Pulakeshüzho 5 - Angami Naga CL (Re-edited) Bible (BSI)

Thezho Kerko

¹ Süsie Mosae Israelko pete kieshü di, uko ki: Harie Israel, rünyüliecie, chünukecüko mu pethokeshüko a thie nieko nyie kinu pukeshüko, süko silie, mu menuo di medzilie,

² Jihova úko Kepenuopfüe Horeb geinu u ze dietseidiekho chü.

³ Dietseidiekho süu Jihova u puonuoko ze chü mo derei u ze chü, u pete thie ketso rhei kebako ze chüwe.

⁴ Jihovae kijüthou gei mi donunu mhotsou nie ze kerüchü.

⁵ (Mu a süki Jihova die pie nieko pesishütuo üdi Jihova mu nieko donu thalie; siro niekoe mi la michieta, di niekoe kijüthouu gei kho moketa la) mu puoe sie;

⁶ Ae Jihova n Kepenuopfü, Ijipt kijü nunu, kedie kechü ki nunu n ze parkeshüu.

⁷ Noe a kemo terhuo kekrei puorei nyilie lho.

⁸ No n thuo n la miarhi chülie lho, tei pesogei keba, morei kijü khro keba, morei kijü khro dzü nu keba kehoupuorei mhiecü rei rhilie lho.

⁹ No nerhutsu süko rüsuo morei süko lie chülie lho, ae Jihova n Kepenuopfü puo rokenyi Kepenuopfü puo zo, u puonuoko kejo la phou se phou dia ketso rei a mecükecümia gei siazha khashüya,

¹⁰ derei a khrie mu a diekhakeshüko zeyakezhamia gei we rüdi kemo kekhrie pie thephou thenyie ketso rei pekieshüya.

¹¹ No kemethuo nu Jihova n Kepenuopfü za selie lho. Jihovae kemethuo nu puo za sekecümia pejo motalie lhocü la.

¹² Jihova n Kepenuopfü n ki diekhakeshü tuoi, sabat zhau se kemesalie.

¹³ No zha sorou mhachü di n mhatho pete chütuo;

¹⁴ derei zha thenie nhie we Jihova n Kepenuopfü la sabat, sünhie no mhatho puorei chü lho, no rei, n nuo thepfu rei thenu rei, morei n theke thepfu rei thenu rei, n thudo rei, n gada rei, morei n kiri kehoupuorei, morei chazoumia n cahou nu kebamia rei, n theke thepfu rei thenu rei n tuoi rüleilieketuo la.

¹⁵ No rei Ijipt kijü nu mia theke chükecü, mu Jihova n Kepenuopfüe sünunu puo dzie kekuo tsiu puo bou yhase n ze parkelie rükra tuolie, süla Jihova n Kepenuopfüe n bu sabat zhau zenu di diekhashü.

¹⁶ Jihova n Kepenuopfüe n ki diekhakeshü tuoi, n puo n zuo rhulie; Jihova n Kepenuopfüe se n ketsü kijüu nu n kelhouzha bu cha mu n la viketuo la.

¹⁷ No mia dukhri lho.

¹⁸ Morei pieü chü lho.

¹⁹ Morei rügu lho.

²⁰ Morei n zanuomia gei ketijü zhapu chü lho.

²¹ Morei n zanuou kimia mehou lho. Morei puo ki, puo theke thepfu rei thenu rei, puo thudo, morei puo gada morei n zanuou vie puorei mehou lho.

²² Die hako Jihova kijüthou gei mi donunu, kimhou, mu zeibouikecü donunu, puo pfhe peto di nie mechükehou pete ki pushü; mu puoe kekrei pu sa mo. Tsiu puoe tsiekra kenie geinu thulie di pie a tsüshü.

Themiako Michie Phiketa

²³ Siro kezei nunu, kijüthouu gei mitukeba nunu mhapfhe puo si tse, nieko donu phichüko, seyie krütako a ki vor;

²⁴ mu nie-e sie, “Harie, Jihova úko Kepenuopfü puo kesokezie tsiu puo kezha pie hie pengushüte, mu hie miu donunu puo pfhe sishüte; hie thie Ukepenuopfü themia ze kerüchü zorei themia rhei balieyacü ngushüte.

²⁵ Süla hie kidi siatatuo mu? Mi kezha hau u the pejüwaketuo la, hie Jihova úko Kepenuopfü pfhe si la ro, siata zotuo.

²⁶ Kekreilamonyü kerhei Kepenuopfü mi donunu die pukeshü hie we sikecü mhie si di rhei ba zokecü chüüphou chükepfü donu suomia ba ga?

²⁷ Penuo phi di Jihova úko Kepenuopfüe pushüketuoko rünyüliecie; sidi Jihova úko Kepenuopfüe n ki pushüketuo pete hie ki pu lashücie; sitse hie-e süu rünyü di chülietuo,” sishü.

²⁸ Tsiu Jihovae nieko a ki kepu dieko sishü; sidi Jihovae sie a ki: “A themia hako die, uko n ki kepuko sishüte; uko kepuko pete mezhü zo.

²⁹ He-i, uko bu haikecü noule se sei di a prei mu a diekhakeshüko zeücüwe, uko thuo rei mu uko nuonuoko rei kechachie lhou rüülie tuomuru!

³⁰ Phi di uko ki, ‘Nie pfheki nu la votalie,’ siwalie.

³¹ Derei no we a khieki thalie, siro ae diekhakeshüko tsiu chünukecüko mu pethokeshüko n bu pupie uko kieketuoko se n ki pushütuo, uko bu ae se uko tsüketuo kijüu nu chüüze tuolieketuo la,” sishü.

³² Süla Jihova nie Kepenuopfü nie ki diekhakeshü tuoi chülieketuo la menuolie; nie rürei thezatsa morei thevitsa prata lho.

³³ Nie Jihova nie Kepenuopfü nie ki diekhakeshü cha pete nu tuolie ro, nie rheilietuo, mu nie kijüu pevietuoükezhüu nu lhou chalietuo.