, mu n kijü siu, n lha mu n khubedzü mu n tier, n kicükiri tsiu n kuo mu temvü kro-u pete chü pekrashütuo.

¹⁴ Noe themia pete mho thejapfütuo nie donu thepfumia rei thenumia rei morei nie kiri donu rei nuojü ba lho.

¹⁵ Tsiu Jihovae n kinu kechükenyü sephretatuo, mu puoe no sikecü Ijipt nu kechü kesuoko puo rei pie n gei shülie lho, derei puoe süko pie n ngukemecüko pete gei shütuo.

¹⁶ Jihova n Kepenuopfü khapie n dzie nu keshü themia pete pekawatuo, uko ngumezhie lho, morei uko rhuoko rüsuolie lho, süu n la ciephrie puo chütatuokecü la.

¹⁷ Noe n nou nu sie, “Seyie hako a ki zhakuo, a kikidi uko vie lielietuo mu?” iba rei,

¹⁸ no uko preita hie, derei Jihova n Kepenuopfüe Faro gei mu Ijipt pete gei kedipuo chüshü shikecü rükra zolie,

¹⁹ kemezhiekecü kezha kevor n mhipie kenguko, zasiko, u ngoko, tsiu Jihova n Kepenuopfüe puo dzie kekuo mu puo bou yhapie nie ze kepar-u rükralie. Jihova n Kepenuopfü sükemhie chüpie no uko preikebako pete gei shütuo.

²⁰ Sizomonyü Jihova n Kepenuopfüe uko petsou di pfhidi ketsepie rheiba di n ki nunu rüshü tuoketako peka di pekathewatuo.

²¹ No uko prei hie, Jihova n Kepenuopfüe zha mu kemeriekecü Kepenuopfü, puo nie donu bakecü la.

²² Jihova n Kepenuopfüe seyie hako rülili di n mhodzü nunu whuowatuo; no vapuochü uko pejüwalie kenjü, nhachüko n la krathortalie vikecü la.

²³ Derei Jihova n Kepenuopfüe uko khapie n tsüshütuo, di uko pekawa kemochie uko bie kemide phishütuo.

²⁴ Mu puoe uko kediko khapie n dzie nu shütuo, mu no tei khro nu uko za pejüwatuo; no uko pekawa kemochie miapuorei n mhodzü thalie kenjü.

²⁵ Nie uko rhuo rhiko mi pie thewatuo, no süko gei keba suna rei rakachü rei mehou lho, morei n thuo n la süko lie chü lho, süu pie n mawaketuo la; süu we Jihova n Kepenuopfü la we mha kerütse zokecü la.

²⁶ Noe mha kerütsekecü pie n kinu vor di süu tuoi rüsepfüta suo; no süu rütserücie bei zo morosuo, süue rüsekepfü vie zokecü la.