Pulakeshüzho 4 - Angami Naga CL (Re-edited) Bible (BSI)

Mosa Israel bu Dieze Chülienu Pukeshü

¹ Harie Israel, tsie Jihova nie puonuoko Kepenuopfüe khapie nie tsükeshüu nu nie rheiba di le pevielieketuo la, chünukecüko mu pethokeshüko ae pie nie pethakeshüko le terüliecie.

² Nie dieca puo rei pie a nie ki diekhakeshüko pe sa lho, morei sünunu chüseta lho, Jihova nie Kepenuopfü diekhakeshüko, a diekhashü nie ketsüko zelieketuo la.

³ Jihovae Peor nu Baal gei kedipuo chüshü shikecü nie mhipie nguwate; Jihova n Kepenuopfüe Peor nu nie Baal medziketa pete pekakewa.

⁴ Derei nieko, Jihova nie Kepenuopfü mengutsapfükelieko thie ketso rei rheiba zokecü la.

⁵ Harie, Jihova a Kepenuopfü a ki diekhakeshü tuoi, ae chünukecüko mu pethokeshüko pie nieko pethashüte, süusü nie bu vo pevielietuoükezhü kijüu nu chüüzelieketuo la.

⁶ Süko zelie mu medzilie, süu pie mia mhingu nu nie mhasimhale chütuo, mu ukoe thezho hako pete sishü ro sie, “Ketho zo, seyie kezha hau sü mhasi mu mhacamhala kesi themia kro puo zo,” situo.

⁷ Kekreilamonyü Jihova úko Kepenuopfü sü we puo kiekeshü ki u penuo keba tuoi seyie kezha kikecüpuoe u rhuo u penuoketuo ba ga?

⁸ Siro a thie thezho pie nieko mhodzünu keshü tuoi chünukecüko mu pethokeshüko nyikecü seyie kezha kikecüpuo ba ga?

Horeb nu Israel Sikelieko Pu Lakeshü

⁹ Menuou menuolie, mu pecü phi di n kelhou seliecie, n mhipie ngukeshüko rükra mota molieketuo la, sidi süko bu n rhei chie n nou kinu tuota molieketuo la; süko pie n nuonuo mu n tsunuoko pesishülie,

¹⁰ no Horeb nu Jihova n Kepenuopfü mhodzünu thakecü nhie, Jihovae a ki, “Themiako kengupie a ki shülie, uko bu a die rünyülieketuo la, uko bu kijü nu lhouketuo chie a prei seilieketuo la, sidi süu pie uko nuonuoko pethalieketuo la,” si.

¹¹ Ru niekoe penuo vor di kijüthou phi nu thalie, mu kijüthouu zeiboui, kimhoukeshü chü tsiu thedzükezei chü di tu kho teimeluo tso.

¹² Sitse Jihovae miu donunu nie ki pu. Nie die pfhephrau si, derei mharhi puorei ngu mo, pfhephra puo rübei zo.

¹³ Tsiu puoe puo dietseidiekho-u se nie pesishü, nie bu chüüzenu di diekhashü, süu diekhakeshü kerko; mu puoe tsiekra kenie geinu süko thushü.

¹⁴ Siro Jihovae süki a bu chünukecüko mu pethokeshüko se nieko pethashünu di a ki diekhashü, nie bu nie-e vo di pevielieketuo kijüu nu süko chüüzelieketuo la.

Miarhi Kerüsuo la U Kireilie Morokesuo

¹⁵ Süla nie kireiliecie, Jihovae Horeb nu miu donunu nie ki die pukeshü nhie nie mharhi puorei ngu kemo la,

¹⁶ nie thuo nie la terhuorhi huo rhi di mha kesuo chüwa molieketuo la menuoliecie, thepfumia morei thenumia rhi rei,

¹⁷ kijü nu khunuo kehoupuo rhi rei, teikhrie gei pruo ketuo puoshü kenyi pera rhi rei,

¹⁸ kijü gei gou ketuo kehoupuo rhi rei, kijü khro dzü nu ketuo khuo kehoupuo rhi rei.

¹⁹ Siro no n mhipie tei mehoshü di n seketsipie n bu niaki morei khrü morei themvüko mu teigei ketuo kro pete ngushü di, Jihovae khapie teiko khro themia pete tsükeshüko rüsuo mu theketa molieketuo la menuoliecie.

²⁰ Derei Jihovae thie ha tuoi nieko pie puo vie zokecü themia chüketuo la, Ijipt nu thegi kelho khou nunu nie ze parlie.

²¹ Siro Jihova nie la a gei puo nei mota di puoe a bu Jordan cielie lho üdi; mu a bu Jihova n Kepenuopfü se n phruokeshü kijüu nu le lho üdi rüsewa.

²² Kekreilamonyü a we kijü hau nunu siatatuo, a we Jordan cie pra lhote; derei nie we pra di kijü kevi süu pevielietuo.

²³ Süla nie kireilie, Jihova n Kepenuopfü n ze dietseidiekho kechüko rükra mota hie di Jihova nie Kepenuopfü nie bu chü hienukeshü mhakehoupuo rhi rei rhita molieketuo la.

²⁴ Jihova n Kepenuopfü mha the pejükecü mi puo, urokenyi Kepenuopfü puo zokecü la.

