Pulakeshüzho 6 - Angami Naga CL (Re-edited) Bible (BSI)

Diekhakeshü Kezhatho-u

¹ Siro nie bu vo pevielietuoükezhü kijüu nu chüüzeketuo la Jihovae a bu pie nie pethashünu di diekhakeshü, chünukecüko mu pethokeshüko hako;

² no mu n nuonuo, tsiu n tsunuoko bu puo zhoko mu diekhakeshü pete n rhei chie ze di Jihova n Kepenuopfü prei tuolieketuo la; mu n bu rheichalieketuo la.

³ Süla harie Israel, rünyüliecie, di süko chüüzetuoü menuoliecie, Jihova n puonuoko Kepenuopfüe n ki phrakeshü tuoi mithunudzü mu mepfhidzü krukezhü kijüu nu nie vo lhoulietuo mu kruo philietuo.

⁴ Rünyüliecie, harie Israel, Jihovae úko Kepenuopfü, Jihovae puo zo.

⁵ Siro noe n melou pete se, n ruopfü pete se mu n kekuo pete se Jihova n Kepenuopfü khrietuo.

⁶ A thie n ki diekhakeshüko pie n melou nu tuotuo.

⁷ No n pecü se n nuonuoko pethatuo, mu no n kinu ba rei, no cha nu tuo rei, zhütsu rei, siro no sie rei süko dze putuo zotuo.

⁸ Noe zasi chüketuo la süko pie n dzie gei khetuo; mu süko pie n mhinie donu n teikhie rütso chütuo.

⁹ No süko thupie n kikha coko gei mu n careko gei shütuo.

Die Ze Kemo la U Kireilienukecü

¹⁰ Siro Jihova n Kepenuopfüe n puonuoko, Abraham, Isak mu Jakob tsütuo üdi rüsekeshü kijüu nu n ze vorshü; noe chü kemo rüna kezha kevi bakecü,

¹¹ noe chü kemo mha doneiü chüpie tshupfü keba kiko, noe thie kemo dzükhou, noe pelhoushü kemo lie mu oliv zie, sidi noe cü pevülie ro,

¹² Jihova, Ijipt nunu, kedie kechü kiu nunu n ze parkeshüu rükra mota molieketuo la menuoliecie.

¹³ No Jihova n Kepenuopfü preituo, puo lie chütuo, mu puo za rübei se rüsetuo.

¹⁴ Nie terhuo kekrei nie khie nie mhou keba themia rhuoko siemedzilie lho,

¹⁵ kekreilamonyü n donu keba Jihova n Kepenuopfü puo rokenyi puo zo. Jihova n Kepenuopfü nouyieu n gei sierta di puo bu kijüu zie geinu n pekawa rei si momu.

¹⁶ Nie Jihova nie Kepenuopfü kedolie lho, nie Masa nu puo kedokecü tuoi.

¹⁷ Nie Jihova nie Kepenuopfü diekhakeshüko, mu ahzako tsiu chünukecüko, nie pecü se di zetuo.

¹⁸ No Jihova mhinguki mezhü mu vi ükecüu chülie, Jihova n puonuoko ki rüse di khakeshü kijü keviu nu lelie di pevielie mu no vi zo volieketuo la.

¹⁹ Tsiu Jihovae phrakeshü tuoi n ngumvümia pete whuowatuo.

²⁰ Siro thiesie n nuonuokoe sie, “Jihova úko Kepenuopfü n ki diekhakeshü ahzako, chünukecüko mu pethokeshüko ca kedipuo ga?” idi ketso ro.

²¹ Noe sie n nuonuoko ki, “Hie Ijipt nu Faro die chütuo ru Jihovae puo dzie kuo sekecü puo pie Ijipt nunu hie shüphralie.

²² Tsiu Jihova hie mhinguki nu Ijipt gei, Faro mu puo kinumia pete gei zasiko u ngoko, siro kepechü kere se chü pekieshü,

²³ sidi puoe sünunu u ze parlie, u ze vo, di u puonuoko ki rüsekeshü kijüu pie u tsütuo üdi.

²⁴ Mu Jihova u bu pethokeshü hako pete chüüzenu diekhakeshüu sü Jihova úko Kepenuopfü preilie, puotei pete nu u dzevi la, puoe thie tuoi u perheise balieketuo la.

²⁵ Mu we menuo di Jihova úko Kepenuopfü mhodzünu diekhakeshü hau, puo u ki diekhakeshüko chüüzelie ro süu pie u miatho chütuo,” situo.