²⁵ N nuonuo mu n tsunuo nyilie di kijü sünu lhou kevavuo di nie-e mhakehoupuorei rhi di chüzhü kemo chü mu Jihova n Kepenuopfü mhodzünu mha kesuo chü di puo nei kemo chü ro,

²⁶ nie Jordan tse pra di pevietuoükezhü kijüu nunu kaüjü mhaitaketuo, a thie tei mu kijü kiepie a zhapu chüya, nie sünu lhou pechalie lho, derei nie peka lotsowatuo.

²⁷ Siro Jihova nie chüpie themiako donu cürewatuo, sidi Jihova nie whuopie seyie kekrei donu shü di nie bu mia donu ketsa kro chü di lhoutuo.

²⁸ Sidi nie sünu sei mu ketsie se chükecü, themia dzie se chükecü, mha ngulie mo, mhapfhe si mo, mhacülie mo, mhare si kemo terhuomia theketuo.

²⁹ Derei sünunu noe Jihova n Kepenuopfü pfhütuo, mu no n nou pete se, n ruopfü pete se puo pfhü ro puo ngulietuo.

³⁰ No kemezhiekecü nu keba ki, mu mha hako n gei phirkelie nhie, noe Jihova n Kepenuopfü ki la vortuo, di puo die zelietuo.

³¹ Jihova n Kepenuopfü sü mia ngumezhieyakezha Kepenuopfü puo zokecü la; puoe n khawalie lho morei n pekawalie lho morei puoe rüse di n puonuoko ze dietseidiekhokeshüu rükra motalie lho.

³² Siro tsie no voketa teisozhako ketsoshülie, Jihovae themia chüpie kijü gei keshü teiso yawinu siro tei tietsa nu kekreitsa ketso mia ketsolie, mha kezha haikecü tuo mo kishi morei mhara nu puo dze rei si üme?

³³ Themia huo nieko sikeshü tuoi mi nunu terhuomia pfhe sishü di rheibakecü huo nyi mo ki shi?

³⁴ Morei Jihova nie Kepenuopfü Ijipt nu nie mhi kinu nie la mha pete chükeshü tuoi terhuo puorei seyie kekrei puo donunu mhadojükecü, zasiko, ungothoko, mu terhü chü di kekuo dzie se, mu puo bou yhapie, mu kemeriekecü chü di puo thuo puo la seyie puo zekelie ba me?

³⁵ Nie bu Jihovae Ukepenuopfü zo ükecü silieketuo la süu chüpie nie pengushü; puo sie kekrei puorei jü.

³⁶ Nie pethashüketuo la teigei nu puoe puo pfhe pie nie bu sishü, mu kijü geinu puoe nie bu puo mi kezhau ngushü, mu noe miu donunu puo dieko sishü.

³⁷ Puoe n puonuoko khrie di uko se uko yiemia kedalie, di puo thuo puo sa di puo kekuo kezha se di Ijipt nunu n ze parlie.

³⁸ Siro tsie ha tuoi uko kijü khapie n phruoketuo la n ki zha, mu kuo phikecü seyieko whuowa.

³⁹ Süla thie si mu le toulie, di süu pie n nou shülie, Jihovae tei pesogei mu kijü pekhro nu rei Ukepenuopfü zo, kekrei puorei jü.

⁴⁰ Süla no puoe chünukecüko mu puo diekhakeshüko a thie pie n ki pukeshüko zelie, no mu n sie vorkezhü nuonuoko bu vi zo volieketuo; mu Jihova n Kepenuopfüe kechachie se n tsükewa kijüu nu n kelhouzha bu chalieketuo la.

Themou Kechümia la Rünako

⁴¹ Süsie Mosae Jordan tsekepra niathutsa nadi se kha kreipie bawa.

⁴² Mia biekhrikewamia, kengumvü tuo mo mu u kenyü chü mo di u zanuomia biekhrikewamia bu ta nadi hako huo nu vo di u kerheiro kelalieketuo la.

⁴³ Rüna süko rayha kijü, kethekhra gei keba Bezer, Reubenmiako la, Gilid nu keba Ramot Gadmiako la, mu Bashan nu keba Golan Manassehko la.

Mosa Zho Dze Die Therieko

⁴⁴ Hauha Mosae Israelmia mhodzünu khakeshü thezho-u:

⁴⁵ Hako Mosae Israel nuonuoko Ijipt nunu kepar ki uko ki pukeshü ahzako, chünukecüko mu pethokeshüko, siro diekhakeshüko.

⁴⁶ Mosa mu Israel nuonuokoe Ijipt nunu kepar ki puoe penyükewau Heshbon nu keba Amorko kediu Sihon kijü, Jordan tsekepra Bet-peor rütsietsa razhau nu.

⁴⁷ Sidi ukoe puo kijü mu Bashan kediu Og kijü lielie, hanieha Jordan niathutsa keba Amorko kedinie zo.

⁴⁸ Arnon Rüu khie Aroer nunu Sirion Kijüthou (süu Hermon) ketso,

⁴⁹ mu Jordan tsekepra niathutsatie Araba, Pisga tsiekhie khro Araba Dzükezha ketso.